السبت، 4 ديسمبر، 2010

بؤجة الخير الشتوية




 كل سنة وانتم بخير وعيد سعيد عليكم جميعا 
 بمشيئة الله تعالى تقرر تحديد ميعاد بؤجة الخير الشتوية
الميعاد : الجمعة الموافق 10 ديسمبر 2010 
المكان : جمعية صحبة خير بمسجد زهراء مصر القديمة 
الزمان : من العاشرة والنصف صباحا امام  مقر الجمعية الكائن 20 شارع احمد خيرى فوق كافتيريا السرايا بعد محطة مترو الزهراء بحوالى 100 متر تقريبا 
دى خريطة لمحطة مترو الزهراء و لونها بالازرق اما اللون الاحمر فهو لمكان المسجد وده اسهل للناس اللى هتستخدم المترو

فى حالة اى استفسار او حد تاه عن المكان  ممكن يتصل على الرقم ده 

0101345140
وبعد الانتهاء من تسليم البؤج وصلاة الجمعة فى أقرب مسجد سنتوجه الى مكان قريب لتناول الغذاء وغالبا هيكون فى منطقة السيدة زينب او نادى المحامين .
وفكرة البؤجة تتلخص فى الاتى 
- بما انكم طالعين من العيد واكل الفتة واللحمة عمل عمايله معاكم فبساطة كده انت وبتبدل الملابس الصيفى بالملابس الشتوى تشوف ايه اللى انت مش محتاجه منها يكون ضاق عليك او خلاص زهقت منه او موضته خلاص فات اوانها او ربنا كرمك وعامل دايت وتجمع الحاجات دى مع اى حاجة تكون مش عايزها فى بيتك ملايات - فوط - احذية - ادوات منزلية - اى حاجة انت مستغنى عنها و نروح كلنا لعشوائيات اسطبل عنتروعزبة خيرالله ونديها للناس هناك فى جمعية صحبة خير وهم بيخدوها و بيعملوا بها معرض للاسر الفقيرة و تتباع لهم الحاجات باسعار رمزية و المبلغ اللى يتجمع من المعرض بتستغله الجمعية فى عمل خيرى تانى و ده علشان الناس اللى هتتباع لهم الحاجة تحس انها اشترتها بفلوسها وانها مش متسولة.
يا ريت واحنا بنقرا البوست نفتكر انه فى الوقت اللى عندنا فيه حاجات كتير قوى مش بنحتاجها  وبنقول لنفسنا خليها مركونة يمكن نحتاج لها تاكد ان ربنا سبحانه وتعالى هيعوضك خير منها فى الدنيا والاخرة .
وكمان تخيل برد الشتاء القارص وتخيل ولو لثوان انك مكان الشخص الفقير او إن ابنك اواخوك فى مثل هذا الموقف فماذا تفعل من اجلهم ؟؟؟!!!
والتبرع ممكن يكون بأى شىء عينى او مادى او حتى معنوى بوجودكم ومشاركتكم وتشجيعكم للاخرين .
ياريت كل مدون يقدر ينزل بوست عن الموضوع يبقى جزاه الله خيراعلشان نبلغ اكبر عدد ممكن .
والدال على الخير كفاعله 
جزاكم الله خيرا



هناك 27 تعليقًا:

eng_semsem يقول...

كان نفسي اكون معاكم واساهم بس البلد غير البلد وربنا يجازيكم خير ويوفقكم ويسعد ويكسي المحتاجين في بلادنا
تقبلوا تحياتي

الحب الجميل يقول...

جزاك الله كل الخير يا خالد
إن شاء الله تتيسر الامور وأتواجد معاكم
بأذن الله
تحياتى لشخصك الكريم

BNT ELISLAM يقول...

جزاك الله خير
وباذن الله فى ميزان حسناتك
عاوزه اضيف شىء انى فى ناس ممكن متكونشى من قاهره
بس ممكن بضوا يطلعوا الهدوم وغيره
اكيد فى ناس محتاجه فى منطقتهم
او كيد كل واحد عارف فى ايه فى بلده

مش نعلها حجه ونقل انا مش من القاهره او غيره لابالعكس تخيل لو الفكره اطبقت فى 10 محافظات مختلفين
من جمهوريه كلها

خواطري مع الحياة يقول...

السلام عليكم
جزاكم الله الف خير
ويقويكم على فعل الخيرات
ويجعله في ميزان حسناتكم
سلامي ليكم اخواني.

كلمات من نور يقول...

ربي يجعله في ميزان حسناتكم

mrmr يقول...

