الاثنين، 14 مارس 2011

ستيتة حسب الله الحمش فى المضيفه وعلامات استفهام ؟؟؟

ستيتة وهى مزنوقه ربنا ما يوريكم 
بذنب الغلابه المساكين اللى بتطلعوا عنيهم فى ام الكليات دووول 
وبتهبدوهم اسئله ليس لها اى اجابات لا من المقرر  ولا برا المقرر
فقد قررنا الاتى 

يجيب المدون الضيف المحترم الممتحن هنا على كل الاسئله اجبارى 
سوءاً المجموعه 1 او المجموعه 2 او المجموعه 3
وعلى الله والله يسيب اى سؤال 
وفى حالة تفويت اى سؤال او جزئيه من اى سؤال يعيد الامتحان 
فى ميعاد تحدده اللجنه بما يتناسب مع مزاج اللجنه  وراحتها 
وبما يتناسب مع التعكنين على الممتحنه هنا وسد نفسها وخاطرها 
ولقد انظر من اعذر 
وعلى الله تغشى 
الامتحان اوبن بوك يعنى مش محتاج 
ما كنتوا ذاكرتوا من الاول بلاااا..... ولا بلاش 
الطيب احسن 
يلا وشك فى الكراسه واقرى وعلى الله تبصى لحد


ههههههههههههههههه

كان هذا الفاصل من الردح المتعارف عليه فى الامتحانات اللى بيعملوها اياهم ... هاا ... واخده بالك ياللى فى بالى 
من باب التسهيل على الطالب ودعم تركيزه قبل البدأ فى الامتحان

كان هذا هو البوست واليكم الامتحان بالتفصيل





المجموعه الأولى

لزوم التشتيت


أسئله شخصية
-------

1- ماهو  الأسم الحقيقى ؟

2- السن ؟

3- المؤهل ؟

4- أشمعنى لقب الحمش فى أسمك يعنى ما هو سبب الاختيار ؟

5-  أجمل كلمه بتحبى تسمعيها كل يوم ؟
6-  أجمل موقف مر عليكى فى حياتك كلها ، واصعب موقف ؟


7-  أمنياتك للأيام القادمه ؟

8-  بتحبى بعقلك ؟؟ طيب لو صح ياعنى إيه تحبى بعقلك ؟


9- لما بتبصى فى عيون الناس بتعرفيهم ازاى؟

10-  نصيحة في الحب ؟

12-  مظهر الناس ماذا يعني لكِ؟

13- التخصص دكتورة ولا طبيبة ؟

14-  ليه حضرتك أخترتي الإسم ده بالذات ( ستيتة وليه الحمش)؟

15-  بتعرفي تعملي كشري ؟ وايه سر الصنعة يمكن نفتح فرع عندنا بالقاهرة ههههه ؟

16-  لو ماكنتيش بقيتى دكتوره فى الجامعه كنتى نفسك تكونى إيه مافكرتيش تشتغلى فى الصحافه عمرك ؟

17- أزااااااى قدرتى تعيشى فى بلد مافهاش بحر هههههههههههههههههه ؟

 18- إيه أكلك المفضل ؟

19- إيه أكتر حاجه بتضايقك وتحسى انك مش مركزه بسببها ؟

20- إيه سبب حبك لكظومه ؟

21-  لو أتعرض عليكى وزاره ممكن تختارى وزارة ايه تقدرى تنميها وتفيدى فيها  ؟

22- أرسلت جارتك ابنتها إليكى والحاصلة على مجموع كبير بالثانوية العامة والتى تراكى مثلاً أعلى لها وتريدك ان تملئى معها استمارة الرغبات ، هذا وقد أوكلت إليكى هذه المهمة بشكل كامل ، انتى لا تعرفين الكثير عن امكانيات هذه الفتاة ولكنك من وجهة نظر عامة و مهتمة بالشأن العام سوف تنصحينها بأن تكون أول رغبة ( ..... ) ؟

