الجمعة، 18 مارس 2011

التعديلات الديستوريه الجديده







 45 مليون مواطن مصري يحق لهم المشاركة في الاستفتاء حيث تخطوا سن 18 سنة في 1 مارس 2011 ويحملون بطاقة الرقم القومي.
انت واحد منهم 

علشان كده نقلنالك ملخص التعديلات الديستوريه الجديده 
علشان تشوف ان كانت مرضيه لك مبدأياً فى المرحله دى ولا لأ

هتقول نعم ام لا؟؟

اضغط لتكبير الصوره


لكل من يريد الاطلاع عليها تمهيدا للمشاركة في الاستفتاء عليها يوم 19 مارس القادم ، وهى كالتالي:
- مادة 75
يشترط فيمن ينتخب رئيسا للجمهورية أن يكون مصريا من ابوين مصريين، وان يكون متمتعا بحقوقه المدنية والسياسية، وألا يكون قد حمل أو أي من والديه جنسية دولة أخري، وألا يكون متزوجا من غير مصرية، وألا تقل سنة عن أربعين سنة ميلادية.

- مادة 76
ينتخب رئيس الجمهورية عن طريق الاقتراع السري العام المباشر ويلزم لقبول الترشيح لرئاسة الجمهورية أن يؤيد المتقدم للترشح ثلاثون عضوا علي الأقل من الأعضاء المنتخبين لمجلسي الشعب أو الشوري، أو أن يحصل المرشح علي تأييد مالا يقل عن ثلاثين ألف مواطن ممن لهم حق الانتخاب في خمس عشرة محافظة علي الأقل، بحيث لا يقل عدد المؤيدين في أي من تلك المحافظات عن ألف مؤيد.

وفي جميع الأحوال لا يجوز أن يكون التأييد لأكثر من مرشح، وينظم القانون الاجراءات الخاصة بذلك كله.
ولكل حزب من الأحزاب السياسية التي حصل اعضاؤها علي مقعد علي الأقل بطريق الانتخاب في أي من مجلسي الشعب والشوري في آخر انتخابات أن يرشح أحد أعضائه لرئاسة الجمهورية.
وتتولي لجنة قضائية عليا تسمي لجنة الانتخابات الرئاسية الاشراف علي انتخابات رئيس الجمهورية بدءا من الإعلان عن فتح باب الترشيح وحتي إعلان نتيجة الانتخاب.
وتشكل اللجنة من رئيس المحكمة الدستورية العليا رئيسا، وعضوية كل من رئيس محكمة استئناف القاهرة وأقدم نواب رئيس المحكمة الدستورية العليا، وأقدم نواب رئيس محكمة النقض وأقدم نواب رئيس مجلس الدولة.
وتكون قرارات اللجنة نهائية ونافذة بذاتها، غير قابلة للطعن عليها بأي طريق وأمام أية جهة، كما لا يجوز التعرض لقراراتها بوقف التنفيذ أو الالغاء كما تفصل اللجنة في اختصاصها، ويحدد القانون الاختصاصات الأخرى للجنة.
وتشكل لجنة الانتخابات الرئاسية اللجان التي تتولي الاشراف علي الاقتراع والفرز علي النحو المبين في المادة 88.
ويعرض مشروع القانون المنظم للانتخابات الرئاسية علي المحكمة الدستورية العليا قبل اصداره لتقرير مدي مطابقته للدستور.
وتصدر المحكمة الدستورية العليا قرارها في هذا الشأن خلال خمسة عشر يوما من تاريخ عرض الأمر عليها، فإذا قررت المحكمة عدم دستورية نص أو أكثر وجب
اعمال مقتضي قرارها عند إصدار القانون، وفي جميع الأحوال يكون قرار المحكمة ملزما للجميع ولجميع سلطات الدولة، وينشر في الجريدة الرسمية خلال ثلاثة أيام من تاريخ صدوره.

- مادة 77
مدة الرئاسة أربع سنوات ميلادية تبدأ من تاريخ إعلان نتيجة الانتخاب ولا يجوز إعادة انتخاب رئيس الجمهورية إلا لمدة واحدة تالية.
- مادة 88
يحدد القانون الشروط الواجب توافرها في أعضاء مجلس الشعب ويبين أحكام الانتخاب والاستفتاء.
وتتولي لجنة عليا ذات تشكيل قضائي كامل الإشراف علي الانتخاب والاستفتاء، بدءا من القيد بجداول الانتخاب وحتي إعلان النتيجة وذلك كله علي النحو الذي ينظمه القانون.
ويجري الاقتراع والفرز تحت إشراف أعضاء من هيئات قضائية ترشحهم مجالسها العليا. ويصدر باختيارهم قرار من اللجنة العليا.
- مادة 93
تختص المحكمة الدستورية العليا بالفصل في صحة عضوية أعضاء مجلس الشعب.
وتقدم الطعون إلي المحكمة خلال مدة لا تجاوز ثلاثين يوما من تاريخ إعلان نتيجة الانتخابات، وتفصل المحكمة في الطعن خلال تسعين يوما من تاريخ وروده إليها.
وتعتبر العضوية باطلة من تاريخ إبلاغ مجلس الشعب بقرار المحكمة.
- مادة 139
يعين رئيس الجمهورية، خلال ستين يوما علي الأكثر من مباشرته مهام منصبه، نائبا له أو أكثر ويحدد اختصاصاته، فإذا اقتضت الحال إعفاءه من منصبه وجب أن يعين غيره.
وتسري الشروط الواجب توافرها في رئيس الجمهورية والقواعد المنظمة لمساءلته علي نواب رئيس الجمهورية.
- مادة 148
يعلن رئيس الجمهورية حالة الطوارئ علي الوجه المبين في القانون ويجب عرض هذا الإعلان علي مجلس الشعب خلال السبعة الأيام التالية ليقرر ما يراه بشأنه.
فإذا تم الإعلان في غير دورة الانعقاد وجبت دعوة المجلس للانعقاد فورا للعرض عليه وذلك بمراعاة الميعاد المنصوص عليه في الفقرة السابقة.

وإذا كان مجلس الشعب منحلا يعرض الأمر علي المجلس الجديد في أول اجتماع له.
ويجب موافقة أغلبية أعضاء مجلس الشعب علي إعلان حالة الطوارئ.
وفي جميع الأحوال يكون إعلان حالة الطوارئ لمدة محددة لا تجاوز ستة أشهر ولا يجوز مدها إلا بعد استفتاء الشعب وموافقته علي ذلك.
- مادة 179 تلغي
- مادة 189 فقرة أخيرة مضافة
ولكل من رئيس الجمهورية، وبعد موافقة مجلس الوزراء، ولنصف أعضاء مجلسي الشعب والشوري طلب إصدار دستور جديد، وتتولي جمعية تأسيسية من مائة عضو، ينتخبهم أغلبية أعضاء المجلسين من غير المعينين في اجتماع مشترك، إعداد مشروع الدستور في موعد غايته ستة أشهر من تاريخ تشكيلها، ويعرض رئيس الجمهورية المشروع، خلال خمس عشرة يوما من إعداده، علي الشعب لاستفتائه في شأنه، ويعمل بالدستور من تاريخ إعلان موافقة الشعب عليه في الاستفتاء.
- المادة 189 مكررا
يجتمع الأعضاء غير المعينين لأول مجلسي شعب وشوري تاليين لإعلان نتيجة الاستفتاء علي تعديل الدستور لاختيار الجمعية التأسيسية المنوط بها إعداد مشروع الدستور الجديد خلال ستة أشهر من انتخابهم، وذلك كله وفقا لأحكام الفقرة الأخيرة من المادة 189.
- المادة 189 مكررا 1
يمارس أول مجلس شوري، بعد إعلان نتيجة الاستفتاء علي تعديل الدستور، بأعضائه المنتخبين اختصاصاته.
ويتولى رئيس الجمهورية، فور انتخابه، استكمال تشكيل المجلس بتعيين ثلث أعضائه، ويكون تعيين هؤلاء لاستكمال المدة الباقية للمجلس علي النحو المبين بالقانون.




وهذا رابط تجدوا فيه اماكن الاقتراع






انت هتقول ايه؟؟؟


الأربعاء، 16 مارس 2011

فى المضيفه وستيته حسب الله الحمش والاجوبه والحلقه الاخيره

بالرغم من الالتفاف على بعض الاسئله 
وبالرغم من التزويغ من بعض النقط 
وبالرغم من نسيان سؤال هياكل نص الدرجات 
الا ان الاجابات بوجه عام مبشره وتستحق النشر ووضعها بين اديكم 

ستيته حسب الله الحمش فى المضيفه والقاء اكثر عن قرب 
كونوا معنا فى الحلقه الاخير

المجموعه الأولى

    

أسئله شخصية
-------

 ماهو  الأسم الحقيقى ؟
بزعل قوي لما حد ميعجبوش ستيتة..بحس إنه عنصري ومش مصري اصلي
بيفكرني بالمزز بتوع فير أند لافلي  اللي عاوزين يبيضوا
بيفكرني بإعلان بنحب مصر اللي بنسوان شعرهم أصفر وعيون ملونة ورابطين المنديل بأوية عند محمد عشوب
وحشة عائشة الكيلاني؟ مالها زينات صدقي؟ مالها ستيتة حسب الله الحمش
أنا معادلة من الدرجة العاشرة لدودو و دادي و ديدي
وكل حل للمعادلة له عزيز على القلب يقول ما يشاء
للاسف .. كل ده بلدي ومش عاجبني .. ماله ستيتة يا ناس
سوتيتة .. أجمل إسم سمعته في حياتي
أنا خايفة في شأن رسمي حد يسألني ما إسمك يا ولية أقول له ستيتة

