الأحد، 23 يناير 2011

فى المضيفه مارو (الحلقه الاخيره) + تحديــــــث هام جدا

تحديث
يتطلب على كل ضيف فى كل حلقه أخيرة وبعد الإجابه على الأسئله ... على الضيف مثلاً ( مارو ) عليها إختيار الضيف الجديد وكتابة إسمه أخر بوست الإجابات
عليكى يا مارو تختارى الضيف وتبلغينا بإسمه
وهيكون إن شاء الله ضيف أول الشهر وضيف فى نصف الشهر

 بسم الله الحمن الرحيم
 وبه نستعين اما بعد


يالهههههههههههههههههههههههههههههوتى


ايه دا كله ايه دا كله


دول عايزين 11 سنه واربع شهور اجاوب عليهم يا رداله


المجموعه الاولى


أسئله شخصيــــه


1.   الأسم ؟


ناريمان السيد انور عبد العال حسن الجلاد


2.   اللقب وسببه مارو


دى حكايه كبيييييييييييييييره
شوفى  او شوفى
لما اتولدت ابويا لاقنى ملونه بقى طاير بيا هو وامى وابتدى الخناق وشد الشعر هو كان متيم
بالملكه ناريمان وعايز يسمينى ناريمان وامى كان عندها صديقه ليها اسمها مارو جريجيه اى يونانيه وهاجرت فى اوائل الستينات وعايزه تسمينى مارو
هى تشده من هدومه وتقوله مارو وهو يشدها من شعرها ويقولها ناريمان
لغايه ماتدخلت ستى اى جدتى ام ابويا حقننا للدماء وخوفا من التضحيه بيا
وقالت نكتبها ناريمان ونقولها مارو وكان
تروى هذه الحكايه عبر الاجيال المتلاحقه فى العائله والصحه على الراوى
الحقيقه انى ماعرفش غير اسم مارو بالرغم من حبى لناريمان لانه شيك وعتيق
ومميز الا انى بحب مارو اكتر حتى  فى المدرسه كانو بيقولولى مارو
بس ناريمان انتشر فى العائله اكتر وكذا حد سمى على اسمى
بنت اخويا وبنت بنت خاله ماما وبنت ابن خال جوزى
كارثه حقيقيه حقا وصدقا
ههههههههههههه


3.   الســــــــــن ؟


 32 سنه و6 شهور عضمه كبيره ياعنى


4.       خريجة إيه  ؟ وإيه المواد اللي كنتى بتحبيها ؟


دبلوم تجاره دفعه 94\95
المواد اللى كنت بحبها
التاريخ جدااااااااااااااااااااااااااااااااااا
والعربى علشان النصوص والشعر
والانجليزى ماعرفش ليه الحقيقه
دول المواد اللى كنت شاطره فيهم
بس الحقيقه عمرى ماحلمت ادخل كليه كل هدفى كان معهد التمثيل وماحصلش الحقيقه
للاسف الفن خسر كتتتتتتتتتتتتتتتتتير فينك يا سبكى



5.       ما هى  اكتر حاجة بتزعجك  ، وما هى أكتر حاجة بتبسطك ؟


الازعاج مابيخلصش بس اكتر حاجه خوفى على ولادى
مش عايزه حاجه فى الدنيا غير انهم يكونوا كويسن ، بقلق عليهم بشكل مرضى
(من الامراض) ولما حد فيهم بيتعب انا اللى ببقى عيانا مش هو
شلل ياعنى من الاخر
ربنا يبارك فيهم وفى اولادكم يارب ويحميهم كللللللللللللللللهم





اكتر حاجه بتبسطنى لما بلاقى ناس طيبه وجدعه وقرعتى اتعامل معاهم بحس ان الدنيا بخير
ولما ببقى مع اصحابى حقيقى بتبقى لاحظات بسرقها من الدنيا

6.       ما هو أكتر موقف بكيتى فيه من قلبك و ما هو أكتر موقف ضحكت فيه من قلبك ؟


اكتر موقف بكيت فيه  كان مرتين الحقيقه
لما ابويا  فاق من الغيبوبه وبصلى ودار بنا حوار غريب
ويوم وفاته طبعا حلمت قبلها بيوم ان فى حائط اتهد فى بيتى وكان فعلا
الله يرحمه ويتقبله ويجعله فى  احسن صحبه صحبه نبينا المصطفى صلى الله عليه وسلم وال بيته وصحبه اجمعين



انا كنت بضحك كل يوم من قلبى وانا بتفرج على عمرو اديب الحقيقه وماحدش يستغرب
ايوان بضحك لدرجه الكهكها ومن ساعة ما بقاش يجى وانا نسبه ضحكى قلة
90%

7.       ما هى الصداقه من وجهه نظرك ؟


اجمل واحلى واندر حاجه الصداقه وعندى فرق كبير بين الصداقه والزماله ياعنى عندى معارف كتتتتتتتتتتير بحبهم جدا بس اصدقائى اللى بجد مختلفين خااااااااااااااالث مالث وكمان بالث

8.       هل تثقى فى صداقة النت ؟


 مافيش صداقه نت فى معرفه نت ممكن تتحول لصداقه وممكن لاء هنا بقى حسب تلاقى الافكار والاحساس والشخصيات والتفاهم
وماببقاش بفكر دى عرفتها على النت ولا فى المشروع عادى
واعز صديقاتى عرفتهم من النت هههههههههههههه


9.       من هم أصدقائك المفضلين  ؟


ايمان مونا قرفه
 دى اختى الكبيره اللى بقولها كل حاااااااااااااجه من غير حرج وبتدينى بالجزمه ديما هههههههههههههههه
نسمات ننوس زوعربه
 ودى اخت الوسطانيه اللى بردو بقولها كل حاجه وبتنزل عليا تقسيم وضحك للصبح



وايمان ايمو الحب الجميل
اختى اخر العنقود سكر معقود وبقولها كل حاجه وبتطبطب عليا
وتخدنى فى حضنها اللى كله حنيه ههههههههههههههه يا حونين.

10.   من هم أغلى الناس فى حياتك ؟


اكيد اهلى امى واخواتى وولادى وجوزى ومامته واخواته واصحابى
يارب يكرمنى  فيهم كلهم ومايضرنيش فى اى حد منهم يارب


11.   إذا طعنك صديق قى ظهرك ....  ماذا ستفعلى ؟
ههههههههههههه حصلت
 بسيبه وامشى وبحاول انساه ربنا يسهل للجميع

12.   ما هى أحلامك للغد (بتحلمى بإيه )؟


والله شخصيا بحلم 250 مليون دولار  قبل ما اموت فى حاجات لازم اعملها على رأى ابو الليف



بجد بحلم ربنا يصلح لمصر الحال اللى بحبها اوى ، برغم كل حاجه ماعرفش غيرها زى امى كده



ابويا بقى الله يرحمه ويسامحه هو السبب وحببنى فيها ههههههههههههههههه
نفسى ربنا يصلح الحال علشان ولادى وولادكم واللى جاى واه يانى يانى من اللى جاى يانى