23- من خلال كتاباتك فأنتى خبرتى الدنيا جيداً من بين صفحات الكتب ومن مستحدثات العصر من انترنت وخلافه ومن خبرات حياتية مختلفة ،كنتى تسيرى بالشارع فاستوقفك إعلان عن انعقاد ندوة بعنوان ( المرآة ف الأسلام ماضِ عريق ومستقبل مشرق ) يلقى الندوة فضيلة الشيخ / فلان وفضيلة الشيخ / علان ... الخ ... قررتى الحضور ... ركزتى جداً ... دماغك تكوينها علمى بحت ومنطقى تسلسلى يتبع الاسلوب العلمى ف التفكير -ولو كان الدين بالعقل لكان المسح اسفل الخف اولى من المسح اعلاه - فوجئتى بأن المشايخ سالفى الذكر اقروا بحرمانية عمل المرأة الا فى ظروف معينة ، وان الزى الاسلامى الشرعى هو النقاب ، الكلام كان علمى ومنطقى وبه جزء كبير لا يمت للعقل بأى صلة ، إتخذتى قرارك بالآتى ( .................. ) ؟

24- ما من أحد منا الإ وقال هذه الجملة ( بس لو الزمان يرجع تانى ) وغالباً لا يرجع الزمان ولكنها تقال عندما نكتسب خبرات جديدة وتصقل خبرات اخرى وتزداد نضجاً للتعامل مع معطيات هذه الحياة فنكتشف اننا لو كنا بخبرات مثلاً سن 30 سنه فى مواقف حدثت ونحن فى سن 18 سنه لختلفت قرارتنا كثيراً ، ولكن نحن فى عالم افتراضى ، وانتى الأن سنك 18 سنه وبخبرات سنك الحالى وسوف تقومين بالآتى : ( .................... ) ؟











المجموعه الثانية



هو لسه فيه اسئله تانيه ؟؟!!


اه لسه فيه اجابه تانيه
علشان تفتكرى الكلام ده كويس وانتى بتحطى الامتحانات للغلابه
امضاء
 طالب مخنوق

أسئله تدوينية وسياسية
----------
 1-  بتحبى تقرى أي نوع من الكتب  ؟
2- و هل لكى هوايه اخرى  غير الكتابه؟
3-   بتكتبى امتى و اذا كانت الكتابه بتخليكى مقصره مع أولادك ولا لاء بما انك أم و مرأه عامله؟
4-   امتى هيبقى فيه تجمع تدويني قاهري عشان أشوفك؟
5-  ليه مش على الفيس بوك؟
6- بتتعاملى ازاي مع الناس دلوقتي في حالة تضاد الآراء دي هل بالصمت ولا بالمناقشه والاقناع؟

7- ماشاء الله حضرتك متابعة كل حدث ولازم كل شوية بوست جديد دا مش حسد على فكرة بس بتقدرى توفقى ازاى بين وقتك ومتابعة المدونة والتعليقات ونشر البوستات وكمان ماحستيش فى فترة من الفترات بملل من التدوين ؟

8- ايه رأيك فى القانون الموحد لدور العباده وايه البنود اللى تحبى تأكدى عليها فى الدستور الجديد ؟

9- ماهى  رؤيتك لشكل مصر القادم من الاحداث الان تفائل ام تشائم ؟

10- ما العمل  في موضوع الدستور اللي مش عاجبنا و عاوزينه يتغير في حالة اذا لم يرضخ المجلس العسكري لطلب صياغة دستور جديد ؟

11- هل يعني اني لما اروح ارفض التعديلات اني بكده اقر الدستور القديم و لا نضطر نوافق مع العلم ان فيه اشياء مرفوضه و لا ما نروحش خالص الاستفتاء و نمتنع لاثبات الموقف ؟

12-  وجهه نظرك ازاي نقدر نطور منظومة التعليم الفاشلة اللي بتخرج واحد حافظ مش فاهم و ايه انسب نظام تعليم نقدر نطبقه عندنا في مصر في ظل الاحوال السيئة للمدارس  ؟

13- لاحظت ان هناك ميل للراحل انور السادات عن الراحل جمال عبد الناصر ياترى ايه سبب الميل دا هل هو لشخص ام لحقبه زمنيه ؟