 السن ؟
42 سنة وشهرين وسبع ايام

المؤهل ؟
دكتوراة الفلسفة في العلوم "ولا أعرف حصلت عليها إزاي أساسا" ثم ترقية لدرجة أستاذ مساعد "ويارازق الزهرة في حضن الجبل من فوق"
مش عاوزة أخد أستاذ..عاوزة محل كشري أو محل لانجري
وأرتاح بقى وأتنعنش
في المشروع الأول هات شيشة تفاحة للمعلمة هنا ياض .. هات قهوة المعلمة ياولا
في المشروع التاني مش ها أشوف غير ستات رايقة في الطراوة و مدام ستيتة راحت مدام ستيتة جت
مش عاوزة أذاكر تاني

أشمعنى لقب الحمش فى أسمك يعنى ما هو سبب الاختيار ؟
إيييييييييه ذكرتوني بالذي مضى
فين أيام ماكان الشعب المصري سيس آخر حاجة وطري وخرع
فين ايام ما كان ابن زكي بدر بيكلمنا بالكتف
ولا نظيف بتاع التنمية
ولا عز بتاع جيمي مفجر ثورة الغازات السامة
وكان نفسي اشوف للشعب اي منظر عفاريتي
كان نفسي الشعب كله يبقى حمش
ولا يخفى على عدالة المحكمة إني حمش جدا جدا جدا وكذلك كل الغفر بتوع علوم
حتى أنه لا ينقصنا الشنب والدقن ولله الحمد
معدلات التستستيرون عندنا مش طبيعية مع منخفض جوي في الأستروجين والبرجسترون
ولقبي في شارع بيت أهلي كان العسكري
يعني – ياحسرة – اللي ما لعبت مرة بديلي ولا عرفت مز قبل ما أعرف مزي الشرعي  .. أنا من ضيع في الحمشنة عمره ونرجو التعويض في الآخرة من رب العالمين
كان نفسي أنحرف بس اللي إنحرف خد طريقه من زمان
وسمعني سلام ما أندم عليك دمع الندم غالي
بهزر طبعا "الحمد لله الذي عافانا من بعض ما حرم .. وفضلنا على كثير من خلقه تفضيلا"

  أجمل كلمه بتحبى تسمعيها كل يوم ؟
كلمة صباح الهنا والفل من فنيي وسكرتارية وفراشين القسم مع ضحكة صافية بتعرفني إن فيه ناس بتحبني لوجه الله

كما إني مدمنةوبحاول اتعالج ولكن هيهات من كلا من
إحم إحم
يا نور عيني
يا حبيبة أزؤز
يا شقيقة الفؤاد
بس بقى يا كماحة


 أجمل موقف مر عليكى فى حياتك كلها ، واصعب موقف ؟
أجمل موقف مر عليا في حياتي كلها يوم ما أزؤز خد إيدي في إيده
لوحدنا
وانا أساسا مش بتكسف خالص
بس أول مرة ألمس إيد مز بقى
وطبعا معملتش زي فوزية في سك على بناتك
أنا إديته إيدي عادي كده ولا عصلجت ولا حاجة خالص يعني
وقلت له زي سمير غانم في حواديت وهو عامل ست زمان مع جورج
وديني لأوريك يا صبحي..اصبر عليا بس
ونزلنا لوحدنا
إخترت دبلة وخاتم بسيط ب 300 جنيه كشبكة وصممنا نتمشى رايح جاي علشان نتكلم
يوم صباحي جميل في مارس قبل خطوبتنا بيومين

أصعب موقف مر عليا
هم موقفين
موقف منهما مش ها أحكي عنه
وليس إنكارا لحدوثه ولكني لا أحب طرحه للعامة
أساسا أنا أحزاني مش مجال طبطبة
ومش بحب الطبطبة والصعبنيات
والموقف التاني يوم ميلاد إبني وقالوا لي إن مسيو عفرتو الحبل السري ملفوف على رقابته 3 لفات والراجل مش عاوز يشرفنا بطلعته البهية
مع ان قبلها بيوم كان كله في الكلتش والإشارة خضرا "عفرتو بقى"
وأول ما أفقت من البنج فضلت أقول فين إبني وأعيط كأنني ماما حنينة بحق وحقيق .. راحت الممرضة جابت لي بنت :)
وبعد ما صححوا المولود
بصيت للدكتور وقلت
أنا جعانة
قال لي تاكلي إيه يعني؟
قلت بط أو حمام أنا جعااااااااااااااانة


أمنياتك للأيام القادمه ؟
مصر
أمنياتي مصر الجديدة
بكل ما تعني هذه الكلمة
يا مصر الجديدة يا أفصل زي التلاجة
يا توفروا لي الكولة يا تبنوا لي بيوت
كل ما يعنيني الآن وما أخاف عليه هو مصر


بتحبى بعقلك ؟؟ طيب لو صح ياعنى إيه تحبى بعقلك ؟
أه بحب بعقلي
بس ده شيء لاإرادي
يعني مش بحب بعقلي علشان أنا عاقلة وشاطرة وبت التت الفت
بحب بعقلي لأن ربنا خلقني كده

والحب بالعقل يعني أول ما تشوف حد يعرف يزغزغ عقلك عينك تبص عليه
عينك بصت عليه الكيميا تشتغل بقوة 120 حصان
وتلاقي حالتك سودة وعامل زي البطة البلدي ومؤدب على غير العادة
وصوتك فجأة - ابن الكلب- مش راضي يخرج من حلقك
لأ وهادي بتشرب الشوربة بطرف المعلقة
تبص على نفسك في المراية تلاقي نفسك حلو
أمك حلوة
أبوك حلو
أم حنفي بتاعة الجرجير حلوة
ويجي ابوك يقول لك اعمل شاي تعمل قهوة وتسقيها لأمك
يعلى الدوبامين والنورإيبينيفرن والسيروتونين
وتعيش مع فضل شاكر الفاضلة إليسا
حلو كده؟ طبعا فاهمين وإجابات سهلة جدا
تضرب الهرمونات في سقف نفوخك تعمل على عينك سحابة
مجرد ما الكيميا تعود لمعدلاتها الطبيعية
وده بياخد وقت بلا شك
تحلل كل كلمة تخرج من بؤ المز/ المزة
ومع هذا التحليل تشوف إيه اللي ممكن تعاشره
وإيه اللي ممكن تتوافق معاه
وكم الأشياء المستحيل تتنازل فيها وإلا تكون إنت مش إنت
الشعلة موجودة لكن توافق الطباع بقى علشان لا نذهب للمأذون مرتين
المشكلة مش في التحليل
نو .. أبسلوتلي
المشكلة إن عقلي يسيطر على ما سوف افعله
يعني حتى لو قلبي بيصرخ وبيطلب من عقلي يسكت وينخمد
وبيحاول يديه رشوة مرسيدس
ولا يعبره ويشتغل لوحده .. ياخد القرار لوحده .. ينفذه .. ويترك قلبي ينزف ويبص له ويقول أسكت ياض عاوز تودينا في داهية
يووووه إن عشقنا فعذرنا أن في وجهنا نظر
قطيعة

لما بتبصى فى عيون الناس بتعرفيهم ازاى؟
منحة ربانية في معظمها
شفافية يمكن
خبرة متأخرة
لكن الأفضل من ناس بعرفهم بنظرة أو كلمة
ستر ربنا اللي مع الغلابة
الناس اللي بتاخد كل كلام الناس صدق حتى لو مكرهم تزول منه الجبال
ودول ولا بكتشفهم ولا نيلة
ربنا سبحانه بشملني بلطفه وستره ويقيني السوء وأهله بما شاء وكيف شاء
فالحمد لله على المنح الربانية واللطائف الإلهية


نصيحة في الحب ؟
الحب وردة رقيقة .. جميلة وبتلون حياتها وبتديها ريحة رائعة لكنها سريعة العطب .. بأقل كم من الإهمال والقسوة وعدم تفهم إختلاف الأخر الحب يروح في الكازوزة
الجرح البسيط في الحب بيؤدي لقطع الدم عن عضو المودة لحد مايجيله غرغرينة مع الأيام وتنفصم عرى المعرفة كلها
كثرة القسوة تعلم الجفاء
والحنية كلمة بسيطة وطبطبة ومش مكلفة ولها مفعول السحر حتى مع هرقل
اللي يلاقي نصه التاني
يعرف إنه أخذ كِفل من نعمة حُرم منها كثير من الناس
نعمة تستاهل الشكر .. وشكرها إنه يلبد زي القراض لحبيبه ويسعده ويفوت له ويخلي سرهما بينهما ويسيبه من تجارب الأخرين فلسنا متشابهين
الحب بمعنى التوافق الذهني والتوافق الحسي بيؤدي لإدمان الشريكين كلاهما  للآخر"حقيقة علمية"
قبل ما يدمنك المز أوعي تباني سنية أم كندوش وجعورة
إخفي عنه أسنان الفامبيرز مؤقتا قدر استطاعتك
بعد ما يدمنك ويدمن الكلام معك والتواصل الجسدي
دوسي ولا يهمك
عيشي .. اساسا إنتي بقيتي افيونته
وهو أصبح كذلك