13.   ماهو اللون المفضل لديكى ؟


اه الاحمر ملك الالوان عندى بدون منازع
الاسود
الازرق بكل الوانه

14.   ماذا تعنى كلمة الأُمومه بالنسبه لكِ ؟


بجد ومن غير فزلكه وجع قلب وجع قلب
خوف دائم

15.   من هو أكثر إنسان حزن قلبك على فراقه ؟


ابوياااااااااااااااااااااااااااااااااا
الله يرحمه كان اعظم راجل فى الدنيا اجمل راجل فى الدنيا فرق معايا كتير عدم وجوده




16.   ما هى أكتر أكله بتحبيها ؟
وهل تجيدين الطبخ ؟
ههههههههههههه الاسماك طبعا  المكرونات بقى والمعجنات والجتهوهات
يا خراااااااااااااابى جوعت والله استنو هاقوم اضرب اى حاجه كده واجى تانى
هههههههههههههههه
على فكره بموتتتتتتتتتتتتتتت فى المايونز اى حاجه بلطعه عليها هههههههههه
اه شاطره فى الطبخ جدا وبحب افتكس بس مابحبش وقفه المطبخ وتضييع الوقت فيه الحقيقه
اصل بعد التعب الاكل بيتاكل ويتصرف ولا كانى عملت حاجه هههههههههههههههه





17.   ما هو أصعب موقف قبلك فى حياتك ؟


على فكره السؤال دا رخم ياعنى لامؤخزه ههههههههههههههههه



هما اتنين بس هاكتفى بواحد علشان مابقاش كدابه
هههههههههههههههه
لما بنتى كان عندها سنه ونص واتكسرت واكتشفنا عيب خلقى فى الرجل والدكتور قال لازم نعملها عمليه ترقيع عضم وهانخد العضم من الحوض عندها
حسيت بعجز شنننننننننننننننيع وماكانش فى اؤدامى اى حاجه ممكن اعملها غير اللجؤ لربنا عظم شأنه جلا جلاله وعمره ماخزلنى




18.   ما هى بداية حكايتك مع القطط ومدى حبك ليهم؟
ياااااااااااااااااااااااه القطط دى روايه من الحاجات اللى اتغيرت فى شخصيتى فعلا
انا عموما بحب الحيوانات جدااااااااااا وبتفرج على اى حاجه تخصهم
بس كان نفسى يكون عندى كلب وانتم عارفين فى الشقق صعب
الحاج ريتشارد بقى طول عمره نفسه فى قطه هايموت
لغايه مافى مره كان تعبان نفسيا وحبيت اخرجه من المود وقولتله  نفسك فى ايه
اى حاجه فى الدنيا هاجبهالك دلوقتى
 بضحكه صفرا خبيثه قال قطه عايز قطه
ههههههههههههههههههه
وافقت وشوفنا على مصراوى ناس قطتهم والده وعايزن يبعو منهم
روحنا نجيب واحده دخل علينا القطتين عندهم 43 يوم يدئلجو
يا رببببببببببببى على الطعامه شلتهم وكانى بشيل نونو انن
ووقعت فى غرامهم وكانو ريتشى وهارتى الله يرحمها بقى
قطعت فيا
ومن ساعتها وانا بموت فى القطط لدرجه بشوفهم فى الشارع ببقى عايزه اكلهم ههههههههههه
مدى حبى انهم اولادى انا دلوقتى عندى 4 ولاد
القطط حيوانات صاحبه شخصيه ناعمه موديه جدا زى حالاتى
اكتشفت ان فيها كتير منى هههههههههههه
بيقولو عليها غداره وهى مش كده خالص هى مزاجيه جدا
نقيض الكلب مش اى وقت عايز يلعب معه يلعب لالالالالالا
لازم هى تيجى وتطلب اللعب معاك ههههههههههه دماغ






19.   أخبار الحاج ريتشارد إيه ؟


ههههههههههههههههههههههه تمام الحمد لله بيسلم عليكم كلللللللللللكم
بس الحقيقه كان بيعانى امبارح من مشكله لان مانشستر كان غلبه 4 \2
وهايحاول يتغلب عليه النهارده يارب معه يارب


المجموعه الثانيــــه
أسئلة تتعلق بالتدويــــن
 1.      سر خفة دمك هل هي وراثة فنحيلك لأساتذة الوراثة يدرِسوكي ويستخلصوا خفة دمك كبسولات وعلى راي (طير انت ) لازم ماما نحلة كبيرة ، ولا خفة دمك نتيجة لنظرية فلسفية في الحياة الدنيا فنعرفها ونلتزمها .... وما رد فعل مستر ريتشارد على خفة دمك

ههههههههههههههههههه والله كتر الف خير صاحب السؤال دا لانه اعتبرنى دمى خفيف
والله ماعرفش ولو انت شايف دا فا دا اسلوبى العادى فى حياتى وهى هى طريقه كلامى وتعليقى على الناس والدنيا مش اكتر



اما عن الدكتور والكشف والحاجات دى لالالالالالا كله الا كده احنا ماعندناش حريم يتكشف على رجاله
ههههههههههه الحاج يزعل كده



اما عن الحاج وخفه دمه  فهو زى اى زوج مابيشوفش ان مراته طفره بشريه وخفيفه الدم الحقيقه هههههههههههه
هو دمه خفيف جدا ان كنت انا قيراط هو 24 قيراط ومعروف عنه سخريته الشديده من اى حاجه
هو من الناس اللى بيشوف الاتوبيس ماشى بالمشقلب ههههههههههه
فايمكن علشان كده ماببنش جنبه


2.      قالت له كلمنى عن الموت ترى ماذا ستكون اجابتك قالت له كلمنى عن اليأس فماذا ستكون اجابتك قالت له كلمنى عن الحزن قالت كلمنى عن الفشل قالت كلمنى عن الالم قالت كلمنى عن السراب قالت له كلمنى عن البلاء قالت له كلمنى عن الندم قالت له كلمنى عن الدموع قالت له كلمنى عن المرض قالت له كلمنى عن نفسك فياترى يا قلب قطة ماذا ستكون اجابتك ؟



الموت اعظم حاجه على الارض فى احساسى بيه وفى وقعه عليا
بحترمه اكتر منى شىء ممكن تتخيله لانه الحقيقه الوحيده اللى ماينفعش فيها جدال



اليأس عجزبكرهه بكل مافيه
الحزن انسانيه  وعلى رأى  كظومه ان الانسان بلا حزن ذكرى انسان
الفشل امل فى النجاح
الالم يااااااااااه عندى فوبيا الالم شنييييييييييع
السراب حلم يرقى لدرجة الوهم
البلاء ام الابتلاء؟
البلاء كرب والعياذ بالله
الابتلاء نعمه نسال الله عز وجل ان لايحملنا مالاطاقه لنا به



الندم بقايا ضمير



الدموع راحه بس انا مابحبش اعيط اؤدام حد الحقيقه



المرض رحمه وتكفير من رب العالمين
ربنا يعافى كل عباده
والحاجه الوحيده اللى بخاف منها بعد ربنا عز وجل


