السبت، 12 مارس 2011

فى المضيفه وستيته حسب الله الحمش + تحديث






التحديث :

يا اخوانا مش كده ، الاسئله حنينه اوى وسبع اتمانها شكرا وحب وكلام من ده 

احنا عايزين اثاااااره تشووووويق 

عايزين اسألة مدونين بقى العيال اللى دماغهم سم دول هههههه


كان نفسى ما أكتبشى اسمها فى عنوان البوست

الا ان معرفتى بان اسمها مجرد ما الناس هتشوفه فى العنوان هتهتم وتيجى هو اللى اضطرنى اكتبه.

الا انى برده هتكلم كأنى ما قولتش اسمها فى الاول وهلعب معاكم لعبة عروستى 
عروستى :
اسمها : الحقيقى مش معروف لناس كتيره الا ان اسمها الحركى دايما يفكرك بخالتك ( أطاطه ) بتاعة عوكل تحس فى اسمها كده فيه حاجه من خالتك اطاطه ده ....... وانها عامله نفسها أطاطه بس هى دقرم وعارفه كل حاجه ...... فتلاقيه ادى على ستيته كده.
عروستى 
الشغلانه بالنسبالنا : زميله مدونه نفسها وامنية حياتها انها ...... تفتح محل كشرى 
مع انه صعب شويه بس ربنا يحققلها امنيتها ان شاء الله.
عروستى
مدونتها : بتدَعى فيها انها  مش عارفه حاجه ونفسها تعرف ..... مع ان ياخى لما تروح عندها تحس انها عارفه كل حاجه فى كل حاجه بس هى اللى خايفه من الحسد .
عروستى
توجهها : ماتعرفلهاش ... لانها مدوخانى وراها ادخل على تويتر الاقيها ... ادخل على المدونات ألاقيها ...... ادخل الـــ ....... هههه الاقيها ما شاء الله مش عاتقه بصراحه (ناشطه جداً ، من الاحرار يا على فعلاً).
فشكلها كده والله اعلم توجهها سياسى اقتصادى حلزونى ....... واللى عاجبنى انه خفيف الظل.
بس انا عن نفسى 99.9 % من اراءها بأتفق معاها ، يعنى زى الحكومه كده بالظبط ..... بس المره دى بجد.
عروستى
شعبيتها : اللهم لا نق ولا حسد 
عروستى
اللى بيحبوها : كتير والاجمل ان اللى بيحبوها نفسهم ناس كتير بتحبهم وده حاجه لها معنى كويس.
عروستى
بدأت التدوين : من زماااااان 
ايـــــــــــــه تاااانى ؟؟!!
ايـــــــــــــه تااانى ؟!!!

مش عارف 
مهو علشان كده جبناها فى مضيفة البيت 
واسألوها انتوا بقى ......................... يلا اللى عنده سؤال لها يبعته حالاً
بس الاول عرفتوها ؟؟!!!
هديله قدرة فول

الفكره هنا فى عجاله برده للى اول مره ييجى 

فى المضيفه بوست الهدف منه استضافة مدون و سؤاله بعض الاسئله كلها بتبقى غالبا ناتجه من معرفتنا بيه (اسئله تفاعليه بيشارك فيها كل القراء وليست اسطنبه  كالعاده  فى التيجان التدوينيه)
لذا نرجوا من المهتمين وضع اسالتهم فى شكل تعليق وسيتم غلق التعليقات مؤقتاً الى ان يتم تجميعها ونشرها بعد ذلك ولن يتم نشر اى تعليق او سؤال تم طلب عدم نشر اسم راسله بناءاً على رغبة صاحبه الا ان السؤال سيتم وضعه مع الاسئله بشكل طبيعى طبعاً










هناك 26 تعليقًا:

Unknown يقول...

يا حبيبتي يا دكتوره ستيته أنا بحبها أويييييي مكنتش أعرف اني ممكن أحب حد مشوفتوش لدرجة اني مره حلمت اني قابلتها...
أنا مش مرتبه أسأله بس عايزه أعرف هي بتتعامل ازاي مع الناس دلوقتي في حالة تضاد الآراء دي هل بالصمت ولا بالمناقشه و الاقناع؟
مش هسأل في حاجات سياسيه عشان بوستاتها أكيد تكفي.
عايزه أعرف هي بتحب تقرى أي نوع من الكتب و لو ليها هوايه تانيه غير الكتابه؟
عايزه أسألها هي بتكتب امتى و اذا كانت الكتابه بتخليها مقصره مع أولادها بما انها أم و مرأه عامله؟
عايزه أسألها امتى هيبقى فيه تجمع تدويني قاهري عشان أشوفها؟
مش هطول عن كده آخر سؤال هي ليه مش على الفيس بوك؟

في انتظار جلسة المضيفه على أحر من الجمر و شكراً لأهل البيت على المفجأه الرائعه دي.