 مظهر الناس ماذا يعني لكِ؟
يعني بداية صفة التعارف العلني
يعني اللمحة الأولى اللي بتقول لي الإنسان ده منظم
مبعتر
معفن
بوهيمي
صنفه إيه بالضبط
لكن في العموم لست طبقية..مظهرية لكن مش طبقية
وعلى رأي تحية كاريوكا في أم العروسة
هي الست إيه غير خط شراب ماشي عدل

التخصص دكتورة ولا طبيبة ؟
دكتورة ع الدرجة الرابعة والناس درجات
ومرشحة أبقى معلمة كشري والزبون يوريني الجنيهات


ليه حضرتك أخترتي الإسم ده بالذات ( ستيتة وليه الحمش)؟
I adore the name sotaita
كفاية إنه خلى لي صحاب حلوين زيكم وعندهم نفوخ
والحمش تم الإجابة "ينظر الجزء أ من السؤال الأول"


  بتعرفي تعملي كشري ؟ وايه سر الصنعة يمكن نفتح فرع عندنا بالقاهرة ههههه؟
طبعا بعرف أعمل كشري
بس هو المعلمة بتطبخ في المحل
أمال الصبيان إتعملوا ليه؟:)
حسب أقوال العلماء وخاصة إسي حسبو إن نفس عائلتنا لا يضاهيه أكل
المشكلة مش في النفس
أنا أساسا بكره جدا كل الأعمال المنزلية
وأقوم بها فقط لأن ده جزء من واجبي تجاه العولمة
ومش بحب خالص حد يكلمني عن الأعمال المنزلية ويكأنها معادلات رياضية
الأعمال المنزلية تافهة جدا
مرهقة جدا
جزمة جدا ورتيبة ومملة
وبكره النسوان التي تتباهى بها من باب ان القرعة محليتهاش حاجة تانية تقولها
وبالمناسبة لي صديقة بتأكل الناس كلها كشري
وخوتتني بحرفيتها
ولقيتها بتعمله زفت
واضح إن أكثر النساء تباهي بمقدرتهم المطبخية أساسا ملهومش فيها
شفت منهم كتير والله
وأصبحت قناعة عندي
اللي بتحب تتكلم كتير إن ملهاش مثيل .. ملهاش لزمة


لو ماكنتيش بقيتى دكتوره فى الجامعه كنتى نفسك تكونى إيه مافكرتيش تشتغلى فى الصحافه عمرك ؟
الصحافة ده كان حلم بس اتعينت
اتجوزت
سجلت ماجستير
حملت في بنتي
خلفت
رقعت بالصوت لحسب الله واليوم الي شفت فيه حسبو
تاني حلم .. مضيفة طيران.. كنت ها أبيض وأكون مضيفة طيران
ألف العالم وأصيع ومحدش يعرف يمسكني كما القرموط
بس لبست الحجاب فطار الحلم .. ومش ندمانة


 أزااااااى قدرتى تعيشى فى بلد مافهاش بحر هههههههههههههههههه ؟
عاااااااااااااااا يا شريرة .. ولا ها تغيظيني
"مارو" وعدتني بشوقة جنبها وها نعيش حياتنا
مش كده يامارو؟ .. يقطع الشغل وسنينه
بالمناسبة يوم ما جاء لي التعيين مكنتش عاوزاه قوي
كنت عاوزة أفضل مع أبويا في بورسعيد واشتغل في التجارة
بس هو صوت بالبلدي إبن سلطح بابا
الراجل ده عذبني بالإبتزاز العاطشفي والتعذيب الإستجدائي
هو الي خلاني أحول من أدبي لعلمي
وهو السر وراء قبولي التعيين والتخلي عن التجارة اللي هي تسعة أعشار الرزق

إيه أكلك المفضل ؟
صلوا ع النبي
أنا من الناس التي تعشق أكل السواحلية بلا تمييز "وده متوقع" وجميع انواع الحلو وخاصة الكنافة النابلسية اللي أكلتها من واحد سوري في الخفجي ولا أنساها
المحشي الصواني الطوجن الكوارع الضاني ما أقولش لأ بشرط مش أنا اللي أعملهم
لأني مجرد ما بتعب في حاجة بزهدها ونفسي بتتسد عنها
وبالطبع كما تشاهدون أعزائي المدونين عندي زيادة في الكوليسترول متوقعة ومحسوسة
ومش بتعالج لأني بكره الدكاترة ولا أقدر قيمة العلم ومش باخد دواء
مما ينقلني لفئة قد تفلسع عاجلا غير آجل إلا أن يشاء الله

إيه أكتر حاجه بتضايقك وتحسى انك مش مركزه بسببها ؟
قلة الأدب .. أقدر بفضل الله أرد على كل قلة ادب بالمثل
لكن لا بحب ولا عاوزة أشوفها ولا صاحبها المريض وعديم رباية من حيث المبتدأ
والفساد وده في كل شغل يزكم الأنوف

إيه سبب حبك لكظومه ؟
كاظييييييييم .. إلا كاظم
قولي أحبك كي تزيد وسامتي فبغير حبك لا أكون جميلا
راجل بيقول الكلمتين دول بسهوكة
يالهويز
كاظم الساهر الفنان الحي الوحيد اللي أقعد اتفرج له على حفلة كاملة ولو حد قاطعني يبقى ربنا معاه
ورغم إن كاظم نفسه لا رومانسي ولا مخلص ولا نيلة
لكن وانا مالي هو أنا ها أناسبه؟
أنا يهمني المعنى والإحساس والطيران وأنا بقول الله يا كاظييييييم


 لو أتعرض عليكى وزاره ممكن تختارى وزارة ايه تقدرى تنميها وتفيدى فيها؟
مش ها أختار أبدا
منصب لا أحبه ولا أطمح إليه
أوله فرحة لعبدو مشتاق
وخوف لمن يتقي الله
ونهايته حزن لأهل عبده مشتاق
ومن يخاف الله
وكده كده يتفرغ الإنسان بعد سنتين تلاتة حروب قذرة وهلاك
لتبرير كل قرار أخذه وسبب خروجه ولا يعود إنسان طبيعي ببساطة
وبعدين أنا ناقصة ذنوب
ده أنا لسه بقول النهاردة الجنة ونعيمها يارب
لقيت نفسي بترد على نفسي إتنيلي عملتي لها إيه

أكتر أسم فى البنات بتحبيه و كمان اكتر أسم بتحبيه فى الولاد؟
البنات .. يا سلام .. يا سلام
أنا بموت في اسماء البنات المدلعة
ماهي
ليديا
شهد
الصبيان بقى مش بحب اسماء متدلعة
بحب إسم دكر بس ببامبرز
أحمد ومحمد ومصطفى ودياسطي وبرعي وسراج..ماله سراج؟


 بتميلى فى أمومتك لتربية البنات ولا الولاد أكتر ؟ وليه ؟
البنات وأظن واضح جدا
البنات ألطف المخلوقات
وتحسي بتعاملي شخص ناضج من بدري مش متخلف عقليا
إنسان عقلاني وكله توك وفساتين ومكياج من وهن نونو
لازم رووووووج
ودلع روحي دلع
وللحق أنا خلفت بعد بنتي – رغم إني مش بحب الأطفال اساسا - لسببين
أولهما إن حسبو كان عاوز عيل من اي نوع علشان مانوسة متكونش لوحدها
وعلشان ظننت إن كل الأطفال مثلها .. كربون
فجاء لي صاعقة الصحراء ربنا يخليه ويهديه ويصلحه


أرسلت جارتك ابنتها إليكى والحاصلة على مجموع كبير بالثانوية العامة والتى تراكى مثلاً أعلى لها وتريدك ان تملئى معها استمارة الرغبات ، هذا وقد أوكلت إليكى هذه المهمة بشكل كامل ، انتى لا تعرفين الكثير عن امكانيات هذه الفتاة ولكنك من وجهة نظر عامة و مهتمة بالشأن العام سوف تنصحينها بأن تكون أول رغبة
أولا ها أبدي عجبي لأن مليش علاقات بالجيران الستات أكثر من صباح الخير
ومليش في دخول البيوت لأي سبب كان
ثانيا ها أبدي دهشتي من إن أم وبنتها يربطوا كل القادم من العمر باختيار واحدة غريبة لمجرد إنها كذا وكذا وكذا اللي في السؤال
ها أقعد معها واحتسب أجري على الله لحد ما أعرف نفسها في إيه؟
بتحلم بإيه؟
وحتى لو الحلم في معاميعها الداخلية أشجعها تطلعه طالما أمها هابلة
لن أنصحها مطلقا بنصائح تقليدية من باب الكليات العملية ذات مستقبل باهر ومصر محتاجة التكنولوجيا والعلم في المرحلة القادمة
مؤكد مش ها اقول لها الولية ملهاش غير بيت جوزها خدي لك اربع سنين اي نيلة وأخلصي وحافظي على عينيكي وجمال بشغتك علشان الزبون يشيل بسرعة
ها أشجعها تحلم طالما مجموعها يساعدها على الحلم
الحلم ها يفيد البلد منها إن شا الله تدخل معهد القطن وتطلع دودة
ولما أعرف بتتمنى إيه وقدرتها النفسية والعائلية لحد فين ها أنصحها بلا أي فرضية
ومش ها أحط إيدي في رغباتها اساسا
تروح تقعد مع نفسها وتدلدق كلامي في راسها وتختار إختيار حر ها تدفع ثمنه لوحدها ما تبقى من عمرها

