الخميس، 4 نوفمبر 2010

بيت المدونين

تحديث مهم :
يا اخوانا اللى تعجبه الفكره اللى تحت دى او بالفعل عجبته (انا بقول اللى تعجبه اهه ، مش عافيه يعنى ، ايوااااه مش عايز عقد ) زى كل الشباب الجامد اللى تحت دول اللى رفع معنوياتنا والحمد لله ، ياريت يعمل بوست باللنك بتاع الموضوع ده علشان اكبر قدر ممكن من الناس يقدر يجى ويقرأ ويتفاعل.
عايزين كله يتفاعل ، بلاش حركات هز الراس دى. 


سالخير عليكم .....
اولاً ومن هذا المنبر الجديد احب ان امرر خالص شكرى واعتزازى وتقديرى و .......
.... ايه الدخله دى .........
لا لا لا ...... انسوا الكلام اللى فوق فى اولاً ده ....... احنا مش كده خالص .....


احنا هنا اصحاب وزملاء ..... احنا هنا قرايب وعزوه .............
يعنى لا فيه رسميات ولا هو موقع عام بيتكلم بشكل رسمى او بصوره مرسومه مسبقاً وهيكل واطار وبرواز وتشكيل وتبــــ ....... برده الكلام كبر منى تانى .........


لا بقى بصوا ...... انا هقول تانى بس بالشكل بتاعنا اللى كلنا هنتفق عليه الا وهو ......
اننا هنا مش عاملين موقع رسمى او مؤسسه وده واجهتها ....... لا خاااالص ...... ابسلوتلى ........


يا اخوانا هنا زى ما قلنا بيت المدونين ...... يعنى كل الناس اللى هنا اعضاء فيه ..... بدون طلب اشتراك او التحاق ........


ده بيت معمول عن طريق مجموعه من وسطنا ..... بهدف نتلم ونتقابل فيه ....... حاجه كده زيها زى التجمعات التدوينيه ..... لا بيبقى فيها ريس ولا بيبقى فيه برنامج مفروض  ........

بمعنى أصح وأقرب للفهم ...... هنا بمثابة تجمع تدوينى ، بس بدل ماهو بشحمنا ولحمنا ....... هيبقى بقلمنا وكيبوردنا .......


لان مش كل الناس بتعرف تحضر التجمعات ..... مش كل الناس بسهوله تقدر تتواجد فى كل الأماكن .......
لكن هنا كله يقدر يتواجد فى نفس الوقت من اى مكان او زمان ......... من اسكندريه لاسوان ...... صحره كان او بستان .....  حلوه الـ (وان دى ) ....
حتى ولو عايش برا مصر هيقدر يتواصل ........ هنقدر نتكلم وندردش  ....... هنقدر نتبادل الحوار والنقاش .......
هنقدر نقترح على بعض افكار كتير ومواضيع اكتر واكتر  ..............


احنا هنا بنعتقد ان المدونين فى مصر بدأوا يبقوا فى الصوره ..... بدأو يبقوا كيان مؤثر فى المجتمع والاعلام ......


لقد قال نابليون بونابرت يوماً :
"لا أخشى ألف مدفع وألف جندي بقدر ما أخشى لسان صحفي أو مقال جريدة. ... "


فالصحافه هى الطابور او السلطه الرابعه ..... وهى المؤثر والمحرك للمجتمع ........
علشان كده قلنا نحاول نتجمع.....
نعمل مكان نتلم فيه ومن بعض نسمع ........
اكيد هتفرق كتير معانا ...... اكيد هتفرق مع المجتمع .......

تخيلوا لو مثلاً ...... المكان ده فعلاً بقى بيلتقى فيه اكبر عدد مننا ..... وبقينا نتفق على حاجات مع بعض من خلاله .....
وبقى كل الناس عارفاه ... القاسى منهم والبادى ..... ومثلاً مثلاً .......
جينا على تجمع زى بتاع التبرع بالدم اللى خالد همس الاحباب بيدعى ليه ده ........ وجينا معلنين هنا وقولنا "يا جماعه عايزين الايام الجايه دى كلها كل المدونين يعلنوا عندهم على التجمع حتى اللى مش هيجوا يعلنوا ..... لان التجمع مش مقتصر على المدونين بس ............... " 
وفعلا الناس كلها عجبتها الفكره واعلنت ............... متخيلين رد الفعل  ؟!!!!