14- انا من الناس اللى بتحب هيكل وبتشوف دايما قدرته على التحليل بشكل منطقى مع وجود الكثير من الدلائل معه لمعاصرته اكتر من فتره مميزه فى تاريخ مصر حاسس كدا بخلاف دائم من نحيتك مع هيكل ياترى ليه وبتشوفيه ازاى ؟

15- الاحياء برضو  علميا هي البيولوجي مش كدا؟


16-  ايه اكتر مدون بتحبي تقريله وبتحترمي فكرة ؟

17-  أكتر مدون بتحترمية لكنك مختلفة معاه؟
18- انا ملاحظ ان طريقة كتابتك اتغيرت فجأه ، للاحسن طبعاً بس انا اظن ان وراء هذا تغير فى القراءه نفسها ، يعنى بداتى تهتمى بنوع معين من الكتابه ، بدأتى تقرى لحد معين كتير الفتره دى ... هل تستشعرى ده فعلا ولا لأ ولو لأ يبقى انا بلغتك اهه ، ههه ، بس ايه السبب ؟!

18- هل لو مسكتى رئاسه الجمهوريه ممكن تعملى شئ ايجابى للبلد ولا اللى على البر عوام؟
19- بما ان مدونتك كانت عامل اساسى لجر رجلى لعالم التدوين فاكيد هذه المدونة مر عليكى فيها مواقف كثيرة
اكيد مواقف اثارت غضبك ومواقف فرحتك ومواقف كان لها العجب
وسؤالى لكى الان ياحبيبتى
ارجو ان تذكرى لى موقف من كلا من هذه المواقف رغم كثرتها يعنى موقف او موقفين من كل نوع من الذى اغضبك والذى افرحك ويكون مسك الختام موقف كان له عجب العجاب فى حياتك التدوينية
افتقدك كثيرا ولعل باجابتك على سؤالى وذكرك لهذه المواقف يعوضنى عن جزء صغير من افتقادك










المجموعة الثالثة


امسكى  نفسك واعصابك
ما تخافيش
خلصنا اهه
هههههههههههههههه

سؤال بيت المدونين

من حقك تختارى مدون يكون ضيف الحلقة الجايه  فى مضيفة بيت المدونين

- تحبى تختارى مين ؟


يلا بالشفى وعلى مهلك احنا مش مستعجلين 
بس بسرعه برده يعنى مش كده




فريق عكش بيت المدونين

:))

هناك 13 تعليقًا:

ويكا يقول...

تم فتح التعليقات بدون اشراف الا ان الاسئله الخاصه ببوست المضيفه السابق سيتم نشرها باذن الله تعالى بعد الاجابه من فبل الدكتوره

ستيتة يقول...

من انتم
من انتم
دقة ساعة العمل
زنجا زنجا بجد مش هزار

كل دي اسئلة ياناس
عاااااااااااااااااااا
بس على قلبي زي العثل :)
وبعدين زنجات مين يا بتوع البيت ابو قعدة عربي
احنا ولا يهمنا بالصلى ع النبي
نجاوب ونعمل امتحانات برضه بعون الله
ههههههههههههههههههههههههههه

شكرا لكم جميعا
جاري الإتصال بالأسئلة ومحاولة الإلتفاف عليها كما يحدث في الثورة

تحياتي للجميع

ويكا يقول...

هههههههههههههههههههه

ههههههههههههههههههه

اجمد يا دكتور

دا كل ده تسخين بس ، دى يادوب تحميله صغيره على الماشى

ههههههه

richardCatheart يقول...

هههههههههههههههههههههههههههههههه
هههههههههههههههههههههههههههههههههه
هههههههههههههههههههههههههههههههههههههههههه

حرام عليكى هاتموتنى هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

يلا ماتشمتيش ويكا فينا فرجيه اعضاء جمعيه المراءه المتوحشه

الى الامام الى الامام
اجابه اجابه

ENG./ELSAYED,PMP يقول...