لــــ زهــــــراء ــــولا يقول...

هادخل فى الموضوع على طوووووووووووول
الاسئله

ياترى اسمك الحقيقى ايه ؟؟؟
اشمعنى لقب الحمش فى اسمك يعنى ما هو سبب الاختيار ؟؟

اجمل كلمه بتحبى تسمعيها كل يوم

اجمل موقف مر عليكى فى حياتك كلها

امنياتك للايام القادمه


تشرفت انى تعرفت عليكى هى كانت مده قليله بس ان شاء الله الجايات اكتر


زهــــــراء

ويكا يقول...

لن يتم نشر التعليقات الى حين تجميعها ان شاء الله وسيتم نشرها فى بوست منفصل كامله باذن الله

وسيتم نشر بوست اخر بعدها يحتوى على اجابات الدكتوره على الاسئله

شكراً

باحث عن حب يقول...

مش سؤال ولا اى حاجه للدكتوره بس بجد انا احيييها بشده على امتاعنا بكل التغطيه المباشره للاحداث وباسلوب جميل جدا بتتكلم بقلبنا مش بلسانا

ستيتة يقول...

مش ها تغششوني
هههههههههههههههههههه
يا وحشين

انا طلبت في المدونة كل صاح بسؤال بخروف
اقل من الضاني مجوبش ابدا بوتيتا

شكرا يا قوم وربنا يديكم الصحة والله بتقربوا المدونين في الأيام المتشابكة دي

تحياتي لكم جميعا ويكا ومارو وايمو
هو فيه حد تاني قائم بالصرف ع البيت ولا كده تمام؟

رحلتنا في الحياة يقول...

بصراحة نفسى اسالها حاجات كتيييييير
بس هكتفى بسؤال واحد بس :)
ماشاء الله حضرتك متابعة كل حدث ولازم كل شوية بوست جديد دا مش حسد على فكرة
بس بتقدرى توفقى ازاى بين وقتك ومتابعة المدونة والتعليقات ونشر البوستات وكمان محستيش فى فترة من الفترات بملل من التدوين

Single Mummy يقول...

اجما اختيار واللة ان احنا نستضيف دكتورتى العزيزة...بس امتى نقدر نوجة الاسئلة للدكتورة؟

ويكا يقول...

single mummy

دلوقتى

تقدرى تبعتى اسالتك دلوقتى بالفعل

الناس فعلا بتبعت واحنا بنجمع الاسئله للدكتوره وهننشرها كلها مره واحده ان شاء الله

احنا مستنيين كل الاسئله تكمل بس مره واحده وبصراحه انا بالذات مستنى شوية اسئله من العيار التقيل شويه علشان احطها
هههههههههههههههههههه

مع ان فيه فعلا بس انا حاسس ان فيه اكتر
ههههههههههه

ويكا يقول...

تدفعى كام يا دوك وانا اخون الجماعه واغششك ؟؟؟

ولو ذودتى الرشوه شويه ممكن كلنا نغششك على فكره هههههه

غير معرف يقول...

ايه رايك فى القانون الموحد لدور العباده


وايه البنود اللى تحبى تأكدى عليها فى الدستور الجديد

غير معرف يقول...

ايه رؤيتك لشكل مصر القادم من الاحداث الان


تفائل ام تشائم

Mona Hekal يقول...

قبل اي اسئلة نسلم الاول
ازيك يا دكتور و احب اقولك اني سعيدة اني شوفت حضرتك كتييييير اوي
نيجي للاسئلة :
اول سؤال كنت سألته عندك في المدونة نعمل ايه في موضوع الدستور اللي مش عاجبنا و عاوزينه يتغير في حالة اذا لم يرضخ المجلس العسكري لطلب صياغة دستور جديد ؟ و هل يعني اني لما اروح ارفض التعديلات اني بكده اقر الدستور القديم و لا نضطر نوافق مع العلم ان فيه اشياء مرفوضه و لا ما نروحش خالص الاستفتاء و نمتنع لاثبات الموقف ؟
تاني سؤال هو مش سؤال اوي هو عن وجهه نظرك ازاي نقدر نطور منظومة التعليم الفاشلة اللي بتخرج واحد حافظ مش فاهم و ايه انسب نظام تعليم نقدر نطبقه عندنا في مصر في ظل الاحوال السيئة للمدارس .
تالت حاجة بقي يا رب ما تكونش اسألتي المرهقة ذهنيا ضايقت حضرتك
وتحية جامدة جدا لحضرتك

غير معرف يقول...