متخيلين الفكره دى (التجمع ) ممكن تعجب ناس تانيه اد ايه وممكن يعملوها فى محافظاتهم ازاى ؟!  وعلى ذلك قيسوا امثله كتيره ......
متخيلين مدى تأثيرنا هيبقى عامل ازاى فى المجتمع ؟!!

ده من جهه ...... وفيه جهات تانيه او افكار تانيه كتيره هى هدفنا هنا برده .............. 

زى ايه ؟!!
زى اخبارنا اللى احنا بننشرها كل يوم دى ..... فلان اتجوز،  فلانه اتجوزت ...... فلان عيد ميلاده امتى ...... فلانه غسلت المواعين ولا لسه ؟!
فلان اتخنق من مراته ...... فلانه قتلت جوزها ..............
طبعا كده بقى الموضوع جرسه وشرده ...........  لا مش كده .....
لان بكل بساطه ...... احنا هنا مش هنذيع او ننشر اى خبر الا من خلال صاحبه ..............
صاحبه فقط هو اللى هيقولنا عليه وننشرهوله ...... مش هننشر شئ الا ما صاحبه هو اللى يقول او يوافق مسبقاً ..... لان بكل بساطه ..... 
الخبر هيتنشر وصاحبه هو اللى بنفسه هيجى يعلق عليه ويرد على تعليقات الناس ............
بمعنى اصح هيبقى فيه تواصل اكتر ومشاركه اكبر ........ هيبقى فيه ود وترابط وتراحم ......
لان الموضوع مش هيبقى عباره عن "موقع بينشر اخبار" (موقع اخبارى) لا .............. احنا هدفنا هنا اجتماعى ......
برده زى خبر مدونه جديده اتفتحت ، ممكن نعلن عنها ، لمزيد من الانتشار ومساعده للمدونين الجدد انهم يجوا وينتشروا وسطينا بدون مجهود كبير ووقت طويل ....
زى برده اننا نحط لنكات كل المدونين المتواجدين معانا ومش متواجدين .... بنحاول نضيف كل اللى نعرفه .... (طالما ان محتوى مدونته فى اطار مقبول ... طبعاً) ...



فيه افكار تانيه برده كتيره عندنا وعندكم ممكن تقولولنا عليها ونناقشها .......

يعنى على سبيل المثال ....... عندنا فكره جديده هقترحها عليكم دلوقتى ...... ونتناقش فى كيفيه تنفيذها ..... زى ما اتناقشنا فى الشعار بتاع بيتنا هنا واختارناه فعلا على حسب اقتراح الاغلبيه وقد كان والحمد لله ............ 

وان كان انا نفسى بعترف ان الشعار فيه حته كده عايزه تتغطى ......................... (بس ان شاء الله هنغطيها ونلبسها نقاب كمان ان شاء الله ....... ههههه ) . بس يا جماعه والله ما حد فينا يعرفها الست دى ..... دا احنا لقيناها كده فى وسط الجماعه اللى واقفين واتكسفنا نمشيها ..............


المهم
نرجع لموضوعنا وفكرتنا ................ الا وهى :


هنستضيف كل فتره معينه (ثابته او متغيره.... للنقاش برده ) ، مدون من المدونين ...... 
حاجه كده هتبقى زى التاج .... بس المره دى فيها ميزتين ...... الاولى انه هيبقى معمول له هو بعينه .... والتانيه هيبقى فيه تفاعليه اكتر ..... ليه ؟! ..... لان .....


لان ايه ؟!


لان احنا هنتفق مع المدون ده الاول زنبلغه انه مرشح للبوست اللى جاى علشان يتعمل معاه حوار ..... ولو وافق ....
هننزل خبر فى بوست نقول:
"ان المدون اللى هيتعمل معاه الحوار القادم يا اخوانا هو ..... فلان ...... 
وبالتالى الناس فى صفحة التعليقات تبدأ تكتب الاسئله اللى عايزين يسألوهاله ........ (طبعاً فى المعقول يعنى ..... ) ، واللى هيبعتوا الاسئله ممكن يبعتوا بالاسم بتاعهم او لو محرجين ممكن يبعتوا باسم غير معروف  .............
من ضمن الاقتراحات برده ...... ان التعليقات فى البوست بتاع الاسئله ده بعينه (الاسئله المقترحه)  هتبقى معمول لها اشراف ، بحيث ما احناش ضمنين الظروف برده ...... 
واحد زى على علوكه او اشرف كوخه ممكن يدخلوا بغير معروف ويسألوا اسأله كخه .... ونبقى اتسببنا فى احراج للراجل او الراجله اياً كان .......