من خلال كتاباتك فأنتى خبرتى الدنيا جيداً من بين صفحات الكتب ومن مستحدثات العصر من انترنت وخلافه ومن خبرات حياتية مختلفة ،كنتى تسيرى بالشارع فاستوقفك إعلان عن انعقاد ندوة بعنوان ( المرآة ف الأسلام ماضِ عريق ومستقبل مشرق ) يلقى الندوة فضيلة الشيخ / فلان وفضيلة الشيخ / علان ... الخ ... قررتى الحضور ... ركزتى جداً ... دماغك تكوينها علمى بحت ومنطقى تسلسلى يتبع الاسلوب العلمى ف التفكير -ولو كان الدين بالعقل لكان المسح اسفل الخف اولى من المسح اعلاه - فوجئتى بأن المشايخ سالفى الذكر اقروا بحرمانية عمل المرأة الا فى ظروف معينة ، وان الزى الاسلامى الشرعى هو النقاب ، الكلام كان علمى ومنطقى وبه جزء كبير لا يمت للعقل بأى صلة ، إتخذتى قرارك بالآتى ( .................. ) ؟
المعطيات كلها غلط
رغم جودة صياغة السؤال والحرفية في وضع الكلمات المتراصة التي لا أنكر إعجابي بها
المعطيات خاطئة فكيف أعطيك عليها نواتج تفاعلية
أنا لا أحضر محاضرات ببوسترات في الشوارع
ولا أحضر تحديدا لفضيلة الشيخ فلان وفضيلة الشيخ علان
ورغم أن أصحاب الفضيلة بينطوا عندي دلوقتي في كل وقت تلفزيونيا
لكن لا أسمح بالقفزات دي
ليه؟
لأن واحدة زيي عندها 42 سنة مش لسه ها تتخذ في العلم اصحاب فضيلة
هي سمعت من زمان وعرفت منهجها ولزمت
وبصراحة صاحبة العقلية العلمية لا تتاثر بالصراخ تارة والعواطف والبكائيات تارة
مع إن مفروض الدين بيمس القلب
بس سبحان الله حتى في دي لا أسمع إلا من يحدث عقلي بلا أي مؤثرات صوتية وحركية
ويفقد مكانة كلماته ومعناها عندي – عكس كل المصريين – كل صحاب فضيلة بيستخدم المؤثرات
وعليه فأنا لن يجدي معي كلمة عجيبة جدا ألا وهي الكلام علمي ومنطقي ولا يمت للعقل!!!!!
ده على اساس إننا مسلمين بالتبعية ولا مسلمين عبيد لرأي فضيلته وفضيلته؟
العلمي عمره ما ينافي العقل يا صاحب الصياغة الذهبية
وقصة المسح على الخف هي الإستثناء في ديننا وليست القاعدة ابدا
فمن تلبس النقاب تلبسه بدليل من القرآن
ومن لا تعترف بفرضيته تستند لنفس الدليل من القرآن
والحمد لله الذي جعل دينه سهل الفهم والتأويل والترجمة والتفسير
وديننا ليس به اسرار ولا شيء لا يستطيع العقل إدراكه
وإلا ما أصبح صالح لكل زمان ومكان حتى قيام الساعة

المعطى الكبير قوي .. الزغلول الكبير يعني
قصة سمعت ولقيت تقعد في بيتها وتنتقب وربط ده بقصة المسح على الخف
فضيلة فلان وفضيلة علان ليس عندهم منبع العلم الوحيد
ولا المذهب الوحيد
ولا الرأي الفريد
ولا حد اساسا بيكتشف في الدين جديد
كله موجود ومن زمان وفضيلته على قناعة فبيبرزها ويبروزها ويحليها
ولا يذكر غيرها إلا باستنكار وتجريح
أنا شايفة ان كلنا حزب الله مع إختلاف الحجج والمذاهب
 والحقيقة إني زي ما قلت عرفت ولزمت من زمن
ومقتنعة بأصحاب الفضيلة اللي انا على رأيهم
مع إحترامي لأصحاب الفضيلة اللي أنا مش على مذهبهم
وبفضل الله أملك حجج النقاش واللي لا أملك حججه
النت في ايدي
عقلي في راسي
مطوتي في جيبي
اللي يجادلني بالتي هي أحسن أترك المراء معه طمعا في بيت في الجنة

ما من أحد منا الإ وقال هذه الجملة ( بس لو الزمان يرجع تانى ) وغالباً لا يرجع الزمان ولكنها تقال عندما نكتسب خبرات جديدة وتصقل خبرات اخرى وتزداد نضجاً للتعامل مع معطيات هذه الحياة فنكتشف اننا لو كنا بخبرات مثلاً سن 30 سنه فى مواقف حدثت ونحن فى سن 18 سنه لختلفت قرارتنا كثيراً ، ولكن نحن فى عالم افتراضى ، وانتى الأن سنك 18 سنه وبخبرات سنك الحالى وسوف تقومين بالآتى : ( .................... ) ؟
ها ارضى بكل المقسوم
ها أكون أكثر حلما واسايس الناس شوية
لن أخسر إنسان حتى لو مختلفة معه وأنا على حق لأني كنت حادة جدا في الصغر
ها أكون مكارة بقى وها أتفادى كل قلم خدته لبراءتي

العجيبة إني حتى لو صغيرة بنفس عقلي دلوقت ولا قرار كنت ها أحيد عنه
ها أتجوز نفس جوزي
ها أكمل نفس شغلي
ها أصاحب نفس الصحاب
والحقيقة أنا لا أتمنى رجوع يوم واحد في الدنيا
ولا يوم مهما كان سعيد
تعبت من الحياة الدنيا
وأرجو أن يحيني الله حتى أتم رسالتي مع ابنائي
ثم يتوفني وهو سبحانه راض عني ومحسن لي الخواتيم




المجموعه الثانية
أسئله تدوينية وسياسية
----------
 بتحبى تقرى أي نوع من الكتب؟
في هاذوه المرحلة السنية أحب الكتابات السياسية
ولكن في مراحل سابقة كنت أقرأ كل شيء من قصص عبير
لورقة جرنان ملفوف فيها بيض
لكتب دينية
لروايات
كنت أعشق القراءة وتحلو قوي في عيني أيام المذاكرة طبعا

هل لكى هوايه اخرى غير الكتابه؟
دلوقتي لأ
الحياة تزدحم واليوم يتسرب من بين اصابعي
لكن بخطف ساعة غصب واقتدار وأروح البيسين وأعوم
بحب السباحة بس منين أجيب ناس لمعناة الكلام يتلوه

  بتكتبى امتى و اذا كانت الكتابه بتخليكى مقصره مع أولادك ولا لاء بما انك أم و مرأه عامله؟
بكتب بمزاجي
وكل حاجة في الدنيا فيما عدا واجباتي الأساسية بعملها بمزاجي
أنا زي البحر موجه شويه عالي وشوية مستوي
لي راي شخصي إن كثرة المهام تخرج مني أفضل ما في
يعني إديني أجازة أديك نكد
في الأجازات بكون عاملة زي أنثى العنكبوت
لا أعاشر مطلقا
إديني شغل كتير أتهد وأحل عن سماء المحيطين
فيه ناس كده
بقصر مع ولادي؟
عادي
بقصر في كل حااااااجة بلا تمييز عنصري
بس اساسا إحنا بيت خاص جدا
لو حد غيرنا عاشرنا يا يجننا يا نجننه
يعني ولادي مستقلين جدا ولهم مهام في البيت
لو مخلصين اللي وراهم كل واحد منفرد بشيء بيحبه
بيتنا لا يوجد به ضجيج او صوت عالي مع إن اصواتنا اساسا جهورية بالسليقة ولكن كلامنا قليل
معندناش واحد في البيت يقعد مكانه ويطلب ماء أو شاي
شافوني وابوهم ماشيين اليوم بجدول ومحدش بيهرب من إلتزماته ولا يرميها على التاني فحتى لما بيعيلوا .. بتكون عيالية مقبولة مش ماسخة
إحنا بيت يميل لليبيرالية
نحترم حرية التعبير
وحرية الفعل مالم يضر ويؤثر على المستقبل تأثير غير مردود
وحرية الحياة
وحرية الخطأ اللي بيخليهم يقولوا كان عندكم حق بدون لوم منا ولا كسوف منهم
عمري ما فتشت دولاب ولا درج لولادي .. لا صغيرين ولا كبار
هم كمان لما يشوفوا أصدقاءهم مخنوقين من أهلهم بيقدرونا قوي وبيقدروا الحرية اللي عودناهم عليها
أجمل ما أسمع منهما الحمد لله إنك ماما.. مش ممكن ابدلك بأم تانية
ده فيه أمهات غريبة تصوري مامة فلان بتعمل .......... وأسمع قصة قمعية عادية جدا في بيوت المصريين
مفيش حاجة اسمها أعمل أكل وحد يقول مش بحب
يولع
وعليه معندناش الكونسبت ده اساسا
نأكل – أغلب الوقت لنعيش - والعكس نادر جدا
مش بأنضف ابدا .. جسديا لا استطيع
بس بعد ما الشغالة تنضف
البيت كله وبلا إستثناء بيحافظ على النظام والنضافة
يعني بيتي لا يحتاج إعلام حتى يدخله ضيف في أي وقت من الريسبشن للحمامات
العيال متعلمين ان بابا وماما لهم حقوق
وده ناتج طبيعي ان هم شخصيا لهم حقوق
فالحمد لله عند حقوقنا لا يمكن يقولوا رأيهم
لأن عارفين إن في حقوقنا ملهومش رأي أساسا
شغلي خط أحمر بل حيطة حمراء على راي عصام شرف
شغلي ده مزاجي وشرفي واستقلالي والمكون الأول لشخصيتي
أنا لا يعنيني موافقة العالم على عملي أو العكس
مفيش حد بيترك كل شيء ولا يدرك كل شيء
ومليش خالص في أمينة رزق ومن أجل ابنائي ولازم أضحي وأعرف الناس إني مسحولة وبضحي وابكي واتشحتف
ونظام المصريين بتاع ياهانم الست وظيفتها ع المدفع برررررررم ده عند أمه ياأدهم
بس أهم شيء أكون انا واللي حولي سعداء راضيين وربنا يرضى عنا ويصلحنا ويجعلنا للمتقين إماما
 يقيني إن كل واحد منا - في المجتمع كله - يقوم بالحد المعقول مما عليه
دون الإخلال بوظيفة تودي في داهية