ربنا يجازى كل من له تعب فى المحبه
ويجازيك خير يا خالد

karmen يقول...

جزاكم الله خيرا وربنا يقدرني واعرف اوصلكم ربنا يجعله في ميزان حسناتكم

قوس قزح يقول...

جزاكم الله كل خير على النشر
ياريت الناس كلها تعمل زيكم

جايدا العزيزي يقول...

جزاكم الله كل خير

وجعله فى ميزان حسناتكم

بالتوفيق دائما

تحياتى

(حلـم) يقول...

بالتوفيق


مع اطيب المنى



اشكركم على هذا الجهد الرائع



دمتم اوفياء للحرف والقلم والاحساس المبدع



حلم

محمود(باحث عن حب) يقول...

ان شاء الله هحاول اكون موجود
جزاكم الله خيرا

miroooo يقول...

السلام عليكم
فكرة جميله جدا جزاكم الله خيرا
والله ياريت كنت فى القاهرة كنت اشتركت معاكم
الاحساس بالناس اللى محتاجه شىء رائع
ربنا يعينكم على فعل الخير

حد من الناس يقول...

ياجماعه

اسمحولى احيكم على مجهودكم الرائع ده ، وجميل ان يبقى فيه بيت للمدونين يتجمعوا فيه ونتبادل اخبارهم فيه

واسمحولى كمان اننا ننضم للاسره الجميله دى بمدونتنا الجديده على المكشوف

http://3alamakshoof.blogspot.com

شكرا ليكم

sweet angel يقول...

ربنا يقدركم على فعل الخير

Noha Saleh يقول...

ربنا يجازيكم خير ويكرمكم ويقدركم على عمل الخير
بجد انتوا هايلين

غير معرف يقول...

انا لله وانا اليه راجعون
انتقل الى رحمة الله تعالى
المدون وئام النجار صاحب مدونة بصراحة
وذلك اثناء تأديته لمناسك الحج

نسال الله العلي العظيم ان يتغمد الفقيد برحمته ونسال اسرته الصبر والسلوان
ونسالكم الفاتحة

richardCatheart يقول...

والله انت انسان سخيف ودا اقل مايقال

اتقى الله اللى بتتكلم عنه يا اخى يجعل لك مخرجا

فاتيما يقول...

ايه الحكاية يا جماعة
طمنونا على وئام

ان شاء الله ربنا يسلمه من كل شر

طمنونا ببوست يا جماعة لو سمحتم

وليكم جزيل الشكر

الحب الجميل يقول...

وئام بخير يا جماعه
اطمنوا
حسبى الله ونعم الوكيل فيك يا غير معرف

فاتيما يقول...

طيب يا حبوبة
الحمدلله

شكرا يا حبيبتى

اشوفكم على الف خير

الحب الجميل يقول...

دا واحد سخيف كتب التعليق بدون اسم وجرى عشان هو جبان

فاتيما
ربنا ما يجيب حاجه وحشه يارب

ان شاء الله
اشوفك على خير

Noha Saleh يقول...

ايه الكلام السخيف ده
كويس اننا اطمنا عليه

Mona Abo - Elso3od يقول...

انا معرفش وئام
بس الموضوع ده مستفز جدا و الانسان المريض اللي عمل كده دا ربنا مش هيسيبه انه يقلق الناس كده بدون داعي
حمد لله علي سلامتك يا وئام
يا ايمو احذفي التعليق السخيف بتاع الكائن ده

وداد يقول...

بارك الله فيكم

كان نفسي اكون معاكم

لكن البلد بعيدة عني

جزاكم الله خير

وفي جمعيات أخرى يا جماعة للخير

انا مشتركة بجمعية الرسالة

ودول بييجوا لحد باب البيت بياخدوا فلوس او ملابس

حسبن إمكانياتك

الحب الجميل يقول...

Mona Abo - Elso3od
ربنا يجازيكوا خير
و يقدرنا نساعد الناس
توضيح
محطة المترو ده زهراء المعادي مش كده

الحب الجميل يقول...

منى
معليش يا منى نقلت تعليقك هنا
بصى يا اوختى انا من اسكندريه زى ما انتى عارفه

وهنتوه ان شاء الله

استنى لما خالد همس الاحباب
يوصل بالسلامه ويقولنا

tote soly يقول...

ما شاء الله مشروع طيب
جزا الله العاملين عليه خير الجزاء
أثابكم الله ونفع بكم
كم كنت اتمنى المشاركه معكم ولكن المكان بعيد والبلد غير البلد
ولكن اساهم في مشروع اخر ببلدتنا