هيثم السايس فى المضيفه ..... والاجابات



 هيثم السايس 


هيثم السايس 




عن الاسئلة الصعبة دي فنقول يامسهل يارب ويارازق الزهرة في حضن الجبل من فوق ونقول يالا نبدأ ..


1/ اسمي : هيثم محمد السايس
2 /السن : لسة مكمل ربع قرن من اقل من شهر وازحف بخطي حثيثة جدا نحو 26 وغالبا ال30 بسرعة ويالا بقي حسن الختام ..

3 / العنوان : اسكن حاليا في دمنهور ومستقبلا في اي حتة تانية دعواتكم يعني

4/ اللون المفضل:  الازرق بجميع درجاته ومش عارف ايه السر بس اكيد مش مؤكد اني خايف من الحسد يعني بس فعلا نفسي اعرف سر دة ومش عارف اللي يعرف سر حب الالوان نوبه ثواب يقولي ..

5/ المثل الاعلي في حياتي : لا كتييييييييييييير ياجدعان والله العظيم ودة فضل ونعمة من الله اني بتعلم من اي حد حتي لو كان مخالف ليا في كل حاجة طيب ممكن اقول بقي
يعني طبعا وبلا مناقشة وحاجة منطقية الرسول عليه الصلاة والسلام قدوة ومثل لاي مسلم وطبعا دة الاول في حياة كل مسلم وبيتعلم من سيرته اكيد واي موقف الواحد بيقع فيه بيفتكر دايما لو كان الرسول فيه هيعمل ايه وبنتعلم من سيرته اكيد

طيب نيجي للي بعد كدة في بقي شوية كتاب دول كونوا شخصية العبد الفقير لله الماثل امامكم :
يعني1/ احمد خالد توفيق لا تتصور يامدون منك ليه الرااجل دة كون شخصيتي فعلا
2/ جمال حمدان  عجينة افكار عبقرية مستخلصة ودة اتعلمت منه في مجالي كمان وكتاباته كونت عندى وعي خاص كدة باللي بيجري حواليا
3/ مصطفي محمود / دة بقي علمني اني اتأمل في اي حاجة انشالله كوباية مية وعلمني ازاى اكون فاهم وواعي قبل اي حاجة

3/ محمد حسنين هيكل / طبعا في حد مستغرب هنا صح ؟؟ قول متخافش ؟؟ صح استغرابك صحيح الراجل دة بتعلم منه برغم اني مش بطيق الناصرية واراها فرعونية حديثة وما جاء من سنوات عجاف بعدها بس برضه بتعلم من كتباته رغم اني مختلف معاه في افكاره كلية نوعا وكيفا وكما واللي عاوز تقوله تقوله بس بحب كتباته وبقراها جدا والراجل دة ليه فضل عليا بطريق غير مباشر ان كتبت بعض ارائه في امتحان تاريخ امريكي اللي كان عليا في سنة تالتة وبرغم ان اغلب الدفعة شالتها جبت بقي فيها امتياز هههههههههههههههههههههه غالبا الدكتور كان ناصري او عجبه التحليل الخاص اللي كتبته من هيكل
ناس كتير بقي تانية بس عشان ما طولش عليكم يعني وتقولوا الواد رغاي وبيتكلم كتير

6/ مصر تعني ليا ايه لا سؤال صعب جدا علي فكرة بس قبل الثورة مصر كانت بتعني ليا ست عجوزة قاعدة في الشارع ومحتاجة مساعدة بعد الثورة شابة عاوزة عريس يفرحها بجد هو دة تصورى بس الطماعين والانتهازيين كتييييييير وربنا يستر عليها بس عموما ربنا هيكرمها اوى ان شاء الله

7/ دخلت عالم الجريمة اقصد التدوين عن طريق ابن خالتي وبمحض الصدفة البحتة زى ما بيقولوا قالي مرة تسمع عن التدوين وعطاني فكرة قلت وماله انا عاوز اكتب من زمان ويالا بينا عملت الفردوس وكان اول مرة اكتب في حياتي الحاجات اللي حضراتكم طبعا قريتوها ..وهو مجال جميل ولذيذ وفي متعة خاصة جدا ليا بجد