امتى هيبقى فيه تجمع تدويني قاهري عشان أشوفك؟
اللقا نصيب
يارب قريب ان شاء الله
يشرفني لقاءك من قبل من صاحب التعليق


 ليه مش على الفيس بوك؟
مش بحبه
ليه؟
معرفش
بس بيني وبينه تضاديات
دمنا مركبش على بعض
عاكسني كتير وقلت له يا سم يا دم
بحب المدونة
وبهيس على تويتر
وكل عام وانتم بخير


بتتعاملى ازاي مع الناس دلوقتي في حالة تضاد الآراء دي هل بالصمت ولا بالمناقشه والاقناع؟
قبل ما اقابل حد أقول مش ها أتكلم
ومجرد ما ألاقي شيء غلط بيتقال أنط في كرش اللي أمامي فورا
نفسي أتعلم السلبية
والله مش بهزر
ياما رحت إجتماعات وقررت أقعد زي الكرسي
وها تغيري إيه يعني؟
وإيه لزمة حرقة دم ببلاش؟
وكل الكلمات الحلوة
كلمة واحدة بس فيها ظلم أو فساد أو إهدار حق حد صغير ونسيوا يوم ما كانوا في مثل عمره ومسحولين
خلصت
يا أهلا بالمعارك
وكل اللي قلت لهم مش ها أتدخل بيضحكوا علي
أوغاد

ماشاء الله حضرتك متابعة كل حدث ولازم كل شوية بوست جديد دا مش حسد على فكرة بس بتقدرى توفقى ازاى بين وقتك ومتابعة المدونة والتعليقات ونشر البوستات وكمان ماحستيش فى فترة من الفترات بملل من التدوين ؟
اليومين دول مش طايقة التدوين
بس بالمناسبة مش طايقة مصر كلها يعني
كل شيء حولي بيقول اننا اساسا لا نستحق التغيير لأننا ببساطة مستكترينه على نفسنا
طب لما إحنا مستكترينه
غيرنا يديه لنا سهل إزاي وهو يضر بمصالحه والبلع اللي بيبلعه في كرشه؟
في نفس ذات الوقت تخرج علينا جماعة الإخوان المسلمين بابتسامة من الودن للودن
لأ وإيه يا ولاد
نعم للتعديلات الدستورية
ليه يا جماعة
من أجل الإستقرار
طيب
لا تعليق خالص
هي شكلها كده

ايه رأيك فى القانون الموحد لدور العباده وايه البنود اللى تحبى تأكدى عليها فى الدستور الجديد ؟
أنا مع قانون ينظم بناء دور العبادة
وبعدين أنا لي رأي خاص
المسيحين في مصر حلة برستو
بس في نفس الوقت أذكياء جدا ومنظمين صفوفهم
وتنظيمهم ده سنة كونية لأي مجموعة شعبية تقل عددا عن المجموعة الأخرى
دي حاجة معروفة حتى لو الفئوية خارج نطاق الدين
أول ما نفتح قصة بناء دور العبادة – ومسيحي مصر أغنى من مسلمينها بمراحل – ها ينشئوا ألف كنيسة ألفين تلاتة آلاف عشرة آلاف
طب ومين ها يصلي فيهم؟ مش قصتنا دلوقتي
دي حالة ضغط من زمن ولازم نظرية الأواني المستطرقة تلعب دورها
وطبعا المسلمين هم كمان هجوووووووووووم
أفقر لكن أكثر عددا
هجوووووووووووم مضاد
أنصروا الله ينصركم
الأراضي ها تولع في سباق "أحسن وحوش" اللي ها يحصل
وتبقى حاجة فل خالص
أنا مش بقول المسيحين ها يفضلوا في وضع الحلة البرستو
بالعكس لو كنا شعب ناضج كانوا ها يقدروا لكل أمر حجمه
لكن خوفا من رجوع القرارات التعسفية ها ينشئوا لهم وللأجيال القادمة بزيادة
ومصر لأنها رائدة التقدم الدولي
اللي معدي فوقها بالطيارة مش ها يعرف يشوف الأرض من المآذن بأهلتها وصلبانها
بس هل ها يلاقي جنبهم مصانع حديد وصلب وسيارات وغزل ونسيج وميكروبروسيسورز؟
طيب .. تفتكروا الحشيش والبانجو ها يرطرط ومش ها يلاقي مواطنين يتعاطوه من كتر الصحوة الدينية ماشاء الله؟
نظرا لأننا شعب اسم الله على مقامكم متدين أخر حاجتين تلاتة يعني زي ما انتم عارفين..هات يابني الزبيبة

وعليه أنا مع تنظيم بناء دور العبادة بكل ما تعني الكلمة من معنى
والأخذ في الإعتبار عدد أديرة مصر ومساحتها وكله كله يا معلم
شفافية بقى وإديني عصر بلا توازنات خفية وأنا أحبك يا ننس

يا جماعة العنصرية الدينية لا بتعلي اصحاب ديانة ولا بتحول التانين عن دينهم
المواطنة مهمة جدا ومش عاجبني خالص اللي احنا فيه ومكتئبة من شعار ارفع راسك فوق انت قبطي
لأني ممكن أنا كمان أرد وطظ في مصريتنا
اسكتوا بقى لحسن انا كارهة الأحداث وما يتفتق عنها

عاوزة الدستور الجديد
مساواة .. حرية .. عدالة إجتماعية
عاوزة تحجيم لدور الفراعين
عاوزة نضافة بالغصب
يعني الوسخ يضطر يبقى نضيف لأن معندوش أوبشن تاني غير المقصلة


ماهى رؤيتك لشكل مصر القادم من الاحداث الان تفائل ام تشائم ؟
بنقلب الشراب
بنلبسه ع الضهر
سنة أولى نصب
على رأي مسرحية محمد صبحي في تخاريف
طالما معاه "الكرسي والميكروفون" يكلم شعبه الصبور المهاود
اللي خلاك تعيط على حسني بعد كلمة "ويعز علي قلة من بني وطني"
يخلي اي حرامي نصاب أجندة من بني وطنك يلعب على محاسيسك واستقرارك
حاسب ياض على استقرارك ولاغاليغك
تقدر لو معاك جبلين دهب تقول كفاية كده وأعتزل ومش عاوز التالت؟
رد وانت تعرف الموقف فين بالضبط
لم يكن يحكمنا فرعون والمعاونين سحرة فرعون ياحبايبي
كان يحكمنا بهامان وجنودهما
بس كده

ما العمل  في موضوع الدستور اللي مش عاجبنا و عاوزينه يتغير في حالة اذا لم يرضخ المجلس العسكري لطلب صياغة دستور جديد ؟
مش ها يرضخ
واللي شايف التعديلات الدستورية كافية يقول نعم
واللي سمع مصر النهاردة السبت 12 مارس ها يعرف إن الإنتخابات البرلمانية بعد الإستفتاء وقبل الرئاسية
وإن كل شيء عندنا "مش ممكن" أصبح ممكن في تونس
لغوا أمن الدولة عادي خالص
لغوا الدستور وعملوا لجنة تأسيسية بسهولة خالص
حظروا حزب الرئيس وألاضيشه زي السكينة في الحلاوة
حطوا وزارة تسيير أعمال ورئيس مؤقت بلا أي طنطنة عن الفراغ الدستوري
معندهمش مستحيل وإحنا بتوع الإستكرار
زي إحنا بتوع الأتوبيس بالضبط
طالما فقد الشعب طولة النفس
إنسى يا عمرو
ده الشعب النهاردة بيطالب بما يحدث أكتر من المجلس العسكري
ياعم فكك
تشرب شاي بالياسمين؟

هل يعني اني لما اروح ارفض التعديلات اني بكده اقر الدستور القديم و لا نضطر نوافق مع العلم ان فيه اشياء مرفوضه و لا ما نروحش خالص الاستفتاء و نمتنع لاثبات الموقف ؟
معرفش أساسا
اللي أعرفه قلته
مع العلم ان خيري رمضان سأل اللواء شاهين عضو المجلس العسكري النهاردة عن الدستور المعطل هل تم إلغاءه
قال لأ طبعا
يمكن تفعيله بقرار من المجلس العسكري
سمعني سلام
قراري رايح رايح قراري جاي


وجهه نظرك ازاي نقدر نطور منظومة التعليم الفاشلة اللي بتخرج واحد حافظ مش فاهم و ايه انسب نظام تعليم نقدر نطبقه عندنا في مصر في ظل الاحوال السيئة للمدارس؟
مش كيميا أصلا لسبب بسيط
نحن تخلفنا حتى أستطاع غيرنا اختبار عشرين منظومة تعليمية ناجحة
نستورد واحدة منهم ونبدأ "دون وضع لمستنا المصرية التخريبية عليها"
استوردنا نظام الساعات المعتمدة في الجامعات المصرية وخربناه
لا طلنا النظام اللي كنا إحنا بنتعلم بيه وأحسن مائة مرة
ولا خدنا الساعات المعتمدة كما هي لأن إمكانيتنا لا تسمح

