"من أمام ماسبيرو ...... احدثكم" ... ويكا

بوست منقول من مدونة بصراحه
ويكا
ياريت تقروا البوست كويس ونعى كويس ما فيه


اولاً ما حدش يسألنى ايه اللى وداك
او
روحت تهبب ايه بدقنك دى ، وهما كلهم مسيحيين وكان ممكن يقطعوك


لانى ما اعرفشى


انا كنت رايح مشوار وكنت واخد طريق الكورنيش عادى وناسى موضوع المظاهره والاعتصام بتاع المسيحيين ده
واذ فجأتاً ألاقى الطريق واقف فجأه والعربيات بتلف وترجع عكسى ، فسألت الناس قالولى علشان فيه اعتصام ومظاهره
فإذ فجأتاً اقرر انى مش هلف ولا ارجع تانى (بالرغم من انى مشهور عنى انى بلف وارجع تانى كتير - بسبب انى بتوه بالعربيه كتير)
الا انى لم الف ولم ارجع تانى
واذا بأنى قررت انى اكمل فى وسط استغراب ناس كتير وبالاخص الناس المسلمين اللى كانت واقفه فى الشارع بتحول الطريق قبل ماسبيرو بفتره ، بل انهم لم يتوقعوا انى هروح فعلاً وتخيلوا انى عايز الف من الفتحه اللى قدام شويه
المهم سابونى فعلا اعدى
وبعدين انا دقنى مش كبيره اوى يعنى فبالتالى ماحدش هيعتبرنى متدين اوى ، حاكم الناس بتقيسها بالحجم وانا دقنى على قدى والحمد لله حاجه تايوانى كده يعنى


المهم
قررت وقتها اننا سنذهب
وبالفعل هذا ما حدث
وكنت الذقن الوحيده الموجوده امام ماسبيرو
ربنا يستر
الشباب المسلمين اللى كانوا بيبيعوا اعلام هناك ، كانوا مرعوبين عليا وحاولوا يرجعونى كتير او على الاقل ما اتكلمشى مع حد


وهذا ما لم يحدث
اصريت ادخل ادام المنصه ووقفت اتفرج ، وبدأ الحوار
بواحد مسيحى طبعاً قرب منى واتكلم عادى من غير ما يذكر انه مسيحى ، وبدأ يكلمنى عن انهم فى التليفزيون بيقولوا انهم بيكسروا وبيعملوا وهما مش بيعملوا كده
قلتله اه فعلاً انا شفت الاخبار دى الصبح انكم كسرتوا الازاز وحاولتوا تقتحموا المبنى ...... قالى دول عالم كدابين ومنافقين
فانا فعلا استغربت اوى اوى ، لانى فعلاً شايفهم عاديين بيهتفوا بس اه الجيش محاوط المكان بعدد متواضع جدا جدا من العساكر واسلاك شايكه وكأنى فى دوله تانيه ، بس برده مفيش اى عنف او قلة ادب
الا ان واحد من الواقفين قالى لا فعلا الكلام ده حصل امبارح
المهم
قعدنا نتناقش فى اللى حصل وان البلد بيتلعب بيها وان مفيش اللى بيتقال ويتناقل ده فى الاخبار


كبر الموضوع ولقيت عدد لا بأس به من الناس ملمومه حواليا وبيتناقشوا بكل ادب ، الا انهم واضح انهم زعلانين اوى
وده اللى زعلنى
انى اكتشفت ان فيه عدد كبير منهم فعلاً مصدق
هتستغربوا طب وده يزعلنى فى ايه
اه يزعلنى
لانى حسيت انهم ناس غلابه اوى و متقالهم كلام مش حقيقى فعلاً انا استغربته جداً
قعدنا نتناقش واوضحلهم توجه المسلمين ايه ويعنى ايه سلفى ويعنى ايه اخوان ودينا بيقول ايه (ما تستغربوش وتقولولى هما مستنينك لما تفهمهم مهم عارفين )