8/ ايه سؤال الشاى دة هي في حد سأله كان بيشتغل في كافي شوب هههههههههههه طبعا بهزر معاك ياللي سألت السؤالين بتوع الشاى وهجاوب بشربه بتلات معالق سكر يعني بيبقي حلو او مظبوط ودة في اي حاجة مش الشاى بس

9/ بحب اشرب الشاى بفتلة وسايب وكله يعني لاني مدمن شاى ودة ساعات بيأثر عليا لو مشربتش شاى ببقي متنرفز جدا وعصبي عشان كدة عاوز اقلل منه الايام الجاية مش ناقصة يعني ..

10/ كتباتي قلت بعد الثورة يمكن عشان بقيت متابع الاخبار اكتر ويمكن عشان دي لحظة تاريخية عاوزة توثيق لكل حاجة او علي الاقل تكون متابع جيد جدا للي بيحصل دة غير ان حياتي الخاصة حصل فيها حاجات كتير منعتني اني اكتب بس عموما راجعلكم قريب جدا ان شاء الله

11/ مش عارف سؤال التاريخ المزور دة  صعب جدا ان واحد زى لايساوى شىء في المجال ان يرد عليه بس عموما هاقولك اللي اعرفه مفيش حاجة اسمها تاريخ مزور في حاجة اسمها تاريخ مكتوب بوجهة نظر المعاصرين يعني واحد بيحب الحاكم هيكتب انه مفيش منه وراجل سكرة وعسل اما لو معارض هيطلع كل الذنوب اللي عملها وهيبقي الحاكم شيطان رجيم عشان كدة لما تيجوا تقروا التاريخ في طقوس خاصة كدة لازم تعملوها يعني تحط عواطفك في تلاجة لو تعرف يعني تحاول ان تكون محايد في قرائتك ربنا خلقك بعقل شغله وانت بتقرأ وشوف الكلام منطقي ولا لأ وعموما حتة التاريخ القديم مزور فممكن اقولك انه مكتوب من اجانب يامحترم منك ليه ودة بيعتمد علي اثار واصعب تاريخ فعلا هو القديم لانه مش بيبقي غير دقيق لقلة مصادره اما التاريخ الاسلامي لا اسمح حد يقول مزور حتي التزوير في اساتذه عظام جدا افنوا حياتهم لتنقيته وتشرفت ان في واحد منهم شفته وكلمته ودرسلي كمان الحمد لله فضل ونعمة يعني وعشان مطولش عليكم حكاية الكتب والمراجع دى من عونيا هكتب مرة بوست واقولكم علي شوية كتب زى الفل ممكن تقروا منها ان شاء الله ..

12/ مش عارف السؤال دة في حد معين عارفه هو اللي سأله هو وسؤال 13 طب وريني نفسك بقي هههههههههه ..والله يمكن دة عيب من عيوبي فعلا اني لما مشكلة بتحصل بتخليني قافل علي نفسي ومكتئب ومش عارف اكتب بحاول اكتب بس فعلا مش بقدر والله يجماعة بس دعواتكم ان شاء الله راجع قريب وهاغير العيب الخطير دة ان شاء الله

13 / هههههههههههه اكلان في القلب الله يسامحك ياللي سألت السؤال يجدعان ولا اكلان في القلب ولا في العقل يمكن انا مكتئب عشان الحياة فعلا بقت وحشة بما تعنيه الكلمة وصعبة عليا اوى اليومين اللي فاتوا وغالبا اليومين الجاييين لاسباب كتيرة اوى بس نقول ايه في النهاية الله المستعان علي اي حاجة في الدنيا دي لغاية ما ربنا يكرم ونطلع منها علي خير وسلام