استوردنا نظام الجودة العالمي وأيفناه
وبعيد عنكم وعن السامعين
الله يخرب بيت الهنود الحمر واجتماعات الهنود الحمر وسبوبة الهنود الحمر

التعليم نستورده بدون الكلمة القميئة نحن شعب له خصوصية
إحنا شعب مهلبية
يعشق الديكتاتورية
لا يمكن يعترف بنجاح النظام الأمريكي وإلا ينشيء جيل يحاور ويعرف ويتحدث بحرية ويتصرف كما يملي عليه ضميره وحريته الشخصية

طب ما نستورد الياباني
وإن فاتك الياباني مش ها يرجع تاني
أهم شعب كلهم مثل وقيم وآخر انضباط
دي اليابان حركت محور الكرة الأرضية عشرة سم بحالهم مش ها تحرك عقول الحجر اللي ربنا بلاها بيها؟

كمان بما إني بحلم بحريتي
أطالب فورا بتعيين كل عاطل حامل ماجستير ودكتوراة في أي تخصص
كمدرس بالمدارس الإبتدائية بحد أدنى للمرتب 3 ألاف جنيه
حامل ماجستير ودكتوراة يعني باحث يعرف إزاي يدخل لطفل يعلمه يبحث عن المعلومة ولا يحفظها
ليه علاقة بالثورة التكنولوجية وها يعلم العيال عن طريق الأبحاث مش كتاب ابن زكي بدر اللي يفطس من الضحك
حامل ماجستير ودكتوراة يعني ها يثقف العيال قبل ما يعلمهم مناهج عقيمة
تعرفوا عدد حاملي الشهادات العليا اللي قاعدين في بيت بابا؟
تعرفوا يعني إيه حد أدنى محترم للمرتبات ويخليه داخل الشغل نشيط إزاي؟
تعرفوا لما أديه المرتب ده وألاقيه بيدي دروس خصوصية أعلقه منين؟
البلد اللي حامل شهادة عليا لا يستحي فيها إنه مدرس إبتدائي هي بلد على أول خطوات التغيير الفعلي


لاحظت ان هناك ميل للراحل انور السادات عن الراحل جمال عبد الناصر ياترى ايه سبب الميل دا هل هو لشخص ام لحقبه زمنيه ؟
لا الراحل الأولاني جوز خالتي ولا الراحل التاني جوز أمي
ولا السادات الأهلي وعبد الناصر الزمالك
أنا حللت الموضوع ده في بوست الخالد والمؤمن والمزمن


انا من الناس اللى بتحب هيكل وبتشوف دايما قدرته على التحليل بشكل منطقى مع وجود الكثير من الدلائل معه لمعاصرته اكتر من فتره مميزه فى تاريخ مصر حاسس كدا بخلاف دائم من نحيتك مع هيكل ياترى ليه وبتشوفيه ازاى ؟
مش بشوفه اساسا
أنا حرة
هو سؤال واحد بس
لو كان هيكل في عهد مبارك المزمن
في نفس المنزلة التي وضعه فيها عبد الناصر
يصحى من النوم يسترشد برأيه النميس في الأحداث والبشر قبل الحمام
ياترى كان ها يقول إيه ال 30 سنة اللي فاتوا والكام سنة اللي باقيين في عمره؟
يرجى مراجعة هيكل ناصر أيام ناصر في الأهرام
حتى تفهم رأيي في هيكل بعد ناصر
وأخبار التحقيق مع إبنه في تهم فساد إيه؟
عند هيكل وكلنا نفتكر لاتزر وازرة وزر أخرى

الاحياء برضو علميا هي البيولوجي مش كدا؟
أه هي

ايه اكتر مدون بتحبي تقريله وبتحترمي فكرة ؟
كل اللي حطاهم عندي في الليست مهمين
ومن فترة شيلت كل لينك حطيته مجاملة
وبطلت أعمل أي شيء يستلزم مجاملات
المشكلة اليومين دول
كل ما أقرأ أتضايق فبقلل القراءة علشان كده ها أمرض فعلا


أكتر مدون بتحترمية لكنك مختلفة معاه؟
د. إسلام مدونة ها نعيش يعني ها نعيش

 انا ملاحظ ان طريقة كتابتك اتغيرت فجأه ، للاحسن طبعاً بس انا اظن ان وراء هذا تغير فى القراءه نفسها ، يعنى بداتى تهتمى بنوع معين من الكتابه ، بدأتى تقرى لحد معين كتير الفتره دى ... هل تستشعرى ده فعلا ولا لأ ولو لأ يبقى انا بلغتك اهه ، ههه ، بس ايه السبب ؟!
مجاملة لطيفة لأني بكتب زي الزفت
وخاصة الشهرين دول
بكتب من غير مزاج خالص
ساعات انظر لما كتبت سابقا وأبقى عاوزة أمحو الشهرين دول خالص
شكرا لعينك هي اللي جميلة


هل لو مسكتى رئاسه الجمهوريه ممكن تعملى شئ ايجابى للبلد ولا اللى على البر عوام؟
اللي ع البر عوام طبعا
بس وعد لو مسكت شيء في البلد دي
اعاهد الله أن لا أفسد ولا أساعد على فساد ولا اصمت على فساد وإن كلفني حياتي
وإن كان الفساد أطنان
لا يأكل أبنائي حرام أبدا ولا يدخل بطني قرش حرام
أشتغل كل ساعة فيما عدا ساعات النوم ويوم واحد راحة في الأسبوع علشان أشحن
لا أنقطع أبدا عن الشورى والإسترشاد برأي الناس العادية
وعمل استطلاعات جودة أداء وأضعها دائما نصب عيني
وأن لا أقرب كل "حبوب لذوذ بطانة سوء" ولا أبعد "أهل الخبرة والتكنوقراط :)"
أحضن أهل بلدي وخاصة الغلابة وأدخل بيتهم مش خايفة
وإن حد عمل مؤامرة لقتلي أحتسب نفسي عند الله شهيدة وأجدد النية
ولا أمشي أبدا بحرس ما استطعت
وإن أجبرت على الحرس لا أجعلهم يدفعوا الناس من طريقي
وأن أنهي مواكب المسئولين نهاية تامة
كل مسئول آخره موتوسيكل ولو مش بيعرف يركب موتوسيكل زيي كفاية قوي عربية صيني 900 سي سي لو عاجبه
ولما يركبوا الصيني ها يشتغلوا ع الطرق والصرف الصحي والكهربا وكل المرافق الحيوية علشان العربية تعمر معاهم وميضطروش يتشعبطوا في الأتوبيسات
لن أختار مسئو غني حتى لو كفأ
مع احترامي له ها أختار متوسط الحال ذا الخبرة علشان يكون عنده شعور ودم وارتباط بالناس
وأن أختار بشر تقدر قيمة الشعب اللي خلوا لي ولهم قيمة بين العباد




المجموعة الثالثة


سؤال بيت المدونين

من حقك تختارى مدون يكون ضيف الحلقة الجايه  فى مضيفة بيت المدونين

- تحبى تختارى مين ؟

 
ممكن رأفة بحالي يختار بيت المدونين
يعني ده سؤال يدخل لجنة رأفة وغصب عن اللجنة ها أخد الدرجة لأني مجاوبة الإمتحان كلو كلو كلو
أنا كل الناس أصدقائي وكلهم أحب أعرفهم عن قرب
وكمان البعير هلك هلك هلك

اللي ها يكمل قراءة الإجابة دي يبقى إنتحاري وها أجيب له بونبوني شفيق بلا أدنى ريب
ده مش بوست
دي عريضة
دي معلقة
علشان تحرموا بس تفتكروا إن مستر إكس ممكن ينتهي

شكرا لبيت المدونين على استضافتي
وشكرا للاسئلة القيمة واللطيفة جدا جدا جدا
تحياتي للجميع

الاثنين، 14 مارس 2011

ستيتة حسب الله الحمش فى المضيفه وعلامات استفهام ؟؟؟

ستيتة وهى مزنوقه ربنا ما يوريكم 
بذنب الغلابه المساكين اللى بتطلعوا عنيهم فى ام الكليات دووول 
وبتهبدوهم اسئله ليس لها اى اجابات لا من المقرر  ولا برا المقرر
فقد قررنا الاتى 

يجيب المدون الضيف المحترم الممتحن هنا على كل الاسئله اجبارى 
سوءاً المجموعه 1 او المجموعه 2 او المجموعه 3
وعلى الله والله يسيب اى سؤال 
وفى حالة تفويت اى سؤال او جزئيه من اى سؤال يعيد الامتحان 
فى ميعاد تحدده اللجنه بما يتناسب مع مزاج اللجنه  وراحتها 
وبما يتناسب مع التعكنين على الممتحنه هنا وسد نفسها وخاطرها 
ولقد انظر من اعذر 
وعلى الله تغشى 
الامتحان اوبن بوك يعنى مش محتاج 
ما كنتوا ذاكرتوا من الاول بلاااا..... ولا بلاش 
الطيب احسن 
يلا وشك فى الكراسه واقرى وعلى الله تبصى لحد