عموماً الموضوع بين اديكم ....... الفكره كلها اتعرضت ...... (اقصد فكرة البيت نفسه ) .... والفكره بتاعت الحوار برده اتعرضت ...... مستننين ارائكم ومقترحاتكم  ...... 

صحيح برده احنا عايزين نسمى الفكره الاخيره دى اسم .... زى موضوع التاج كده ما اصطلح عليه انه اسمه تاج ......
يعنى عايزين نسمى البوست ده اسم ثابت مثال :
" فى بيتنا مدون " .....
"على القهوه " .....
"انا مين " ...........
"  اقفش مدون " ......
" مدون فى ورطة " ........
كده يعنى ............. 
وعلى فكره الاسماء دى مش للاختيار ، دى للمثال .... يعنى عايزين اسماء تانيه .....
............
...............


بس...........


انتوا لسه قاعدين ............ الموضوع عجبكم ولا إيه .... انا عايز أروح ....




سلاااام
ويكا



هناك 35 تعليقًا:

باحث عن حب يقول...

الله عليك يا ويكا
بجد دماغ عاليه وقلب ابيض
زى المهلبيه
بجد اللى عاورينها تلبسوها نقاب دى
هههه
عندك حق بس انا بجد انكسفت خفت تقولوا عليا عينى زايغه هه
موضوع الاستضافه ده
عثل
موافقين عليه طبعا
باتكلم بالاصاله عن مدوناتى طبعا
الاسم
ممكن قهوة المدونين
اقفش مدون
اللى يجى على بالكم
يارب يبارك فيكم يارب

Unknown يقول...

فكره جميله و الأجمل طريقة عرضها أنا لسه مشتركه جديده و مبقاليش في التدوين غير 6 شهور لكن بجد مبسوطه أوي من الجو كله و كل مدى بنبسط أكتر لما بلاقي ناس جدعه و قلمها سهل و دمها خفيف كده
سعيده بالتواصل من خلالكم و بقترح اسم (في بيتنا مدون)
ربنا يكرمكم و يوفقكم
تحياتي

Noha Saleh يقول...

انا موافقة على الفكرة جداااااا
لان المدونات فعلا بقت مجتمع كبير ومهم جدا

ツSmiLeY AnGeLツ يقول...

الســــــــــــلام عليكم
اكيد موافقة مهو الي تقترحوه على رؤوسنا من فوق
فكره ولا اروع بجد جميلة
فتوكل على الله وطبقها
معـــــــــــــاكم موافــــــــــقة
تقبل مروري
سلامي ليك .

لــــ زهــــــراء ــــولا يقول...

اه يا خوفى من كلمة التجمع اللى كررتها اكتر من مره انت مش عارف ان ده اسم حزب من الاحزاب المعارضه كده احنا محتاجين معنا شلة محامين عشان اللى جاى ههههههههههههههههههه
الفكره حلوه وموافقه عليها طبعا
بالتوفيق يارب
زهراء

محمد التركى يقول...

السلامو عليكم

ايه ده ياولاد
ايه ده
تحس كده اننا فى بلد من البلاد المتقدمه
اه ده ياولاد
ههههههه

جاااااااااااااااامد ياويكا
والنعمه جامده قوى الفكره
بس فى حاجه مين هيحاسب على الطلبات يامعلم
على القهوه بقى شاى ونيسكافيه وحلبه حليب كده ياعنى
هههههههه

تسلم الافكار بجد
انا بفتخر انى مدون مصرى موجود ضمن بيت المدونين
بجد تسلم الافكار الجميله
بالتوفيق ليكم يارب دايمآ تقدم لبيتا الكبير

تحياتى للبيت الكبير
محمـــد التركـــى

Hanan Elshafey يقول...