3.      ما هى أكتر حاجه خلتك لجئتى للتدوين ؟
ههههههههههه انى اكون وسطكم اخر حاجه كنت اتخيلها انى اكتب  حاجه حد غيرى يقراها ويقولى رأيه
بقت نوع من الفضفضه  معاكم لان اى حاجه بكتبها مش من نوع ابداء الرأى
لانى مابكتبش حاجه مهمه ارائى بقولها فى ردودى عندكم
الحاجات المهمه اللى عندى ممنوعه انى اكتبها بناء على طلب من امى خوفا عليا من الكلام فى السوياسه ههههههههههههه امى بقى ياناس لازم اسمع كلامها   


4.      هل تستخدمين التدوين كترفيه و متعه ومكان لتجمع الأصدقاء الحلوين أم أنه رسالة يجب عليك توصيلها إلى الناس أم أنه طموح ما فى خيالك ؟


 يا خراشى ايه الكلام الجامد دا هههههههههههههه
بالنسبه ليا مجرد كلمه وحده اكتبها تضيف بسمه لحد فيكم او فكره دى رساله ومافيش حاليا حاجه ممكن  اقدمها ليكم احسن من كده
انما اساسا اساسا قهوه هى بالنسبه ليا قعده حلوه معاكم نتكلم فيها بيت بستضيف فيه اصحابى
ودا كافينى لحد دلوقتى
او اجنده مفتوحه ليكم بتقرو الشخبطه بتاعتى من خلالها

5.      لماذا تشعرين بالسعاده عندما تقرأين تعليقات بعض أصدقاءك رغم أنك تدركين تماما أنها من باب المجاملات فقط يعنى تجاملينى فى فرحى اجاملك فى فرحك وعادة معظم المدونات كده؟


دا حقيقى الا ماندر فى حاجات وناس بتعجبنى بجنون وبقولهم رأى بجد وبيبان انه مش مجامله
بس حتى المجاملات بتسعدنى الكلمه الطيبه صدقه وبترفع من المعنويات دا حقيقى حتى لو عارفه انها مجامله وفى الاخر احنا اغلبنا هواه مابتعملش معاكم كلكم على انكم محترفين كتابه
فالبتالى اغلب ارأى بتكون مش مجامله والله العظيم تلاته

6.      متى تتخذين القرار بالتوقف عن التدوين ؟ وما السبب؟


مش عارفه الحقيقه بس اكيد هايحصل دوام الحال محال
انا الاسبوع اللى فات اخدت قرار بقفل المدونه علشان اتفرغ لمتابعتكم زى زمان
بس ماكانش جاد القرار مجرد فكره بس امتى هاتتنفذ الله اعلم





7.      لماذا لم تسجلى  الخواطر و الشعر بصوتك خاصه انى سمعتك وانتى بتقوليه كنتى هايله ؟
هههههههههههههههههههههههه
يا منمونه انت طلعتيها فى دماغى ههههههههههههه الله يسامحك
بصى ياستى انا مابعتبرش صوتى حلو علشان اتجرء واعملها ولا ادائى
مش عارفه
بس دايما بقول التجربه هى الاثبات وماله اجرب وانتم قولو نكمل ولا لاء
المشكله ان الاستندر بتاعى هو استاذى فى التدوين اللى من النوع دا تركيب
ولازم لما اعمل شغل اعمل شغل فى نفس مستواه ودا صعب ومرهق عايز حد غاوى
بس نجرب ربنا يسهل




8.      يا ترى  أول قصيدة كتبتيها كانت ايه و لمين؟


 كتبت كتير وانا فى المدرسه بس ما احتفظتش بولا حاجه
اللى اقدر اقول عليها بجد هى السيد انور ابويا وطبعا كانت لابويا

9.      ما هو رأيك فى جايدا العزيزى كمدونه ؟
جايدا المدونه هى هى جايدا الانسانه بتكتب بقلبها ومشاعرها
ربنا يكرمها و  ييسر لها الحال يارب




10.      هل أنتِ كنت مخططة تعرفينا الأول وبعدين تعملى مدونة ولا فكرة المدونة جاتلك ازاى ؟

لالالالالالا خالص انا اساسا علاقتى بالتدوين بدأت عند تيكو عالم تركيب لانه كان عشره الصراحه وفنان حقيقى  ربنا يباركله وكنت بتابعه من هناك بقيت ادخل عندكم واقرا واتابع
بس بردو ماكنتش ناويه افتح مدونات خالص لحد مالقتكم بتشجعونى قولت وماله
نفعت نكمل مانفعتش نقفل ابوها ونشمعها وافضل معاكم كامتابعه
بس ماقدرش انكر انها ساعدتنى كتير فى متابعتى ليكم و عرفتنى على مدونات اكتر وبالتالى استفدت اكتر
قررت افتحها لما ست الستات ستيته عملت الواجب بتاع اسرى 67 حاسيت انى لازم اشارك ولو بكلمه
لانه يخصنى بجد وكان الحمد لله





 11.      هل ياترى الحج ريتشارد مش بيغير من نشاطك التدوينى والنتاوى
وماقصدش من ده انو منفسن من موهبتك كلا الفته هههههههه ولكن قصدى مثلا
بتتواصلى مع رجال وكده وتعليقات ولقاءات مبيقوليكيش مثلا لاء متكتبيش فى
المدونه مترديش على رجاله او تهرجى معاهم وما الى ذلك ههههههه ؟؟
ههههههههههههههههههههههههههههههههههههههههههههههههههههههههههه
قلبى حاسس ان السؤال المهنج دا من حد كان معانا فى تجمع مش عارفه ليه
هههههههههههه
نعم مابيغرش !!!!
 دا لو ماغرش عليا تبقى وقعته ولا بلاش ههههههههههه
طبعا بيغير وجدا كمان بس عموما مش من النشاط التدوينى بمعنى انا طول ما بكتب هو مابيقراش الحقيقه نادر جدا
بس صدفه وكتبت حاجه مره قراها مارداش يخلينى انزلها وقالى معانيها  قويه اوى بلاش علشان متجرئيش حد عليكى
طبعا انا مش معه فى رأيه بس بحترم كلامه جداااااااااااا ولازم اسمعه
وفوق راسى وانا راضيه جدا ومابقفش ادبدب واعيط لو قالى مثلا لاء ماتروحيش اللقاء دا
دا حقه زى ماليا حقوق عليه بيعملها
اما اللقاءات ومايلنا الرجاله
هو حضر  3 لقائات فى اسكندريه الاول كان خايف عليا ماقدرش انكر دا وحقه وانا ماليش غيره اساسا يخاف عليا
احنا مهما كان ماكناش نعرف الناس اوى
لكن لما شاف الناس عامله ازاى وبتتعامل بكل ادب واخلاق وخصوصا انه بيعرف الناس من عنيهم ابتدى يطمن
وعمرى ما هانساله انه نزل مخصوص يوم مارامى مدونة بابى جه لمجرد انه حس انى عايزه ارحب بالانسان دا
ولما شافه اتعامل معه بقى ليه مكانه خاصه عنده واطمن اكتر عليا
ماليش معاملات مع رجاله من اى نوع غيردا
لانى مش بكلم اخوانى المدونين على الماسنجر والنت وكده فالبتالى  مافيش مجالات غير اللقاءات
وهو بيكون موجود  وخصوصا ان اغلبها فى الخير الحمد لله






وهو كمان عارف ان معملتى بتبقى فيها نوع شويه من الرجوله ههههههههههه
وانى صحيح عشاريه  جدا وبحب الناس جدا
بس فى نفس الوقت حاده الطباع ودا بيريحه كتير بردو