ههههههههههههههههه

كان هذا الفاصل من الردح المتعارف عليه فى الامتحانات اللى بيعملوها اياهم ... هاا ... واخده بالك ياللى فى بالى 
من باب التسهيل على الطالب ودعم تركيزه قبل البدأ فى الامتحان

كان هذا هو البوست واليكم الامتحان بالتفصيل





المجموعه الأولى

لزوم التشتيت


أسئله شخصية
-------

1- ماهو  الأسم الحقيقى ؟

2- السن ؟

3- المؤهل ؟

4- أشمعنى لقب الحمش فى أسمك يعنى ما هو سبب الاختيار ؟

5-  أجمل كلمه بتحبى تسمعيها كل يوم ؟
6-  أجمل موقف مر عليكى فى حياتك كلها ، واصعب موقف ؟


7-  أمنياتك للأيام القادمه ؟

8-  بتحبى بعقلك ؟؟ طيب لو صح ياعنى إيه تحبى بعقلك ؟


9- لما بتبصى فى عيون الناس بتعرفيهم ازاى؟

10-  نصيحة في الحب ؟

12-  مظهر الناس ماذا يعني لكِ؟

13- التخصص دكتورة ولا طبيبة ؟

14-  ليه حضرتك أخترتي الإسم ده بالذات ( ستيتة وليه الحمش)؟

15-  بتعرفي تعملي كشري ؟ وايه سر الصنعة يمكن نفتح فرع عندنا بالقاهرة ههههه ؟

16-  لو ماكنتيش بقيتى دكتوره فى الجامعه كنتى نفسك تكونى إيه مافكرتيش تشتغلى فى الصحافه عمرك ؟

17- أزااااااى قدرتى تعيشى فى بلد مافهاش بحر هههههههههههههههههه ؟

 18- إيه أكلك المفضل ؟

19- إيه أكتر حاجه بتضايقك وتحسى انك مش مركزه بسببها ؟

20- إيه سبب حبك لكظومه ؟

21-  لو أتعرض عليكى وزاره ممكن تختارى وزارة ايه تقدرى تنميها وتفيدى فيها  ؟

22- أرسلت جارتك ابنتها إليكى والحاصلة على مجموع كبير بالثانوية العامة والتى تراكى مثلاً أعلى لها وتريدك ان تملئى معها استمارة الرغبات ، هذا وقد أوكلت إليكى هذه المهمة بشكل كامل ، انتى لا تعرفين الكثير عن امكانيات هذه الفتاة ولكنك من وجهة نظر عامة و مهتمة بالشأن العام سوف تنصحينها بأن تكون أول رغبة ( ..... ) ؟

23- من خلال كتاباتك فأنتى خبرتى الدنيا جيداً من بين صفحات الكتب ومن مستحدثات العصر من انترنت وخلافه ومن خبرات حياتية مختلفة ،كنتى تسيرى بالشارع فاستوقفك إعلان عن انعقاد ندوة بعنوان ( المرآة ف الأسلام ماضِ عريق ومستقبل مشرق ) يلقى الندوة فضيلة الشيخ / فلان وفضيلة الشيخ / علان ... الخ ... قررتى الحضور ... ركزتى جداً ... دماغك تكوينها علمى بحت ومنطقى تسلسلى يتبع الاسلوب العلمى ف التفكير -ولو كان الدين بالعقل لكان المسح اسفل الخف اولى من المسح اعلاه - فوجئتى بأن المشايخ سالفى الذكر اقروا بحرمانية عمل المرأة الا فى ظروف معينة ، وان الزى الاسلامى الشرعى هو النقاب ، الكلام كان علمى ومنطقى وبه جزء كبير لا يمت للعقل بأى صلة ، إتخذتى قرارك بالآتى ( .................. ) ؟

24- ما من أحد منا الإ وقال هذه الجملة ( بس لو الزمان يرجع تانى ) وغالباً لا يرجع الزمان ولكنها تقال عندما نكتسب خبرات جديدة وتصقل خبرات اخرى وتزداد نضجاً للتعامل مع معطيات هذه الحياة فنكتشف اننا لو كنا بخبرات مثلاً سن 30 سنه فى مواقف حدثت ونحن فى سن 18 سنه لختلفت قرارتنا كثيراً ، ولكن نحن فى عالم افتراضى ، وانتى الأن سنك 18 سنه وبخبرات سنك الحالى وسوف تقومين بالآتى : ( .................... ) ؟











المجموعه الثانية



هو لسه فيه اسئله تانيه ؟؟!!


اه لسه فيه اجابه تانيه
علشان تفتكرى الكلام ده كويس وانتى بتحطى الامتحانات للغلابه
امضاء
 طالب مخنوق

أسئله تدوينية وسياسية
----------
 1-  بتحبى تقرى أي نوع من الكتب  ؟
2- و هل لكى هوايه اخرى  غير الكتابه؟
3-   بتكتبى امتى و اذا كانت الكتابه بتخليكى مقصره مع أولادك ولا لاء بما انك أم و مرأه عامله؟
4-   امتى هيبقى فيه تجمع تدويني قاهري عشان أشوفك؟
5-  ليه مش على الفيس بوك؟
6- بتتعاملى ازاي مع الناس دلوقتي في حالة تضاد الآراء دي هل بالصمت ولا بالمناقشه والاقناع؟

7- ماشاء الله حضرتك متابعة كل حدث ولازم كل شوية بوست جديد دا مش حسد على فكرة بس بتقدرى توفقى ازاى بين وقتك ومتابعة المدونة والتعليقات ونشر البوستات وكمان ماحستيش فى فترة من الفترات بملل من التدوين ؟

8- ايه رأيك فى القانون الموحد لدور العباده وايه البنود اللى تحبى تأكدى عليها فى الدستور الجديد ؟

9- ماهى  رؤيتك لشكل مصر القادم من الاحداث الان تفائل ام تشائم ؟

10- ما العمل  في موضوع الدستور اللي مش عاجبنا و عاوزينه يتغير في حالة اذا لم يرضخ المجلس العسكري لطلب صياغة دستور جديد ؟

11- هل يعني اني لما اروح ارفض التعديلات اني بكده اقر الدستور القديم و لا نضطر نوافق مع العلم ان فيه اشياء مرفوضه و لا ما نروحش خالص الاستفتاء و نمتنع لاثبات الموقف ؟

12-  وجهه نظرك ازاي نقدر نطور منظومة التعليم الفاشلة اللي بتخرج واحد حافظ مش فاهم و ايه انسب نظام تعليم نقدر نطبقه عندنا في مصر في ظل الاحوال السيئة للمدارس  ؟

13- لاحظت ان هناك ميل للراحل انور السادات عن الراحل جمال عبد الناصر ياترى ايه سبب الميل دا هل هو لشخص ام لحقبه زمنيه ؟

14- انا من الناس اللى بتحب هيكل وبتشوف دايما قدرته على التحليل بشكل منطقى مع وجود الكثير من الدلائل معه لمعاصرته اكتر من فتره مميزه فى تاريخ مصر حاسس كدا بخلاف دائم من نحيتك مع هيكل ياترى ليه وبتشوفيه ازاى ؟

15- الاحياء برضو  علميا هي البيولوجي مش كدا؟


16-  ايه اكتر مدون بتحبي تقريله وبتحترمي فكرة ؟

17-  أكتر مدون بتحترمية لكنك مختلفة معاه؟
18- انا ملاحظ ان طريقة كتابتك اتغيرت فجأه ، للاحسن طبعاً بس انا اظن ان وراء هذا تغير فى القراءه نفسها ، يعنى بداتى تهتمى بنوع معين من الكتابه ، بدأتى تقرى لحد معين كتير الفتره دى ... هل تستشعرى ده فعلا ولا لأ ولو لأ يبقى انا بلغتك اهه ، ههه ، بس ايه السبب ؟!

18- هل لو مسكتى رئاسه الجمهوريه ممكن تعملى شئ ايجابى للبلد ولا اللى على البر عوام؟
19- بما ان مدونتك كانت عامل اساسى لجر رجلى لعالم التدوين فاكيد هذه المدونة مر عليكى فيها مواقف كثيرة
اكيد مواقف اثارت غضبك ومواقف فرحتك ومواقف كان لها العجب
وسؤالى لكى الان ياحبيبتى
ارجو ان تذكرى لى موقف من كلا من هذه المواقف رغم كثرتها يعنى موقف او موقفين من كل نوع من الذى اغضبك والذى افرحك ويكون مسك الختام موقف كان له عجب العجاب فى حياتك التدوينية
افتقدك كثيرا ولعل باجابتك على سؤالى وذكرك لهذه المواقف يعوضنى عن جزء صغير من افتقادك










المجموعة الثالثة


امسكى  نفسك واعصابك
ما تخافيش
خلصنا اهه
هههههههههههههههه

سؤال بيت المدونين

من حقك تختارى مدون يكون ضيف الحلقة الجايه  فى مضيفة بيت المدونين

- تحبى تختارى مين ؟


يلا بالشفى وعلى مهلك احنا مش مستعجلين 
بس بسرعه برده يعنى مش كده




فريق عكش بيت المدونين

:))

السبت، 12 مارس 2011

فى المضيفه وستيته حسب الله الحمش + تحديث






التحديث :

يا اخوانا مش كده ، الاسئله حنينه اوى وسبع اتمانها شكرا وحب وكلام من ده 

احنا عايزين اثاااااره تشووووويق 

عايزين اسألة مدونين بقى العيال اللى دماغهم سم دول هههههه


كان نفسى ما أكتبشى اسمها فى عنوان البوست

الا ان معرفتى بان اسمها مجرد ما الناس هتشوفه فى العنوان هتهتم وتيجى هو اللى اضطرنى اكتبه.