انا معااااااااااااااااكم
واقترح نسميها اقفش مدون او مدون عندنا
اقفش مدون دي داخله دماغي قوي
احياتي لارحب واوسع بيت
وهفكرمعاكم في فونكيرات كتير ان شاءا لله

غير معرف يقول...

كلام زى الفل

عجبتنى فكرة الحوار اللى نعملها مع مدون نختاره كل فترة
وممكن نسميها " مدون فى ورطة "


اما بخصوص اننا ننشر اخبارنا فكرة حلوة هتقربنا من بعضنا اكتر وتخلينا دايما متابعين اخبار بعض

وفكرة لو حاجة زى التبرع بالدم نعلن عنها وكده موافقة عليها وكمان اى حاجة فيها خير وحد عرف عنها حاجة ممكن يقول وباقى المدونات برده تعلن عنها مش بالضرورة تكون تبع المدونين كفاية ان يكون فيها خير ومساعدة للناس

واكيد موافقة على فكرة ان يبقى النت والقلم والكيبورد هى وسائل التواصل ما بينا


مية مية يا ويكا

:)

غير معرف يقول...

حلو مدون فى ورطة يا ستار

mrmr يقول...

الفكره حلوه
بالتوفيق

BNT ELISLAM يقول...

حلو اوى الافكار دى
وبجد شىء يسعدنى شخصيا اننا نتعرف ونقرب كاسره واحده افرادهامشتركين فى شىء واحد
على رايك ياويكا
قلمها وكيبوردتهم
حلوا الفكره لاخير ه ونا عجبنى اوى اسم اقفش مدون

!! a7mad sala7 !! يقول...

فكرة جميلة اوى

وانا معاكو ان شاء الله .. ان امكن يعنى

just dream يقول...

جميله الفكره بجد وفعلا فيه افكار كتير بس واحده واحده واحنا هنظبطه وهنخليه احلى بيت فيكى يامصر
المهم انا معاكم ف الفكره دى وممكن نسميها اعترافات مدون
او فى بيتنا مدون

كلمات من نور يقول...

جميل الكلام و الأفكار وكلنا إيد واحده

جايدا العزيزي يقول...

ويكا انا معاكم

بسعلى فكرة الموضوع مش جديد

موجود فى منتديات كتير

وانا برشح انه يكون الاسم كرسى الاعتراف

وبعدين ياباشا ايه الكسل ده

مش بكرة بردوا عيد الحب

والمفروض يعنى نهنى بعض ونتجمع فى بيتنا

لالالالالالالالالالالالالالا

ده كسل فين الادارة

اعمل شكوى دلوقتى

عايزه همه نشاط

لازم كل عيد يمر علينا نكون هنا

زى عيد الحب الربيع الام العمال

مش اعياد ميلاد وبس

وماتنساش عيد الثورة والتحرير

وغيروا وغيروا

انا سبقت ونزلت الموضوع على مدونتى

مش استاهل ابقى المدير العام

شويه نشاط وهمه

ولا ايـــــــــــــــــــه

تحياتى

باحث عن حب يقول...

صح
جايدا
عندها
حق
فين
الاحتفال بعيد الحب
صح
بلاش كلمه عيد
علشان
نقول
يوم الحب
ولا ايه
معاكى يا جايدا

غير معرف يقول...

افكار جميلة

لو لاقيت فكرة جديدة هاقولها :)

سندباد يقول...

فكرة ممتازة وجميلة وانا ومدونتي علي استعداد للمساعدة في اي شئ تطلبوه مني
لكم تحياتي

richardCatheart يقول...

انا حابه اسم
اقفش مدون

او فى الصندوق

او ريبورتاج
او بوسسسسسستر بما ان المدون هو النجم

ومعاكم فى كل اللى هاتعملو

Ramy يقول...

الفكرة حلوة قوى على فكرة

ممكن

ضوء على مدون

أو اقفش مدون (:

(:

همس الاحباب يقول...

اممممم موافقة
صح النوم
خلينا فى المضمون
ونمشيها حوار مع مدون
انا ديمقراطى جدا
بس موافق على حوار مع مدون
يبقى حوار مع مدون
شايفين الديمقراطية فى زمن الملوخية

تحياتى

سواح في ملك اللــــــــــــــــــه- يقول...

طب الاسئله اختيياري والا اجياري

ويكا يقول...