بتابع حضرتك من زمان يا دكتوره اختلفت معاكى كتير واتفقت اكتر الحقيقه

من متبعتى لكتاباتك لاحظت ان هناك ميل للراحل انور السادات عن الراحل جمال عبد الناصر ياترى ايه سبب الميل دا هل هو لشخص ام لحقبه زمنيه

تحياتى وتقديرى ليكى

غير معرف يقول...

انا بحبك خالص يا ستيته وبكب كل حاجه بتكتبيها

بحب كتاباتك الرومانسيه مع انها قليله اوى عندك بس جميله

بلاحظ فيها كتير مع الحب فى عقل

دا بيحسسنى انك بتحبى بعقلك صح ولا اييييييه؟؟

طيب لو صح ياعنى ايه تحبى بعقلك ؟؟؟؟؟؟؟؟

سعيده خالص اننا هانعرف من اجاباتك اكبر قدر ممكن عنك
ميرسيى يا ستيته

غير معرف يقول...

ازى حضرتك بالرغم من اختلافى معاكى كتير جدا الا ان حقيقى ليكى تقدير واحترام عندى

انا من الناس اللى بتحب هيكل وبتشوف ديما قدرته على التحليل بشكل منطقى مع وجود الكثير من الدلائل معه لمعاصرته اكتر من فتره مميزه فى تاريخ مصر

حاسس كدا بخلاف دائم من نحيتك مع هيكل ياترى ليه وبتشوفيه ازاى

اشكرك جزيلا وياريت ماكنش طولت علي حضرتك

غير معرف يقول...

دلوقت عاوزه تغشي؟

أنا بس حبيت اجي اقول كلمه

اشكرك جدا على صداقتك الثمينه(الا هيا ثمينه ولا سمينه)

وادامك اله ذخرا للمدونين والمدونات الأحياء منهم والاحياء برضو وأحياء علميا هي البيولوجي مش كدا؟

أعتبريه سؤال

Hanan Elshafey يقول...

بتشوفي ايه في عيون الناس يخليكي تعرفيهم ؟؟
نصيحة في الحب
؟؟
مظاهر الناس ماذا تعني لكِ؟؟

لــــ زهــــــراء ــــولا يقول...

اسئلتي للقمراية الدكتورة ستيتة

الاسم الحقيقي.
التخصص دكتورة ولا طبيبة ؟

ليه حضرتك اخترتي الاسم ده بالذات ( ستستة وليه الحمش)؟
بتعرفي تعملي كشري ؟ ايه سر الصنعة يمكن نفتح فرع عندنا بالقاهرة ههههه


ايه اكتر مدون بتحبي تقريله وبتحترمي فكرة واكتر مدون بتحترمية لكنك مختلفة معاه

شكرااا يا ويكااااااااااا

لولا

Noha Saleh يقول...

انا معنديش سؤال لحضرتك بس بجد انا حبيت اقولك انى بحترمك جدا ومعجبة جدا بكتاباتك وبشخصيتك اللى اتعرفت عليها من الكتابات دى

غير معرف يقول...

كلنا عارفين انك عايزه تخلصى تدريس او تخلعى من الجامعه وتفتحى محل كشرى حلو الكلام طيب قبل بقى الجامعه والتضريس هههههههههه

لو ماكنتيش بقيتى دكتوره فى الجامعه كنتى نفسك تكونى ايه


مافكرتيش تشتغلى فى الحافه عمرك


ازااااااى قدرتى تعيشى فى بلد مافهاش بحر هههههههههههههههههه

ايه اكلك المفضل

ايه اكتر حاجه بتضايقك وتحسى انك مش مركزه بسببها


ايه سبب حبك لكظومه صاحب الصوت والاحساس اللى ولا بلاش هههههههههههههه
يالهوتتتتتتتتتتتتتتتتتى



لو اتعرض عليكى وزاره ودا مش بعيد على فكره ممكن تختارى وزاره ايه تقدرى تنميها وتفيدى فيها



انا بحبك اووووووووووووووى وليكى مكانه خاصه عندى اوووووووووووى
ودماغك بتعجبنى اوى اوى اوى
لالالا كلك على بعضك حلو خالص مالث وكمان بالث اوووووووووى ههههههههههه

بتمنالك كل خير وهنا وسعاده يارب
يوفقك يارب ويطمن قلبك على حبايبك

قلب القطه

عاشقه الرومانسيه يقول...

قطه قالت لى ان التعليق اتمسح
نقول كماااااااااان ولو انى نسيت
(:


لو حضرتك يادكتوره اترشحتى لرئاسه الجمهوريه هتقدرى تعدلى حال البلد ولا هتلاقى صعوبات ووقتها فعلا هيبقى الكلام سهل والى على البر عوام
وايه هيكون البرنامج بتاعك اللى تقدرى تقدميه للناس

غير معرف يقول...