لا ياباشا منك ليه ، الناس دى فعلاً مش عارفه حاجه ، ومتفهمين غلط ، وانا كنت مستغرب جداً من اللى بيقولوه ومن الاخبار اللى متقالالهم
والغريب بقى انى لقيت ناس كتير تانيه متضايقين انهم بدأوا يتجمعوا حواليا ويتناقشوا معايا .... وبدأت اسمع ناس من بعيد بتزعقلهم
"انتوا هنا ليييه ، اقفوا اهتفوا معانا ادام المنصه تانى" وهما يردوا عليهم يقولولهم :
"حاضر بس ثوانى احنا بنتناقش مع الراجل - اللى هو حضرتى"


شويه ولقيت واحد (لو قولتلكم مبرشم يبقى بقول عليه فايق) ، جاى عليا فجأه وانا فى وسط الناس وهاجم وبيقولى
" لاااااا احنا فقنا خلاص من اللى كنا بنشربه .... خلاص فقنا خلاااااص " انا فعلاً اتخضيت من منظره ...... اذا كان ده كده فايق امال لو مبرشم كان هيبقى شكله عامل ازاى
السؤال هنا بقى
ده مين ؟؟؟
بيعمل ايه هناك ؟؟؟
عايزين تفهمونى انه صاحب قضيه ؟
ودارى باللى بيحصل حواليه ؟؟
ما علينا
المهم الناس حجزته بعيد عنى فعلاً خوفاً من ان الموضوع يتطور تانى زى اليوم اللى قبليه وتحصل مجزره تانى
المهم كملنا كلامنا قامت الناس اكدتلى كلام انهم شافوه صوت وصوره من شيوخ سلفيين انهم دعوا الناس انهم تروح الكنيسه وتولعها
ما صدقتش واصريت ان ده مستحيل يكون حصل لان انا عارف قناة الناس اللى بيقولوا انها اذاعت الكلام ده وعارف ان السلفيين مستحيل يدعوا لفتنه زى دى
الغريب بقى لما روحت فعلاً وفتحت الفيديوهات استغربت جدا جدا ، معقوله الناس ممكن تكون ساذجه كده ؟ ولا هما فعلاً اللى بيقولوا كده وخلاص؟


الفيديوهات مالهاش اى علاقه لا بشيوخ سلفيين ولا اى قناه اسلاميه ولا اى شئ


اللى استغربته اوى اوى بقى امبارح هو انى لقيت القسيس اللى واقف على المنصه عمال هاتك اتهامات للسلفيين انهم متشددين واعدائهم اللدوديين ، والاغرب والاغرب انه استدل على عداوتهم وسوئهم بموضوع مسجد النور ، طيب ايه علاقة القسيس بالمسجد؟؟
و ناس كتير فعلاً لقيتهم بيتكلموا معايا فى موضوع المسجد ده ، اه صحيح انا لقيتهم بيقولولى حاجات غريبه اوى متداوله بينهم فى موضوع مسجد النور ده لا حصلت ولا حتى اتكتبت فى جرايد ، ولا لها اصل ولا فصل بس مش ده الامر الغريب الاكبر من وجهة نظرى
الغريب فعلاً انهم ايه علاقتهم بيه ؟؟
ولما سألتهم فعلاً ما عرفوش يردوا عليا وسكتوا بل اتفقوا معايا فعلاً انهم فى النهايه مالهومشى دعوه
 فى النهايه اضطريت امشى لما جه ناس مسلمين من برا غالبا قد يكونوا شرطه لابسين ملكى واصروا ياخدونى بره بعيد خوفاً عليا
وبالرغم من انى كنت مصر افضل شويه الا انى فى النهايه انصاعت لرغبتهم لاسباب كتيره
خاصه ان عدد كبير جداً بدأ يتلف حواليا ويتكلم معايا وده ما كانشى عاجب ناس كتيره تانيه من المنظمين للاعتصام وكان واضح انهم من الممكن يعملوا  اى حاجه علشان يفركشوا الجو الودى الحوارى العقلانى ده
وهنا الخوف مش عليا بس الخوف على الفتنه الجديده اللى ممكن تحصل لو فعلاً حصل إشكال تانى كبير وده كان سبب رئيسى انى مشيت فعلاً
انا ليه بكتب البوست ده بالرغم من انى لم اكتب اى شئ من الحوار اللى حصل بينى وبينهم مع ان وقفت وقت لا بئس بيه معاهم