وبردو ماقدرش انكر ان فكره انى فى لقاء دى وبكلم اخوانى المدونين بتخليه يغير بس الغيره العاقله اللى فيها ثقه
وبيتفهم والدليل انه ودانى لقاء القاهره  ولوحدى انا نفسى ماكنتش مصدقه
ولوحلفولى على المياه تجمد ماكنتش صدقت
فى النهايه هو حابب ان يكون ليا وقت مستقطع فى الحياه  يكون بتاعى
وهو حس بختلاف كبير فى شخصيتى من ساعه التدوين او خلال ال7 شهور دول
ما انكرش انه صعب عليه لكن كتر الف خيره بيحاول يريحنى
ويوم مايبطل يغير عليا ويدينى الوصايا العشر هاعرف انه  بطل يحبنى وان فى حاجه غلط
ربنا مايحرمنيش من غيرته يارب ابدااااااااااااااااااااااااااا


والله دى فرصه جميله اشكره على كل حاجه بيدهالى ستات كتير بتحارب علشان تخدها
ربنا يخليك ليا وانت عارف بقى نيههههههههههههههههاااااااااااااااا





بشكركم من كل قلبى والله اسألتكم كانت حلوه اوى
جاوبت عليها بصراحه جداااااااااااااا
وجاوبت وانا مش عارفه مين اللى سأل بس من الاسلوب كنت بخمن
ههههههههههههه ما انا سوسه بردو


بشكر ايمو اوى تعبتها معايا اليومين دول وجننتها بس هى كالعاده استحملتنى


وبشكر ويكا وبقوله برغم اختلافنا الفكرى الا انى بعزك واحترمك


كتر خيركم كلكم ويارب ماتحرمش منكم ابدا


وليكم عندى رد لما اشوف كلامكم بقى فى التعليقات
مش عارفه انا ايه ام السريه التامه  دى حسستونى كأنى مارو الهجان هههههههههه
وختامه مسك
أسأل الله لكم العافيه والخير وصلاح الحال


انتهى


مارو قلب القطه

هناك 59 تعليقًا:

مصطفى سيف الدين يقول...

سعدت بالتعرف عن قرب لشخصيةتملك خفة دم وعقلية جميلة
ربنا يسعدها ويبغها امانيها
بالرغم من اني باختلف معاها في حبها للقطط ( باقرف من القطط ):(
الا انها شخصية جميلة وطيبة
نورتي يا مارو اجاباتك في منتهى الجمال
تحياتي وتقديري

ويكا يقول...

على قد ان الاسئله كتيره وفى الصميم

والاجابات صادمه لى من ناحية جودتها وبساطتها واظهارها لشخيصه لاول مره بحس انى بكتشفها الا انى استمتعت جدا بقراءة الاجابات .

انا لا استطيع فى الغالب الاستمرار كثيراً فى قر اءة مقال طويل جداً الا فيما ندر ولابد للمقال ان يكون جذاباً جداً حتى لا اصاب بالملل واتركه.

الا انى اصدق الجميع القول انى لم استطع ترك الاجابات الا بعد قضيت عليها :)

وهذا ساعدنى كثيراً اثناء تنسيقى للبوست فأنا امل بسرعه جداً فى التنسيق المبدئى ، الا انى لم اشعر بذلك هذه المره



ما اريد ان اقوله الان هو انى الان وثقت اكثر فى ان الفكره هذه ستساعد كثيراً فى تقارب المدونين وفهمهم لبعضهم البعض وتذويب وتقريب المسافات بينهم.

انصخكم بالقراءه الكامله للاجابه لتستخلصوا مثلى اننا لابد من قراءة الاخرين بتمعن قبل اصدار اى احكام عليهم حتى ولو بعد فتره من العشره.
لابد من السماع لهم جيداً

ويكا يقول...

مارو

على فكره انا اكتشفت ان مفيش فروق فكريه ولا حاجه

هى ممكن دلوقتى اسميها فروق فقهيه بس

انا ممكن اكون عارف حكم فقهى انتى لسه ما عرفتهوش او العكس انتى عارفه وانا لسه ما اعرفوش.

هو ده اللى طلع فى الاخر
اما اللى انا استشفيته اننا متفقين على ان الحكم لله ، والفتوى لاهل الفتوى ، ولو حاجه حرام تبقى حرام وحلال تبقى حلال حتى لو احنا ما بنعملهاش ، بس ده مش معناها ان حكمها يتغير على حسب هوانا.

بس

سعدت جدا بتشريفك اول ضيفه معانا.

باحث عن حب يقول...

يارب يحافظ عليكى يارب
وانتى جاوبتى على سؤالى خلاص مع انى سألته متأخر

mrmr يقول...

على قد ما الاسئله كتير على قد ما انك جاوبتى وبجداره
احيكى على طولت بالك
وقد ايه كنت سعيده جدا وانا بقرا اجاباتك وعرفت قد ايه انك انسانه طيوبه قوى وجميله قوى داخليا وقلبك ابيض ذى اللبن الحليب
ربنا يسعدك يارب

من كل بستان زهرة يقول...

يا قطقوطه يا جامداااااااااااااااا
امتياز مع مرتبة الشرف
ايوه كده رفعتي راسنا ومشمتيش حد فينا

ياصبرك يا مارو قدرتي تجيبي نفس منين تجاوبي على اسئلة التعذيب دي

بس انتي بجد زي العسل
يارب يفرحك دايما ويخليلك الحاج والأولاد

م. حجاز يقول...

ربنا يهنيكى ويسعدك دايما يارب
احسنتى الاجابات بحييكى

لــــ زهــــــراء ــــولا يقول...

مــــــــــارو

الله ... الله .. الله

الله عليك يا حبيب والديك فاكره الجمله دى يا ماروووووو هههههههههههه

بصى بصراحه كده تخيلت شكلك وانت قاعده تكتبى فى الاجوبه وجنبك فنجان القهوه المحترم وياسلام بقى لو معاه حتة كنافه بالمانجو تبقى فله شمعه منوره

انا مش عارفه اعلق على ايه او ايه انتى عارفه انك عشرة الايام الجميله والضحك الصافى اللى خارج من القلب ...

عاوزه اقول حاجه على الحاج ريتشارد بصرحه هو شخصيه طيبه ومحترمه جدا وفاكره ايام ما كنا نسهر مع بعض فى سايت القاهره اليوم وكان يشجعك ويحل معنا يااااااااااه كانت ايام

اقول حاجه مارو اكيد نسيتها لكا جيت اشتركت معانا فى السايت كنا مجموعه اصحاب واصدقاء وهى جديده علينا وفجاه باسلوبها حسنا انها حد قريب مننا وكاننا نعرفها من زمان ودخلت فى وسطنا بكلامها اللذيذ وروحها المرحه ....
ادعو الله من قلبى ان يحفظ لكى اسرتك الكبيره والصغيره وتحققى كل احلامك ويارب عمووووور الامووور يرجع قريب من تانى

نسيت صحيح اجابتك واضحه انها من قلبك بجد وانتى فعلا انسانه كده بتتعامل بقلبها وبنت بلد جدعه ان شاء الله نتقابل عن قريب ....