دكتورة ... ازيك :
1- أرسلت جارتك ابنتها إليكى والحاصلة على مجموع كبير بالثانوية العامة والتى تراكى مثلاً أعلى لها وتريدك ان تملئى معها استمارة الرغبات ، هذا وقد أوكلت إليكى هذه المهمة بشكل كامل ، انتى لا تعرفين الكثير عن امكانيات هذه الفتاة ولكنك من وجهة نظر عامة و مهتمة بالشأن العام سوف تنصحينها بأن تكون أول رغبة ( ..... ) ؟

2- من خلال كتاباتك فأنتى خبرتى الدنيا جيداً من بين صفحات الكتب ومن مستحدثات العصر من انترنت وخلافه ومن خبرات حياتية مختلفة ،كنتى تسيرى بالشارع فاستوقفك إعلان عن انعقاد ندوة بعنوان ( المرآة ف الأسلام ماضِ عريق ومستقبل مشرق ) يلقى الندوة فضيلة الشيخ / فلان وفضيلة الشيخ / علان ... الخ ... قررتى الحضور ... ركزتى جداً ... دماغك تكوينها علمى بحت ومنطقى تسلسلى يتبع الاسلوب العلمى ف التفكير -ولو كان الدين بالعقل لكان المسح اسفل الخف اولى من المسح اعلاه - فوجئتى بأن المشايخ سالفى الذكر اقروا بحرمانية عمل المرأة الا فى ظروف معينة ، وان الزى الاسلامى الشرعى هو النقاب ، الكلام كان علمى ومنطقى وبه جزء كبير لا يمت للعقل بأى صلة ، إتخذتى قرارك بالآتى ( .................. ) ؟

3- ما من أحد منا الإ وقال هذه الجملة ( بس لو الزمان يرجع تانى ) وغالباً لا يرجع الزمان ولكنها تقال عندما نكتسب خبرات جديدة وتصقل خبرات اخرى وتزداد نضجاً للتعامل مع معطيات هذه الحياة فنكتشف اننا لو كنا بخبرات مثلاً سن 30 سنه فى مواقف حدثت ونحن فى سن 18 سنه لختلفت قرارتنا كثيراً ، ولكن نحن فى عالم افتراضى ، وانتى الأن سنك 18 سنه وبخبرات سنك الحالى وسوف تقومين بالآتى : ( .................... ) ؟

تحياتى لشخص حضرتك الكريم ،
سيد عبد المنعم

سورى ماخدتش بالى ان الامتحان ابتدى

ويكا يقول...

يا دوك

فيه اربع اسئله جداد انضافوا كانوا فى الرسائل المرغوب فيها بالخطأ

ياريت تاخدى بالك منهم ، لانهم بصراحه جامدين مووووت

ههههههه

بالشفى ياباشا

والله انا مزنوقلك سلف :))

sony2000 يقول...

ربنا معاكي يمااااامي:)

كلمات من نور يقول...

مسكينه يا سوتيته قلبي عندك يختي

حتلاقيها من الثورة والا الجيش والا القذافي والا من الامتحان؟

بالنجاح إن شاء الله وفي انتظار الإجابات

ويارب تنجحي بقى وتجيبي مجموع يشرفنا وتدخلي طب

ويكا يقول...

ههههههههههههه

ستيتة يقول...

احم
الفيل في المنديل
والإزازة في البزازة
مستر إكس مش ممكن ينتهي ابدا
الإجابات في الميل
بس أنا لقيت 3 اسئلة جديدة بس
فين الرابع ده
مش مهم نعتبر الدكتور نسي يحطه في ورقة الأسئلة وها أدور عليه وأرد عليه في "ملحق"
تحياتي

Amr Omar يقول...

أيه ده أنتم زنقتوها في خانة اليك .. ربنا معاكي يا ستيتة

Single Mummy يقول...

قلبى معالكى يا دكتورة بس احسن كدة ما احنا عاوزين نعرفك برضو اكتر

غير معرف يقول...

توسنامى اسئله و زلازل

الله يينك يا دوك