لانى عايز اقول الخلاصه
ناس كتير من اللى هناك دى ، مع انهم ايجابيين بوجه عام ومن النوع اللى بيخرج وبيحاول يعبر عن رأيه
الا انى اكتشفت اننا كلنا غلابه (مسلمين او مسيحيين) واغلب المصريين بيظيتوا مع الظيته ، وبيصدقوا اى حاجه تتقالهم وعاطفيين جداً
وعندهم استعداد يموتوا بسبب خبر كذب ما اتحققوش منه


وهنا مربط الفرس


لازم نفوق يا جماعه
اللى فاهمين فعلاً مش كلهم امناء ومش كلهم بيقولوا الحقيقه
احنا بننساق ومش بنبقى عارفين منساقين على فين
وممكن نموت واحنا متخيلين اننا متنا دفاعاً عن الحق وهو لا حق ولا حاجه


عايزين نحافظ على بلدنا ...... عايزين نبقى واعيين اكتر


مش عايزين نصدق اى شئ يتقالنا


عاوزين نحافظ على بلدنا


هناك 7 تعليقات:

كريمة سندي يقول...

المشكلة أنه لا توجد حلول وسط كل واحد احيانا شايف انه هو اللي صح والتاني غلط

gogo!sf يقول...

والله يا ويكا انت عندك حق

بس انا شخصيا اعرف ناس سلفين متشددين جدا ومش بيعجبنى اسلوبهم ولا طريقتهم
وعايزة اقولك ان المسحيين ليهم حقوق ومتطلبات لازم تتنفذ

زى ما احنا كلنا كمصريين لينا طلبات وبنحارب عشان ننفذها برغم انها بعيد عن اساءة لدين
لكن سواء هما فاهمين او مش فاهمين فهم بيحافظو على حقوقهم ودينهم
ولكم دينكم وليا دينى
وانا كمسلمه بأيد المسحيين فى تصرفاتهم فى الحفاظ على حقوقهم
وزعلانه جدا للى بيحصل لانى لو كان ده معانا احنا كمسلمين وبالوضوح ده اعتقد اننا كنا عملنا اكتر من كده بمراحل

أنا حرة يقول...

ويكا
الله ينور
هو ده رأيى
المشكلة فى الكبار بتوعهم
القساوسة والناس اللى زى مايكل منير ونجيب جبرائيل .. الناس كلها حقد ولهم أهداف غير واقعية بنعرفها لما الهبل العبط بتوع المهجر يقولوها وآخرها إمبارح المطالبة بإن اللغة الرسمية لمصر تكون اللغة القبطية (شفت الهبل ) ده حتى المسيحيين نفسهم مش بيعرفوا يتكلموها .. يعنى تعصب أعمى ورغبة فى السيطرة والعناد وخلاص ,, وطبعا العوام بينساقوا وراهم من غير عقل .. شنودة ورجالته هم اللى بيولعوها كل شوية .. لكن والله شيوخ السلفية بيتكلموا بمنتهى العقل والحكمة حتى المتشددين منهم بيتكلموا على الفضائيات فى منتهى العقل لكن مهما عملوا الناس كرهاهم وخلاص حتى بعض المسلمين
حسبى الله ونعم الوكيل

لـــولا وزهـــراء يقول...

"

عايزين نحافظ على بلدنا ...... عايزين نبقى واعيين اكتر


مش عايزين نصدق اى شئ يتقالنا


عاوزين نحافظ على بلدنا
"

فيه ناس كتير احنا هدفها معندهومش اي شئ في الحياة يوصلولوا الا انهم يوقعوا مصر بالفتنة الطائفية واحنا اللي خلناهم ياخدوا بالهم لما وضحنا بعد الثورة ان احنا مبقاش عندنا فتنة قوم ايه لما الناس اياها صحيت من الغيبوبة قالت ايه نلحق نضربلهم كام كرسي ف الكلوب قبل ما يصدقوا حلمهم

لولا

Amr يقول...

معلش ممكن طلب صغير تحديث الرابط للمدونة Free Mass عندي لأني جبت دومين خاص بيا ليه
http://www.free-mass.co.cc

فالتحديثات مكش هتظهر على الصفحة الرئيسية

ABU ALY يقول...

الحمد لله انك رجعت بالسلامة ...
لكنة بجد فكره عبقرية مجنونة جرئية
كل حاجة

sony2000 يقول...

:(
طب وبعدين