زهراء

محب روفائيل يقول...

هههههههه أسئلة واجابات جميلة جدا

وبجد حاجة مية مية

تقبلوا مرورى

Mona Hekal يقول...

حبيبة قلبي يا ماااااررررررررووووووووو
و الله انتي عسل و من غير ما تجاوبي و جو احنا مبسوطين اننا عرفناكي اكتر و الحوار ده انا بحبك من غير ما اعرف حتي عندك حاجة
صبااااااااااااح الفل

طيوري يقول...

اجي هنا باي وش بعد ما قلتي عني كده اكيد هاتضرب ووزمان الناس كلها عايزة تنتقم مني
ربنا يسامحك يازعيمة ....انا؟
ده انا طيبة ومافيش مني وبحبك
ده في وسط معجبينك
اما بيني وبينك ليكي يوم نبقى لوحدنا ومحدش يرحمك مني وساعتها ابقى خلي معجبينك ينفعوكي
(وش طيب اودام الناس بس مكشر عن انيابه)
كل اللي قلتيه ده انا عارفاه طبعا
وفي اكتر منه كمان انا عارفاه عنك عشان كده بقول للناس انهم برغم كل ده ما يعرفوكيش
بس في سؤال محدش ساله انا بقى هابقى اساله ليكي وبالخرزانة هاتجاوبي

Ramy يقول...

هههههههههههه

انا طبعاً كُنت محظوظ

ان اول تجمع تدوينى ليا مكنش فيه حد كتير

و كان فى أسكندرية

و أتعرفت ع الحاج ريتشارد و ريتشاردية (:

و الأخت أيمان الحب الجميل
و بنتها علياء (:

فبجد عرفتهم و زى ما قالت و اكتر هما ناس زى العسل بجد اهل اسكندرية
مية مية

(:


ربنا يوفقهم و يخليهم لبعض

و يفرحكوا بأولادكم يارب

Ms Venus يقول...

ورداااااية جميلة وعسولة لاحلى ماروووووووووووووووو

eng_semsem يقول...

تحيه كبيره تستاهليها عن جداره حنا اتعرفنا عليكي وحسينا بكلامك وربنا يكرمك ويخليكي لجوزك اللي من كلامك حسيت انت بتحبيه قد ايه وربنا يرحم والدك ويسكنه جنات النعيم
تقبلي تحياتي

nasamat يقول...

يا لهو بالى يا ولاد
مارو فى اللجنة
جلبى عيفوط منى يا ولدى
اول ماعرفت خت ديلى ف سنانى وربطت القمطة وجيت جرى
عشان اقف على باب الفصل لحد ما تخلصى وتفيشى الهوامش
بس انتى قدها وقدود عشان انتى بت بلد جدعة واصيلة وصاحبة اصحابها
والاهم ان كلامك كله طالع من القلب عشان كده دخل القلب على طول
لكن تعالى هنا
ماهو لازم ناخدها تقسيم وضحك مش لازم ناخدها قفش الدنيا مش مستاهلة تجيبها كده تجيلها كده هى كده
الخطة هتفضل زى ما حطها الكابتن حوكشا 4/2/4 ههههههههههههههههههههههه
للاسف ملحقتش اجى قبل كده وابعتلك سؤالين
بس كنتى هتفقسينى برضه
ربنا يسعدك يا مارو ويحليكى لكل حبايبك وصحابك وجيرانك والمجتمع والناس

غير معرف يقول...

ناريمان
مار
قلب القطة
هههههههههههه


السؤال الرخم دا بتاعى ولو مؤخزة حضرتك
هههههههههههه
تفتكرى حد زى يعنى هيسأل يقولك ايه غير حاجه تفكرك بالنكد
هههههههههههههههه

مش عارفه اعلق الصراحه
طيب هقول ايه
وكل اللى عايز اقولهولك انتى حاسه بيه وعرفاه يا اوختى

فاكرة عصير الجوافه بالمايونيز
هههههههههههههه

دا انتى مدمنت مايونيز
الله يخرب عقلك

لما ازورك هجبلك عشروميت ازاة مايونيز
تضريبهم لوحدك
هههههههههههه

انتى جننتينى بس ؟؟
دا انا كنت بشد شعرى منك
وكنتى بتصعبى عليا
وكل ما أجى أقول
افتكر التنبيهات واللوائح والقوانين الموضوعه من قبل الجهات العليا
طبعا اللى هو
ويكا باشا
اتراجع وأخاف الا اتعاقب
ههههههههههههههه

بس الحمد لله قدرت أمسك نفسى
بغض النظر عن المغريات اللى كنتى بتقدميهالى
هههههههههههههههه
عصير
باكو باسكوت
شيكولاتيه
بس على مين
هههههههههههههه

وجتى فى الاخر لما كنت هضعف
واقولك
جه هنا دورك البطولى
وصعبت عليكى
وقولتيلى لا خلاص
بس بشرط
تقمى الصبح بدرى تنزلى الاجابات
وفعلا
الموبايل يرن الساعه 8 صباحا
وتقوليلى قومى انجرى من شعرك يلا نزلى الاسئله اناااااا استويت خلاص
ههههههههههههههههههههههههههههههههههههههههههههههههههههه

ولما نزلت الاسئله كان فضلك شوى وتيجى تضربينى انا وويكا
ههههههههههه

بس طلعتى شاطورة
قدها وقدود يا بنت بلدى
يا اسكتدرانيه يالى مالكيش زى فى طعمتك ودمك الشربات

ربنا يخليكى ليا
لو لفت الدنيا كلها مش هلاقى اخت وصديقه بمعنى الكلمه
ولا كلمه هتوفيكى حقك فى احتوائك ليا لما بكون مضيقه

بحبك اوى يا مارو
عينى دمعت
يلا يا بت أمشى

Haytham Alsayes يقول...

هههههههههه
طيب لو شاطرة وبتخمني جامد كدة قوليلي انا سالت اهنوا اسئلة هههههههه
خمني بقي

اجابات روعة تنم عن شخصية جدعة كأغلب السكندريات
وطبعا اللي عجبني في كل دة الحاج ريتشارد
بجد شخصية جميلة ربنا يخليه لكي ويبعد عنكو العين الوحشة ان شاء الله

وكدة عاوزة تقفلي المدونة لييييييييه
مطلعهاش في دماغي اليومين دول بالذات
لا لازم نكتب وبعبر عما بداخلنا يمكن الكلمة دي تفرق في ناس تانية غيرنا
وانتي طبعا عارفة ان النت مجال مفتوح وفي ناس كتير ممكن تقرأ وتستفاد واحنا كمان نستفاد

اتشرفت بيكي جدا في اجتماع المدونين الوحيد اللي روحته
وان شاء الله لو ربنا قدر ممكن نتقابل تاني علي خير

سلامي للحاج
وربنا يبسطكم دايما ويخللي الاولاد وتشوفيهم احسن ناس في الدنيا


تحياتي

ستيتة يقول...

ده اول موضوع طويل جدا محسش انه طويل من اساسه
استمتعت جدا بمعرفتك اكتر واكتر

نشكر السادة "حلو الأسلوب الرسميييين ده على رأي محمد رضا" القائمين على بيت المدونين لأنهم استضافوا مسز ريتشاردي مبدأيا ولأنهم فرغوا كل الكلام ده

تحياتي يا ابلتي ورحم الله باباكي ورزقنا وإياه الجنة

gogo!sf يقول...