والله يا شباب مسمى مدون فى ورطه ده عاجبنى جدا بصراحه
مش لان الاسم كويس بس
لا
علشان الورطه نفسها

بحب انا الورطات دى بصراحه

علشان كده انا قررت اننا نلغى الفكره خااالص
هههههههههه

فين الافكار ياخوانا والاقتراحات للاسم

وبما ان خالد بيقترح انه يتسمى حوار مع مدون
فان شاء الله ده اول اسم مستبعد

هتعرفوا قريب ليه
دا الا خالد والموضوع ده بالذات

انا عايز اسماء متوحشه يا اخوانا
انا عايز ارهاب فى الاسم ....
انا عايز المدون من دول اول ما يعرف اننا عايزينه يبقى هو الضيف المره الجايه .... يعمل بى بى على نفسه ..... متخيلين الموقف ؟!!

انا عايز رعب ..... رعب ......
اسماء رعب ...... ام الرومانسى ....
بيت المدونين يتحدى الملل

ويكا يقول...

احمد صلاح

تم اضافتك فى المجونات الادبيه
لو عايزها فى مكان تانى بلغنا

منورنا يا باشا

غير معرف يقول...

هو احنا فى بيت رعب يا ويكا ولا ايه
؟؟؟؟؟؟؟؟؟؟؟؟؟؟؟؟؟؟؟؟؟؟
هههههههههههههه

غير معرف يقول...

جايدا العزيزى
جودى
صدقينى انا مكنتش اعرف ان اليوم عيد الحب
بس متهيالى عيد الحب مش الشهر دا
صح ؟؟
عرفت من عندك ومن الفيس
ولو كدا كنا اجلنا شوى البوست دا
بس مينفعش عشان ياخد حقه فى النشر
ونزلنا بوست لعيد الحب مع انى مش بعترف بيه
وكل ايامنا يا ستى حب فى حب
ان شاء الله
ويا جودى الجميلة انتى عملتى بوست جميل جداااا
وعجبنى كتير
وفكرته عجبتنى
ومش كسل ولا شىء
فيه شغل بيتم
وجارى التنفيذ
وافتتاحات لمدونات والعيد الاضحى
باذن الله
كله شغال
ولو فيه اى فكرة ياريت تشاركينا بيها وتبلغينا بيها
تسلمى يارب
طبعا تنفعى
بأفكارك الجميلة والمميزة
تحياتى لشخصك الجميل

The illusionist يقول...

فكره زى الفل يا باشا

فكره زى اللوز

ومليانه مكسرات كمان

نحن نشترك بكل الاتجاهات والكمبيالات والوصولات

ويكا يقول...

نهى صالح اول من يعلن يا اخوانا

هل من مشمر ؟؟؟؟؟


مين تااانى يا بشر هيعلن فى مدونته ... بلاش حركات المصريين دى .....
والله علشان كده حسنى مبارك هيفضل بيحكمنا ....

miroooo يقول...

حلوة الفكرة اوى
كمان الاسم الافضل مدون فى ورطه
تسلملنا افكاركم الجميله

عباس ابن فرناس يقول...

ايه الطموح ده كلوووووووو
انتو شكلو رسمين على محطه فضائيه هههه
بجد الفكره جميله ومبشره وانشاء الله خير ..خير انشاءالله
وانا معاكم طبعا
وان كان على الاسم اى حاجه مش مشكلة المهم النتيجة
ومع ذلك بقترح يكون الاسم : سهرايت مدون
اسم غلبان صح ؟
تحياتى

عباس ابن فرناس يقول...

خدو اسم تانى كنت شايلو لنفسى بس مش كتير عليكم اهه: ( عش المجنين )

mrmr يقول...

علم التحديث ،،،

Ms Venus يقول...

فكرة جميلة

وممكن يكون الاسم


مدون تحت المجهر

زهرة يقول...

بقترح فى بيتنا مدون ..

معاكوا أنا .. كح كح .. رايحة أعلن أهو

:)

شمس النهار يقول...

فكرة لطيفه

ان تستضيف مدون لمناقشته

ياريت كمان يطرح موضوع للنقاش يعلن عنه والكل يدخل برضوا يسال او تفتح التعليقات للمناقشه بين المدونين

ربنا يوفقكم
:)