الخميس، 19 مايو 2011

الى كل المدونين .... خدولكم بريك




الى اصحابنا الاعزاء 


ايه رأيكم ناخد كلنا بريك ؟!

لا اخبار 
لا تحليلات سياسيه ولا حتى اقتصاديه 

لا جرايد ولا محلات ولا فضائيااااااات

لا فتنه طائفيه ولا حتى مهلبيه 

كفايه شويه بقى

عايزيييييين بريييييييييييييييك يا بشر

اه صحيح 


ولا حب حتى ولا شحتفه الله يخليكم 

عايزين نرجع شويه لورا قبل الثوره بسنه 

كنا دمنا خفيف بالرغم من الهم والحزن والقهر اللى كنا فيه  ....... يييييه 
هنقلب سياسه تانى ولا ايه !!

لا يا اخوانا 

بريك بقى 

والله لا السلفيين عايزين يموتوا المسيحيين ولا المسيحيين عايزين يخربوا البلد 

فككوا بقى ، اضحكوا على المغرضين وخدواااااا بــريــــك



بريك يا بشر

واللى عايز يتخانق ويحلل وينفسن ويبوظ اعصابه واعصابنا معاه

نقوله 

خدلك بريك برده 


علشان ترجع انشط فتعرف تتخانق بكامل لياقتك


دعوه الى اخوانا المدونين الذي يتأثر بهم كثيراً من الوسط الاعلامى الان 




فين المدونات الساخره يا اخوانا 


مش موجوده على الريدر بتاع البيت بقالها فتره 


فين ابتسامات ؟!!


فين الصباغ ؟!!

فين مهاترات عاقل وان كانت بدأت تندع عندها تانى اهه 


فين باقى المدونات اللى بتضحك ؟؟؟

خـــــدوا بــريـــــك بقى

اقولكم .......


اشربوا بريل




هناك 22 تعليقًا:

بيت المدونين يقول...

ومشاركة من بيت المدونين لكسر حاجز النفسه والخنقه و الريحه الوحشه المنتشره اليومين دول دى قررنا نحن فريق علم المدونين اضافة نشاط من نشاطات البيت او غرفه من غرفه ، هنعلق عليها اسم

اســـــــــــــتراحه .... فاصل ونواصل

هى البوست الجاى ان شاء الله

هنكتب فيها اى اخبار ظريفه .... كوميديه ... نكت
وممكن يشارك فيها الجميع ان شاء الله

كل واحد يقدر يعت حاجه فى التعليقات من باب الاستراحه والـــ بريك

mrmr يقول...

اتمنى .... لكن صعب فى الوقت الحالى مهما فكرنا وحبينا ناخذ بريك لكن القلب لما يكون حزين ومكسور مش بسهوله علاجه

ربنا يجبر كسر كل حزين ومكسور

دعوه جميله بدون شك

اشكرك عليها

غير معرف يقول...

فكرة جميله يا وئام والله
كلنا محتاجين البريك دا

تسلم عليه

مونتي بوكيه ورد يقول...

جميل اوي وانا علي طول علي طول واخد بريك بس مافيش مانع بدام البريك عايزينه فرفشه و قعدة ع البحر و اتنين عصير بوريو لكل واحد .. يبقي ابتدي اخد بريك و اكتب .. الهموم ال بتضحك .. و الضحكه ال من ال قلب ال بلاقيها في كل بريك .. فكره جميله .. استمروا و عندي الكيت كات

BNT ELISLAM يقول...

فكره جميله وتغير كتير حلوا وبجد ياريت ناخد فاصل من الغم شويه

ويكا يقول...

الله الله يا جماعه

بداية التفاعل مع الفكره

الاخت " جميله المصرى " كاتبه بوست يتناسب تماما مع الفكره بتاعتنا

ده بدايته

"عندى فكره لعمل مدونه وحبيت اخد رأيكم فيها وأتمنى أنها تعجبكم
فكره المدونه بأختصار هى مدونه بريد القلوب الحزينه"


وطبعاً ما سيبناهاش كده

روحنا جبناها ...... يا ست جميله

اهدى كده الله يكرمك اليومين دول

واقرى البوست واستهدى بالله كده شويه وخدى بريك


اشربى العصير

ويكا يقول...

مونتى بوكيه ورد


ههههههههههههه


حلوه اوى (بدام دى )

اسمها
مادام يبنى

انت مش متجوز ولا ايه ؟؟؟

انت لو متجوز كنت عرفت ماداااااااام

انت جبت الباء دى منين؟

ويكا يقول...

لايك

يا بنت الاسلام

أمل حمدي يقول...

بحاول أبعد عن الأحداث وأعمل بريك ألاقي الأحداث جت وراية :))

لــــ زهــــــراء ــــولا يقول...

حلووووووووووة اشرب بريل ههههه يارب بكرة افضل ومصر احسن ونعرف ناخد بريك بجد

لولا

eng_semsem يقول...