مارو
اكتر حاجه بحبها فيكى صراحتك وجرائتك المحترمه جدا

بجد انتى حد جميل اوى اوى ومميز جدا

وعلى فكرة بقى انا مش بعرف اجامل نهائى
يمكن دى اوحش حاجه فيا

انت جدعه جدا وبنت بلد اوى
ومش عارفه اقول حاجه الحقيقه

بس بالنيابه عن اهل البيت وبعد اذنكم جميعا
شرفتى جدا جدا بيت المدونين يا مارو

richardCatheart يقول...

مصطفى سيف يقول...

بشكرك جدا يا مصطفى كلامك طيب جدا والحمد لله ان الاجبات نالت اعجابك دى حاجه تشرفنى

ويارب يحققلك كل امانيك انت كمان

بس على فكره القطط من انضف الحيوانات فى الدنيا ان ماكانتش انضف حيوان حيوان انيق ومنمق وبيهتم بنضافته جدا

لازم ادافع وابقى حارس مرمى للقطط ههههههه

اشكرك

richardCatheart يقول...

هههههههههه كلامك كتير عليا يا ويكا هو رايك اللى صدمنى الحقيقه هههههههه


اشكرك جدا على كلامك دا من ذوقك والله والحمد لله انى ماكنتش سبب تعب وملل ليك لان الموضوع كان طويل اوووووووى وانا استهبلت وجاوبت بستفاضه

معاك طبعا ان الموضوع هايقرب الناس هنا كتير اوى من بعض ودا فى حد ذاته شىء جميل

الحمد لله ان الاجابات نالت اعجابك
اشكرك

richardCatheart يقول...

ويكا يقول...

ههههههههه والله انا شايفه اننا مختلفين مش فى الاحكام الفقهيه لانها ثابته احنا مختلفين فى الاجتهاد واصدار الفتاوى

انما طبعا متفقين جدا ان الحكم لله والفتوى لاهل الفتوى الاصحاء منهم

انا كمان والله سعدت جدا بوجدى معاكم
وتعبكم معايا

اشكرك وكتر الف خيرك

richardCatheart يقول...

محمود(باحث عن حب) يقول...

هههههههههه والله كان نفسى اعرف مين اللى سأل من باب بس الفضول وكان نفسى اعرف ايه سؤالك ههههههههه

ربنا يخليك يا حوده يارب ويبارك فيك ويفرحنى بيك ان شاء الله وبنجاحك

اشكرك جدا يا حوده

richardCatheart يقول...

mrmr يقول...

مرمر حبيبى هههههه والله انت اللى احلى واطيب مرمر فى الدنيا

ربنا طول بالى علشان كان نفسى البرنامج ينجح ويحقق جمنهور كبير ههههههههه

ربنا يخليكى ليا يا احلى مرمر

richardCatheart يقول...

من كل بستان زهرة يقول...


فلورا يا قوييييييه وكلها حنيه ههههههه

ههههه تعذيب تعذيب يا فلورا والله

بس هاعمل ايه كان لازم احقق حجاتين الصراحه والبساطه علشان ماتزهقوش
والحمد لله ربنا ديما بيسترها معايا
ههههههههههه

ربنا يخليكى يحلى فلورا فى البستان
اشكرك اوووووووووووووى

richardCatheart يقول...

م. حجاز يقول...

اشكرك ويسعدك يارب والحمد لله ان الاجابات نالت اعجابك والله

شكرا جزيلا

richardCatheart يقول...

لـــولا وزهـــراء يقول...

هههههههههههههههههههههههههه

الله عليك ياحبيب والديك هههههههههههه
طبعاااااااااااااااااااا
دى علامات يابطتى مابتتنسيش ابداااااا

هو فعلا كان فى قهوه بس ماكانش فيه كنافه اععععععععععععععععععععع

كلامك جميل يابطه بين سطورك حنين الذكريات وشجنها
كل دا مابيتنساش لانه محفور فى الذاكره الحلوه والقلب ايام يارتها دامت


اشكرك يابطتى انت عارفه غلاوتك عند محمد مش محتاجه اقولك

ربنا يحفظ انت كمان وكل حابيبك ويسعدك ويفرح قلبك يارب
اشكرك يابطتى على كلامك الحلو اوىىىىى

richardCatheart يقول...

الكاتب محب روفائيل يقول...

اشكر حضرك جدا انت شرفتنى بوجودك فى موضوعى والحمد لله ان لاسئله والاجابات عجبتك

شكرا جداااااااااا

richardCatheart يقول...

Mona Abo - Elso3od يقول..

مسا الجمال على منمون السكر ههههههههه

ربنا يخليكى يا منى والله ماعرفه اقولك ايه
اصلك لسه مكلمانى ههههههههههههههه

بجد انت من الناس الجميله اللى ربنا انعم عليا بها وبدعى لايمو لانها السبب فى المعرفه دى

انا كمان بحبك اووى من غير ما اعرف عنك حاجه بس دا مايمنعش انى اعرف بردو ههههههههههههه

اشكرك يا منمونتى ربنا يخليكى

richardCatheart يقول...

قرفة يقول...

يالهوتى ابلتى جات خبونى خبونى هههههههههه
ههههههههههههههههههه
مش قادره يا قرفه والله انا عارفه نفسك فى ايه كمنناهههههههههه

وانا قولتلك من غير خرزنات هاقر واعترف
ههههههههههههه بس هاتستحملى يا ابله
هههههههههههههههههههههه

انت وشى الحلو اللى بيشدنى ويقومنى ويرجعنى تانى يا ام هانى هههههههههههه

ربنا مايحرمنيش منك

richardCatheart يقول...

Ramy يقول..

يا ابو الرام داحنا اللى محظوظين والله

بمعرفتك احنا مش كل يوم بنقابل ناس قلبها وشخصيتها زيك انت عارف ومتأكد
من ماعزتنا ليك وانك اخ عزيز فعلا علينا

والحج بيسلم ياعمنا

اشكرك على كلامك الجميل اللى زيك

richardCatheart يقول...

Ms Venus يقول...

الله بادم وردك ظهر تانى يبقى انت رجعتى تانى يا فيو ربنا يخليكى ويفرحنى بيكى ويسعد قلبك
شكرا ياحلى صاحبه ورد

داليـ ـ ـ ـ ـ ـ ــــا يقول...

وجول
وجوول
ووووووووووووووووووووجوووووووووووول
جميله الاجابات والله يامارو
واتعرفنا على شخصيتك اكتر
ويكفى خفة دمك
بس اجاباتك على سؤالى تمام
كان نفسى اتدخل واغوط فى السؤال بس قولت خليه يخص التدوين
يالا معلشى المره الجايه

richardCatheart يقول...

eng_semsem يقول...

ربنا يخليك يا سمسم يارب انت اللى احسن والله

واشكرك على الدعوه الحلوه دى ويارب يتقبل منك يارب

اشكرك يابش مهندز ههههههههه

richardCatheart يقول...

nasamat يقول...