الحبيبة ستيتة
منورة المضيفة ياست الستات على راى مارو
بما ان مدونتك كانت عامل اساسى لجر رجلى لعالم التدوين فاكيد هذه المدونة مر عليكى فيها مواقف كثيرة
اكيد مواقف اثارت غضبك ومواقف فرحتك ومواقف كان لها العجب
وسؤالى لكى الان ياحبيبتى
ارجو ان تذكرى لى موقف من كلا من هذه المواقف رغم كثرتها يعنى موقف او موقفين من كل نوع من الذى اغضبك والذى افرحك ويكون مسك الختام موقف كان له عجب العجاب فى حياتك التدوينية
افتقدك كثيرا ولعل باجابتك على سؤالى وذكرك لهذه المواقف يعوضنى عن جزء صغير من افتقادك
ولكى كل الحب والاحترام

غير معرف يقول...

الحبيبة ستيتة
منورة المضيفة ياست الستات على راى مارو
بما ان مدونتك كانت عامل اساسى لجر رجلى لعالم التدوين فاكيد هذه المدونة مر عليكى فيها مواقف كثيرة
اكيد مواقف اثارت غضبك ومواقف فرحتك ومواقف كان لها العجب
وسؤالى لكى الان ياحبيبتى
ارجو ان تذكرى لى موقف من كلا من هذه المواقف رغم كثرتها يعنى موقف او موقفين من كل نوع من الذى اغضبك والذى افرحك ويكون مسك الختام موقف كان له عجب العجاب فى حياتك التدوينية
افتقدك كثيرا ولعل باجابتك على سؤالى وذكرك لهذه المواقف يعوضنى عن جزء صغير من افتقادك
ولكى كل الحب والاحترام

عاشقه الرومانسيه يقول...

نسيتى تكتبى يوم الاستفتاء ياايمى

ENG./ELSAYED,PMP يقول...

دكتورة ... ازيك :
1- أرسلت جارتك ابنتها إليكى والحاصلة على مجموع كبير بالثانوية العامة والتى تراكى مثلاً أعلى لها وتريدك ان تملئى معها استمارة الرغبات ، هذا وقد أوكلت إليكى هذه المهمة بشكل كامل ، انتى لا تعرفين الكثير عن امكانيات هذه الفتاة ولكنك من وجهة نظر عامة و مهتمة بالشأن العام سوف تنصحينها بأن تكون أول رغبة ( ..... ) ؟

2- من خلال كتاباتك فأنتى خبرتى الدنيا جيداً من بين صفحات الكتب ومن مستحدثات العصر من انترنت وخلافه ومن خبرات حياتية مختلفة ،كنتى تسيرى بالشارع فاستوقفك إعلان عن انعقاد ندوة بعنوان ( المرآة ف الأسلام ماضِ عريق ومستقبل مشرق ) يلقى الندوة فضيلة الشيخ / فلان وفضيلة الشيخ / علان ... الخ ... قررتى الحضور ... ركزتى جداً ... دماغك تكوينها علمى بحت ومنطقى تسلسلى يتبع الاسلوب العلمى ف التفكير -ولو كان الدين بالعقل لكان المسح اسفل الخف اولى من المسح اعلاه - فوجئتى بأن المشايخ سالفى الذكر اقروا بحرمانية عمل المرأة الا فى ظروف معينة ، وان الزى الاسلامى الشرعى هو النقاب ، الكلام كان علمى ومنطقى وبه جزء كبير لا يمت للعقل بأى صلة ، إتخذتى قرارك بالآتى ( .................. ) ؟

3- ما من أحد منا الإ وقال هذه الجملة ( بس لو الزمان يرجع تانى ) وغالباً لا يرجع الزمان ولكنها تقال عندما نكتسب خبرات جديدة وتصقل خبرات اخرى وتزداد نضجاً للتعامل مع معطيات هذه الحياة فنكتشف اننا لو كنا بخبرات مثلاً سن 30 سنه فى مواقف حدثت ونحن فى سن 18 سنه لختلفت قرارتنا كثيراً ، ولكن نحن فى عالم افتراضى ، وانتى الأن سنك 18 سنه وبخبرات سنك الحالى وسوف تقومين بالآتى : ( .................... ) ؟

تحياتى لشخص حضرتك الكريم ،
سيد عبد المنعم

غير معرف يقول...

أكتر أسم فى البنات بتحبيه و كمان اكتر أسم بتحبيه فى الولاد؟

بتميلى فى أمومتك لتربية البنات ولا الولاد أكتر ؟ وليه ؟