انا اخدت البريك من اسبوع وفكره مش بطاله بس ما يمنعش اني بتابع بس من بعيد لبعيد مش زي الاول

ويكا يقول...

ماما اموله


لو جات وراكى اجرى من قدامها

او اقفلى الباب

مهو الموضوع بصراحه يستحق المحاوله

وعموماً احنا هنا هدفنا (بما اننا نشرنا الفكره فى بيت المدونين مش مدوناتنا الخاصه )

يبقى الهدف منها ان ده يبقى اتجاهنا العام الفتره الجايه فى البوستات اللى نكتبها

لان لا شك احنا بنتاثر ببعض

وده سبب ان الاحداث مهما تهربى منها تلاقيها جات وراكى

ده لاننا كلنا مصرين نكتب او نتكلم فيها

فبالتالى
الدعوه هنا جااااده وحقيقيه لكل المدونين

ان يعملوا لنفسهم بريك وللى بيقرولهم برده

حراااااااااااام كده

بعد اذنك بقى لان فيه خبر مهم قريته ومنرفزنى عايز اكتب عنه بوست شديد هيولع الدنيا فى المدونه عندى


ههههههههههههه


طبعاً انا بهرج

شوية قهوة يقول...

فكرة جميلة جدا والله
كل الناس بقت محتاجة راحة من كل حاجة والله حتى الضحك
لو ينفع نشيل المخ شوية
ونرجعو بعدين

حمدى جعوان يقول...

انا معاااااااااااااكم
يارييييت الشعب كله ياخد بريك والله
وياريييت الاعلام كله يتوقف لمدة اسبوع مش عاوزين اى بنامج توك شو ولا نشرة اخبار ولا ( مصر بتتغير وانا كمان )

شكرااا للفكرة واديها بريك

حمدى جعوان يقول...

http://doniety.blogspot.com/2011/05/blog-post_20.html


استجابة للفكرة
اخر بوست عندى

ويكا يقول...

يا اخوانا يا اخوانا


وش واحد مكسووووف موووووت


معلش معلش

اصلى انا اللى كسرت الاتفاق ونشرت حاجه كده مش ولابد دلوقتى


بس دا والله استثناء مؤقت
لكن انا عادى اههه وبضحك


معلش مضطر انشره والله بقى سماح

ويكا يقول...

حمدى جعوان

دخلت وشوفت البوست

استاااااااااااااذ


وعلى فكره مدونتك لذيذه اوى ما شاء الله

Haytham Kilany يقول...

ويكا انت مشردنى وعاملى "أعلان مدفوع الأجر "
ماشى يا معلم
بيت المدونين فيه مئات المدونين كل واحد ليه شكل وطعم ولون مختلف

عادى جدا انك تلاقى المنهمك جدا ف الوضع السياسى الراهن ف البلد " زيك كدة"
وداخل الكوز دة ومش عارف يطلع

وهتلاقى ناس عايشة ف الرومانسية ...ولا هيه هنا


***********************
فأنا ضد الفكرة تماما
**************************


واللى عايز يأخد بريك رومانسى
يزور مدونة رومانسى
واللى عايز يضحك يقراله بوست ساخر

لكن كل الناس تسيب اللى فأيديها وتهرج
هههههههههههه

لكن تعمل ركن مخصوص ف بيت المدونين للضحك

****************
دى فكرة ممتازة جدا
****************

مصطفى سيف الدين يقول...

انا عن نفسي واخد بريك وباكل كيت كات :)
المشكلة الاحداث المتلاحقة مش دية حد فرصة رفاهية البريك
بس الفكرة حلوة يا ريت نعملها
ونريح شوية دماغنا من كتر اللي اتشحن فيها الفترة اللي فاتت
تحياتي

جميله المصرى يقول...

السلام عليكم

اخى الكريم صاحب مدونه بيت المدونين فكره حضرتك جميله جدااا وشيقه انما مختلفه عن فكرتى شويه

انا الى اقصده انى اساعد الناس على انها ترتاح من شئ مضايقها عشان تعرف تاخد بريك وتنسى وتعيش حياتها

انما ازاى الناس تعرف تكمل مسار حياتها وهى عندها مشكله مأرقها مش هينفع تنساها كده بسهوله اكيد هتحتاج حد يساعدها على انها تتخطاها

دى فكرتى ببساطه

وخد ليك بريك خد شكولاته كت كات واشرب سفن اب عشان تبقى رايق

وممكن كمان تسمع اغنيه الناس الرايقه

دمت بكل خير

اختك جميله

Unknown يقول...

لاأتفق معكم.....

جميله المصرى يقول...

السلام عليكم

اتمنى زيارتكم على مدونتى الجديده

http://bared-elkolop.blogspot.com/

مدونه بريد القلوب الحزينه