ههههههههههههههههه خالتى جات فيشت ياست الكل والامن مستاتيب والحمد لله هههههههههههه

احلى حاجه فيكى خفه دمك وتقسيمك الشربات ودماغك العاليه يا نوسه ههههههههههههههههه

ربنا يخليكى ليا ومايحرمنيش منك ابداااااااااااااا ونفضل مع بعض على طول كلنا يارب يابنت الحته يا اصيله

richardCatheart يقول...

الحــب الجميـــل يقول...

ايوان يا فندى مالك محسسانى انى فى الفصل وبينادو عليا وانا عمله نصيبه هههههههههههههههههه

والله العظيم؟؟؟؟؟؟؟؟؟؟؟
الحمد لله انها جت فييكى هخههههههههههههههه
فى بيتها

والله يا ايمو بجد تعتبك انت عارفه انى فضوليه والفضول بيقتلنى بس انت كنت جدعه واستحملتى تعذيبى وتهديداتى الدانيئه هههههههههههههه

بس بردو مش هانسالك تسمعى كلام ويكا وانا لاء هههههههههههههههه
وقعتك بيضه زيك يابت هههههههههههههه

ربنا يعلم غلاوتك عندى يا ايمو
وماتنسيش تتوصى بالمايونيز علشان اختك ظروفها صعبه ههههههههههههه

ربنا يخليكى ليا ومايحرمنيش منك ابدااا
ويفرحك بلولو يارب

richardCatheart يقول...

Haytham Alsayes يقول...


هههههههههههههه بقى كده يا ابو الهيثم اخلص من امتحان ادخل فى التانى هههههههههه
بلاش لاتلبس فوشك غلط هههههههه

ربنا يخليك يارب يا هيثم انت اللى بجد جدع ومن الناس اللى ليك ماعزه عندى وانت عارف دا اكيد

ثم لما انت تقفل اللى المدونه امثالى انه يشو ذرا ياعمنا هههههههههه

اوعى تفكر بجد انت بتفيدنا بشككل انت مش متخيله وبتمتعنا باسلوبك جدا
اوووووووعى سامع اووووووووعى اهو

عجبك انت الحاج طب لما نشوف كده هاتعمل ايه مع زوجه المستقبل ان شاء الله ههههههههه ربنا يهنيك وافرح بيك يارب
واشكرك على الدعوات الجميله اللى من القلب
شكرا يا ابو الهيثم يا عزيز

richardCatheart يقول...

Haytham Alsayes يقول...
على فكره نسيت اقولك اول تجمع جاى فى اسكندريه ياريت تيجى علشان نتكلم اكتر
مع بعض لان المره اللى فاتت كانت جامده جدا وماعرفتش اتكلم معاك
اشكرك

richardCatheart يقول...

ستيتة حسب الله الحمش يقول...
يا اهلا بالتلافزيون يااهلا ههههههههه

ست الستات انا سعيده باهتمامك ومتابعتك دا شرف ليا بدون مبالغه حقيقى

انا عرفت سؤاللك بتاع النحله بعد ماجاوبته وعرفته من النحله ههههههههههه
الاسلوب المبدع مبدع بردو هههههههههه

اشكرك وسعيده انك عرفتينى اكتر
وانى بعتبر نفسى وحده من تلاميذك
وبحقد على سونى علشان بتشوفك فى الجامعه ههههههههههههه

ربنا يخليكى ليا يارب
ويتقبل دعوتك يارب
وفعلا الناس هنا تستاهل الشكر جدا
على تعبهم معايا
ماتحرمش العمر منك ياحبيبى

richardCatheart يقول...

gogo!sf يقول...

ياخرابى ههههههههه جوجو الجميل ربنا يخليكى والله كلامك كتير اوووووووووووى

انا عارفه انك بردو جدعه جدا واصيله ودا مش غريب ابدا عنك

انت الاحسن والله ربنا يخليكى يا جوجو والله البيت شرف بيكى وكل اهله اللى نورو
وعملولى حس وسند وضهر

اشكرك ياجميل يام عيون حلوههههههههههههه

richardCatheart يقول...

داليـ ـ ـ ـ ـ ـ ــــا يقول...

هههههههههههههههههههههههه اشطه يا دوداااااااا يا جميل

دا هدف للمنتخب التدوينى ههههههههههه

الحمد لله ان الاجبات عجبتك الحمد لله
بس انت سالتى قولتى ايه بس علشان اعرف هههههههههههه

وتغوطى يالهوتى اكتر من كده ايه
دوسالونى الحج بيغير وحاجات هههههههههه
بس الحمد لله ربنا ستر

ربنا يخليكى انتى اللى سكره والله وياريت ترجعى صوره سعاد حسنى من فضلك
ههههههههههه
اشكرك جدا يا داليا

richardCatheart يقول...

ههههههههههههههههههههههههههههه
هههههههههههههههههههههههههههههه
هخهههههههههههههههههههههههههههههه
اه يانى
انا ماشوفتش التعليقات غير بعد مارديت عليكم فى الاسئله والردو

هههههههههههههههههههههههه
حقيقى ماتصوريش ساعدت بيكم اللى يعرفنى واللى اول مره اعرفه هنا
بجد ربنا يخليكم رينا ويسعد قلوبكم
انا تعبت اه بس تعبكم الذ راحه فى الدنيا

كنت صريحه معاكم اوووووووى لدرجه خضه بعض الناس
اتمنى يارب تكنو مبسطوين معايا
بالبوست


كلمه لست الستات ستيته حسب الله الحمش

انت انسانه غييييييييييييييييييييييير
بجد غييييييييييييييييييييييييير

ربنا يباركلك فى اولادك يارب
بحبك اوووووووى

ツSmiLeY AnGeLツ يقول...

احلى ســــــــــــلام لاحلى مارو
ارق ســــــــــــــــــلام لارق مارو
اروع ســــــــلام لاروع مارو بالدنيا كلها
اولا
سامحيني اني ماشارت معاكم بالاسئلة والله ماكان عندي اي سؤال بقلب بدماغي طيب سؤال منها ولا منها مافي
فعذريني
ثانيا
ايه الطعامه واحلاوة والرق دي
والله حبيتك من اجاباتك وتعرفت عليك اكثر
ربنا يسعدك يارب ويبسطك وخليك دايما فرفوشة
تقبلي مروري
سلامي لاجمل وارق مارو.

richardCatheart يقول...

خواطري مع الحياة يقول...

هههههههههههههههه انت اللى جميله اوى يا رشا وكلك رقه وذوقك ربنا يخليكى ويفرحنا كلللللللللنا بيكى يارب

وياروح قلبى مايهمكيش انت سألتى ولا لاء المهم موجوده معانا ودا الاهم

لاشكرك ياقمر يا صغير اووووى

ليس فقيرا من يحب يقول...

انتى عسل وسكر وجميله بجد يا ماارو

انا اصلا من ساعه ما شوفت عنيكى المسهوكه الملونه دى وانا حبيتك اوى اوووووى

وشك الطيبه بتنط منه

ايووووون سؤالى الاهبل بتاع الغيرة وانا ايون كنت معاكو فى اللقاء بس عادى ده مش ليه علاقه بده انا بس حبيت اشوف الرجاله ممكن تغير من نشاط مراتتهم التدوينى اعتبارا لما سيكون لو النحس اتفك ههههههههههههههههههههههههه

انتى زى العسل بجد واجاباتك كلها جميله وراسيه ودمك سكر

richardCatheart يقول...