14/ حلمي لمصر في الايام الجاية والله حاجات كتير اوى بس اهم حاجة دستور يحترم ادمية وكرامة الانسان ويكون الكل تحت القانون ويكون الكل متساوى ويأسس لعدالة اجتماعية عموما لو دستور زى الفل اتكتب صح بدون فئة معينة تسيطر عليه مصر هتنطلق لادام بصورة غير متوقعة دة حلمي الايام القريبة الجاية وربنا يستر

15/ حلمي علي المستوى الشخصي تصدقوا من كتر ما حلمت ومتحققش اي حلم بطلت احلم خالص ..بس يمكن لو عاوز احقق حاجة اليومين الجايين عاوز احقق نفسي او بمعني اصح ابني صح واصلح اللي اتكسر جوايا لاسباب كتييييييييييير اوى

16/ الكلمة او الجملة اللي بحب اقولها لنفسي كل يوم " ليقضى الله امرا كان مفعولا " بحب اقولها ويمكن كان في واحد مؤرخ زمان اسمه ابن الاثير بيحب يقولها في كتباته دايما ..

17/ سبب عشقي للتاريخ هههههههههههه علي فكرة يمكن الحكاية وراثية في الجينات يعني لان امي بتعشق حاجة اسمها تاريخ وبتحب تتفرج علي المسلسلات التاريخي او اي حاجة فيها تاريخ فيمكن دة سبب رئيسي بس بجد يا جماعة انا طلعت بعشق حاجة اسمها تاريخ وكنت حريف في رسم الخرائط ومازالت ..مش عارف ايه السبب غير كدة ..

18/ لو مكنتش درست تاريخ كنت درست علم نفس او فلسفة لاني بموت في العلمين دول كمان ..

19/ اكتر فعلا حقبة اتظلمت في التاريخ المصرى ممكن اقول حقبتين لازم نركز عليهم كتييير في القرأءة او البحث تاريخ مصر قبل الفتح الاسلامي مباشرة يعني اللي بتتسمي مصر البيزنطية او القبطية ..وفي حقبة برضه مظلومة اوى وهي حقبة مصر العثمانية اللي قبل الحملة الفرنسية الناس ناسية اوى الحقبتين دول ..

20/ حقبة في التاريخ العالمي بموت فيها ونفسي اتكلم عنها ممكن تكون تاريخ اوربا من بعد عصر النهضة لغاية عصر عصر المستعمرات يعني كدة في القرنين ال16 وال17 عارفين الافلام الاجنبي بتاعة العصر الفكتورى في انجلترا والجنود الانجليز اللي لابسين اللبس بتاعهم المشهور اللي احمر في اسود ايووووةةة هي الفترة دي بالظبط بحبها اوى ..
بس علي فكرة هي اخدت حقها في الكتابة ..

21/ اكتر الشخصيات اللي اثرت فيا خدوا عندكم : تشي جيفارا ، الرئيس الامريكي 28 ويلسون ،الاسكندر الاكبر ، عبد الرحمن الداخل او صقر قريش لو تسمعوا عنه ،عمر بن عبد العزيز وجده عمر بن الخطاب رضي الله عنهما  وطبعا حبيب قلبي من جوة ادلوف هتلر وممكن برضه ونستون تشرشل ..يعني عموما اي شخصية مفكرة وتهدف لنشر الفكرة سواء صح او غلط بيأثر فيا اصرارهم علي هدفهم وفكرتهم ..

22/ كتاب !!! الله يسترك ياللي سألت السؤال عموما لو ربنا احيانا يعني ممكن اكتب كتاب اكيد عن التاريخ لاني مش بفهم في غيره وممكن اعمله زى المدونة كدة عبارة عن مقالات في مواضيع مش متسلسلة في التاريخ وبتحمل افكار معينة اما عن الاسم فاهسيبه دلوقت بظروفها لما اعمله الاول ..