الا انى برده هتكلم كأنى ما قولتش اسمها فى الاول وهلعب معاكم لعبة عروستى 
عروستى :
اسمها : الحقيقى مش معروف لناس كتيره الا ان اسمها الحركى دايما يفكرك بخالتك ( أطاطه ) بتاعة عوكل تحس فى اسمها كده فيه حاجه من خالتك اطاطه ده ....... وانها عامله نفسها أطاطه بس هى دقرم وعارفه كل حاجه ...... فتلاقيه ادى على ستيته كده.
عروستى 
الشغلانه بالنسبالنا : زميله مدونه نفسها وامنية حياتها انها ...... تفتح محل كشرى 
مع انه صعب شويه بس ربنا يحققلها امنيتها ان شاء الله.
عروستى
مدونتها : بتدَعى فيها انها  مش عارفه حاجه ونفسها تعرف ..... مع ان ياخى لما تروح عندها تحس انها عارفه كل حاجه فى كل حاجه بس هى اللى خايفه من الحسد .
عروستى
توجهها : ماتعرفلهاش ... لانها مدوخانى وراها ادخل على تويتر الاقيها ... ادخل على المدونات ألاقيها ...... ادخل الـــ ....... هههه الاقيها ما شاء الله مش عاتقه بصراحه (ناشطه جداً ، من الاحرار يا على فعلاً).
فشكلها كده والله اعلم توجهها سياسى اقتصادى حلزونى ....... واللى عاجبنى انه خفيف الظل.
بس انا عن نفسى 99.9 % من اراءها بأتفق معاها ، يعنى زى الحكومه كده بالظبط ..... بس المره دى بجد.
عروستى
شعبيتها : اللهم لا نق ولا حسد 
عروستى
اللى بيحبوها : كتير والاجمل ان اللى بيحبوها نفسهم ناس كتير بتحبهم وده حاجه لها معنى كويس.
عروستى
بدأت التدوين : من زماااااان 
ايـــــــــــــه تاااانى ؟؟!!
ايـــــــــــــه تااانى ؟!!!

مش عارف 
مهو علشان كده جبناها فى مضيفة البيت 
واسألوها انتوا بقى ......................... يلا اللى عنده سؤال لها يبعته حالاً
بس الاول عرفتوها ؟؟!!!
هديله قدرة فول

الفكره هنا فى عجاله برده للى اول مره ييجى 

فى المضيفه بوست الهدف منه استضافة مدون و سؤاله بعض الاسئله كلها بتبقى غالبا ناتجه من معرفتنا بيه (اسئله تفاعليه بيشارك فيها كل القراء وليست اسطنبه  كالعاده  فى التيجان التدوينيه)
لذا نرجوا من المهتمين وضع اسالتهم فى شكل تعليق وسيتم غلق التعليقات مؤقتاً الى ان يتم تجميعها ونشرها بعد ذلك ولن يتم نشر اى تعليق او سؤال تم طلب عدم نشر اسم راسله بناءاً على رغبة صاحبه الا ان السؤال سيتم وضعه مع الاسئله بشكل طبيعى طبعاً










الأحد، 6 مارس 2011

سويتى سويتى




بنوته صغنتوته كملت العشرين
كان حلمها زى أى بنوته تقابل  عريسها الجميل
وفى مرة من المرات شافت فتى أحلامها راكب حصانه



أمال فين العريس يا بنتى ؟؟؟
ههههههههههههه
أنتى لسا هتقفى تفكرى أخلصى
ههههههههههه




وصحباتها واقفين  فى الفرح مبسوطين ومن جمالها حاسدين  ههههههههههههه



وااااااااااااااااااااااو ياااااااااااااااااااااااااااااااااااااى يا خراااااااااااااااااااااااااااابى

الله دى جميله أوى  أووووووى شوفوا شوفوا ولا عريسها  إللى زى القمر داا  ولا بدلته يالهوتينى هههههههه ولا دزمته رهيبه  ولا عيونه الللللللللللللللللللللله أنا عايزة من دا يا حزمبل انا عايزة من دا ههههههههههههههههههههه
ويفضلوا باصين عليكى طول الحفله
خمسه وخميسه فى عيونهم




1
2
3
4
5

ههههههههههههههههههههه



وهى واقفه ماشاء الله عليها بدر منور الفرحه فى عيونها والبسمه على خدودها والحب مالى قلوبهم
وتمت الخطوبه وغنينا اغنية  يا دبلة الخطوبه عقبالنا كلنا  .... و نبنى طوبه طوبه فى عش حبنا
نتهنى بالخطوبه ونقول يا سعدنا ... يا دبلة الخطوبه عقبالنا كلنا ( مش أنا يعنى ) ههههههه
نحن السابقون وأنتم اللاحقون وياويلك ههههههههه

وتلبس الأمور الدبله وترمى الورد على صحبتها



والبنوته العثوله تاخد الورده وتجرى وتهلل من الفرحه من عيونها طالة

ماهى الأمورة الشربتاتا مكنتش عارفه ؟؟؟
عارفه ايه  ؟؟؟
مش عارفه ؟؟؟
هههههههههههههههههههه



بتعيطى ليه يا سويتى ؟؟؟
زعلانه
من إيه يا قمرى ؟؟؟
خايفه
وليه خايفه يا سويتى ؟؟؟

من الصورة دى





ودى





هههههههههههههههههه
ايوة يا حبيبتى هو دا حال المتجوزين
سويتى تقول
عايزة أرجع فى كلامى
أقولها
تؤتؤتؤتؤتؤتؤتؤتؤ
خلااااااااااااااص
مينفعش ووقعتى يعنى وقعتى هههههههههههه ومحدش سمى عليكى

وبكرا نفرح فيكى اقصد بيكى هههههههههههههههههههه
وتلبسى الفستان الأبيض والطرحه البيضه ونهنى ونبارك لأحلى عروسين

 

وتعدى الأيام والسنين وتزيدوا واحد ولا أتنين
يا حلوتكم زى القمر ههههههههههههههههههههه





ونسمع صوتك وأنتى بتصرخى بالليل ههههههههه ونفسك شوية تنامى وتفضلى تقولى
يا واد أتهد بقا حرام عليك سيبنى أنااااااااااااااام
وتقوليله خد شيل عنى شويه يقولك معرفكيش 
ههههههههههههههههه 
وخخخخخخخخخخخخخخخخخخخخخخخخخخ
ولا حياة لما تنادى 
ودا إذا مرحش أخر الشقه بعيد عنكم عشان يعرف ينام ههههههههه
متهيألى عقدتك صح ؟؟؟؟
ههههههههه
ههههههههههههههههههههه
ويبقى منظرك كدا أهوووووووووووووووووو

ههههههههههههههههههههههههه






سويتى سويتى 
يا قمر البنات 
روحتى وجيتى 
وعدت سنه  كمان
ومعاكى عريسك منور لياليكى 
بالحب والهنا اترسمت ضحكتك
على وشك الجميل  

جينا يا قمر نهنى ونبارك

بعيد ميلادك 

وكمان 

نبارك لأجمل عروسه وعريس
بالخطوبه  السعيده ربنا يتمم بكل الخير
ويجعل أيامكم كلها حب فى هنا مع شوية زعل صغننين
هههههههههههه لازم طبعا اصل من غير الزعل الحياة متبقاش حلو عشان لما يصلحك يا خيبه يجيب لك هديه
هههههههههههه عرفتى بقا ميزة شوية الزعل الصغنتوتين دووول ههههههه
شريرة أنا ها يا سويتى .. دا انا غلبااااااانه
هههههههههههه





ربنا يسعد قلبك  ويحقق لك كل إللى تتمنيه ويزيدك  فرحه وحب وهنا
يا سويت أنجل 
مروة


كل سنه وأنتى طيبه يا رورووووووووووووووووووووو ... عيد ميلاد سعيـــــــــــــــــــــــــــــــــــــــــــــــــــد 
وعقبااااااااااااااااااااااال مليون سنه

وأدى بلالين جبتهملك بس انفخيهم أنتى بقا ألا نفسى رايح هههههههههههههههههه



ودى هديتك من بابا أحمد

في السما ناس
في الأرض ناس
ع المية صفحة بيضة
منورة الكراس
والجو عادي
والحس هادي
ومروة دايرة
تقوم تنادي
ده عيد ميلادي
قمر منور
ورد الجناين
تعال يا بوب
شوف وعاين
شموع وزينة
وناس تغني
منا فينا
صحبة وأساري
بالليل سهاري
دايرين سكاري
في ميلادك يا مروة
تايهين حياري
يا مروة وخبرينا
يا بنت الطيبين
تفاح خدودك جناين
نور خد السنين
أخدتي عطر الزهور
زعلانة البساتين
يا بنت النيل يا بنتي
جايين الملايين
يقولوا
كل سنة وانتي زهرة
تنور ضي السنين



زعلان منك وانتي عارفة ليه
كل سنة وانتي
طيبة يا بنتي
بابا أحمد الصعيدي



ودى هدية بيت المدونين يا سويتى
لزوم عيد ميلادك وشيكولاتة خطوبتك
والفرحه فرحتين








ألف ملـيـــــــــــــــــــــــــــــــــون مبرررررررررررررروك
وربنا يتمم بخير
عيــــــــــــــــــــــــــــــــد ميلاااااااااااااااااااااااد سعيـــــــــــــــــــــــــــــــــــــــد
يا سويتى المدونات