ليس فقيرا من يحب يقول...

ههههههههههههههه يا مجررررررررررررمه يا رانيا ههههههههههههههههه

عرفت لما شوفت تعليقاتكم امبارح انك انت هههههههههههههه

الؤال كان فى الجون اه خضنى فى الاول علشان ماككنتش متواقعه بس كان لازم اجاوب بصراحه

ويارب النحس يتفك عن قريب يارب
وافرح بيكى ببن الحلال اللى يزودنا ويجى معاكى التجمعات ويقعد هو والحج على القهوه يشيشوههههههههههه

والله بقى انا اللى عينى مسهوكه يا خيبك يابت هههههههههههههه
ولا انت اللى ضحكتك جنان ودمك شربات
ماتحرمش منك ابدا يا رورو يارب
وكل حاجه منك حلوه زيك
يارب يفرحنى بيكى
نورتينى يا رورو

حاجات جوايا يقول...

جميييييلة يا مارو
انتى شخصية جميلة ودمك سكررررر
استمتعت بقراءة شحصيتك
تحياتى ليكى :)
وشكرا لبيت المدونين على الفكرة وجمال التطبيق

richardCatheart يقول...

حاجات جوايا يقول...

والله انت اللى كلك ذوق جدا ربنا يخليى يا حاجات والحمد لله ان البوست عجبك دى حاجه اسعدتنى جدااااااااااااا

ولازم فعلا كلنا نشكر بيتنا بيت المدونين على التعب دا معايا ومع اللى لسه جاى

اشكرك جدا نورتينى

ليس فقيرا من يحب يقول...

يشيش وقهوة علشان اقصله رجله

يا مارو عنديش انا رجاله تشرب شيشه

ههههههههههههههه

ربنا يخليكى ليا ويسعدك يا حبيبتى

اموااااااااااااااااااااااااه

أحمد الصعيدي يقول...

عفوا أنا لم أسأل


لأنني دوما أعتقد بعدم التدخل في شأن الأخرين


عذرا


بس هو سؤال واحد

ههههههههههههه

ايه رأيك في الفكرة
ههههههههههه



انتي أكتر من أخت يا مارو وكمان إيمي أخت غالية


نورتي بيت المدونين


السلام عليكم

محمد التركى يقول...

السلامو عليكم

مارو الهجان
ههههههههههه

جامده قوى والنعمه
ايه ده انا حظى وحش قوووى فتنى كل الكلام الجامد ده من اوله
معلش بقى كنت فى غيبوبه
بس الحمد لله صحيت

ايه كل ده بلاغه وسرد للحقائق
هههههههه
بجد بجد
مارو هجان هجان ياعنى
هههههههههههه

بحد بجد انتى شخصيه طيبه جدا
انسانه صادقه فى كلامك
وخلوقه جدا
بجد انا من اول ماشفتك فى لقاء التدوينى الوحيد ليا وانا بحترمك جدا وبقدرك جدا
حسيت انك اختى بجد
شخصيتك كمان
وكمان شفت فى عيون اللى يعرفوكى حبهم ليكى
وبجد بجد
محمد جوزك راجل محترم جدا جدا
انا والله برغم من انى اتكلمت معاه مش كتير بس حبيته جدا
فعلا شفت فى عينه نظره ثقه فيكى
وحب كمان
ربنا يارب يدوم عليكم الصحه والعشره الجميله
انا بجد حظى حلو جدا انى عرفت شخصيه قمه فى الاحترام زايك يامارو

يارب ماكنش طولت عليكى
تحياتى لشخصك الطيب المحترم

محمـــد التركـــى

richardCatheart يقول...

ليس فقيرا من يحب يقول...

هههههههههههههههههههههه

لما نشوف يا اختى

كان غيرك اشطر هههههههههههههه
ربنا يسعدك

richardCatheart يقول...

أحمد الصعيدي يقول...

ههههههه العود احمد يا احمد

والله سعيده بعودتك ووجودك فى موضوعى جدا
وخصوصا بعد فتره اختفاء يارب تكون بخير

والله يااحمد اكيد عجبتنى الفكره
والا ماكنتش معكم هنا واخبارى ماليا الجرايد هههههههههه

الفكره فيها اكتر من ميزه
اولا هاتعرفنا ببعض اكتر وتقرب الشخصيات لان مش ديما الكتابه بتوضحها

ثانيا
هاتعرفنا باس جديده ومدونات جديده لاننا مش كلنا نعرف بعض

ثالثا هاتعرفنا بافكار مختلفه لشخصيات مختلفه

انا سعيده بوجدك معنا واكيد ليك زنقه هنا عن قريب ان شاء الله
اشكرك ونورتنى

richardCatheart يقول...

محمد التركى يقول...

تركككككككككككككى ابن بلدى ومنطقتى يا نااااااااااااس

هههههههههههه
اولا انت خلتنى دمعت يا واد والله كلامك دا كتتتتتتتتتتتتتتير خرقنى والله
انا ولا حتى نص دا كتر الف خيرك انت اللى عينك وقلبك حلوين وبتشوف الناس حلوه زيك

ربنا يبارك فيك ويسعد قلبك وتبطل يأس وحزن وافرح بيك عن قريب يارب

الحج بيسلم عليك جداااااا
وموصينى ابعت سلامه لكل الناس اللى قابلهم

وانت اولهم لاننا جيران والنبى اللقى عندكم بصله ههههههههههه جيران بقى


اشكرك يامحمد وسعيده اوى ان مسلسل مارو الهجان عجبك ههههههههه
ربنا يسعدك

عاشقه الرومانسيه يقول...

انا مبسوطه بالاجابات وبالبوس كله
جدااااااااااا

richardCatheart يقول...

عاشقه الرومانسيه يقول...


انا سعيده اكتر انك معايا يا دودو

ربنا بفرحنى بيكى ويسعد قلبك بس مين جاب سيره البوس يابت ركزى البوست هههههههههههه

نورتينى يا حبيبه قلبى

غير معرف يقول...

إذا الشعب يوما أراد الحياة
فلابد أن يستجيب القدر
ولابد لليل أن ينجلي
ولابد للقيد أن ينكسر

كلماتت شاعر تونس العظيم أبو القاسم الشابي
قالها من عشرات السنين .. وحققها شباب تونس الأبية

فهل شباب مصر عاجز عن تحقيق ذلك؟

تحياتي

إبن بهيـــــة

http://ibnbahya.blogspot.com/

sony2000 يقول...

يجامد يجاااااامد
وحكيتلو علي البواااااااخه اللي بواخناها عليكي يوميها
دا كنا.......
عياال
ههههههه
بجد حسيت اني عيلت اليوم دا
يلا خيييير خيييييييير
واحب اشوفك قريب

richardCatheart يقول...

sony2000 يقول...

هههههههههههه بواخه ايه ماكانش فى بواخه ولا ايتوها حاجه انت سكره يا سونى ثم انك فعلا لسه صغنونه

ربنا يسعدك وافرح بيكى يارب واشكرك على مجيك اوووووووووى