23/ سماع الطرب ..ممممم انا عارف مين اللي سأل السؤال دة ههههههههههههههه ماشي ..عموما انا بحب اغاني فيروز جدا وبتعملي دماغ عالية الحقيقة لان اغانيها عموما لها معني ومذاق خاص برضه ممكن عايدة الايوبي بسمعها وفي فرقة بقي بموت فيها الحقيقة اسمها فرقة ابن عربي دي متخصصة في الاناشيد الاندلسية اللي كتبها ابن عربي المتصوف الشهير في الاندلس دي فرقة مغربية علي فكرة ..برضه بسمع سعاد ماسي ومنيروكاميليا جبران وريم بنا  دة غير بقي فرق وسط البلد ومسار اجباري واسكندريلا واغاني الشيخ امام وغيرها من النوعية دي ..عموما دماغي غريبة وعجيبة ومريبة في الاغاني ههههههههههههههههههههههههههه

24/ مكرونة ههههههههههههههههههههههههههههههههههههههههه ياجدعان ايه الاسئلة المريبة دي ههههههههههههه عموما انا بموت في المكرونة البشاميل بحبها جدا جدا

25/ كتاباتي الرومانسية ..برضه السؤال دة عارف مين اللي سأله ههههههههههههههههه
عموما لانها بتوجع القلب بس عموما كتباتي الرومانسية قليلة لاني لما بكتب فعلا بتتعبني عشان كدة مش بحب اكتب الا قليل ولو كتبت بكتب اي حاجة في اي حاجة ملهاش معني يعني ..سؤال صعب علي فكرة !!!

26/ اكتر امنياتي اني اعيش في سلام وامان وتكون دماغي فاضية ومش عاوز عكننة طبعا دي امنية مستحيلة مع امثالي الذين يتغذون علي العكننة ووجع القلب هههههههههههههههه

27/ 50 مليون جنيه هو دة مبلغ ياللي سألت السؤال ازاى يعني هو انت او انتي مش بتسمعوا الارقام الفلكية اللي اتسرقت من البلد طب قولوا 50 مليار ههههههههههههه
عموما لو جالي اول حاجة هاعملها مشروع في دماغي من زمان اعمل قناة فضائية عن التاريخ بس تكون بشكل يجذب الناس ويعلمهم في نفس الوقت عموما الفكرة بدرسها من سنة ولسة مكملها معايا الا ان يأذن الله وابقي غني هههههههههههههههه

السؤال الاجبارى بقي :

بصراحة ممكن اقترح عليكم اقتراح 

انكم تكونوا اكثر فاعلية بمعني تجمعوا المدونين في رابطة او ائتلاف اشمعني احنا يعني هههههههههههههههههههههه بس بجد يعني اللي فاضي من المدونين وعنده افكار ممكن نخرج من الفضاء الالكتروني للارض ونشتغل علي الحاجات الانسانية تبرع بالدم جمع تبرعات كدة يعني مجرد اقتراح ممكن ينفع او لا بس دة رأى تفعلوا طاقتكم في حاجة انفع من كدة يعني وبرضه هيبقي الهدف اننا نتقرب من بعض ونكون نافعين اكتر ..

هييييييييييييييه خلصت وخلصتوا عليا ههههههههههههههههههه

بس عموما مستمتع وانا بفضفض معاكم بالرغي دة كله 

متشكر اوى علي الفرصة اللذيذة دي ..يالا بقي بالاذن سلامو عليكم 


هذا وقد كان معكم 
هيثم ابو العافيه 
من مضيفة بيت المدونين 
مصر

الى لقاء قادم مع ضيف جديد 
فى مضيفة بيت المدونين



ملحوظه : تم نشر التعليقات المحتويه على الاسئله والتى لم يطلب اصحابها عدم نشرها فى التعليقات
وتم فتح التعليقات الان بدون اشراف مره  اخرى
شكراً للجميع



هناك 26 تعليقًا:

Ramy يقول...

بالرغم أنك وجعتلى قلبى فى بعض الأجابات

لكن أستمتعت بيهم

جدا جدا

زى ما فى مخيلتى دة معناه أنك واضح يا هيثم

و شد حيلك كده و أكتب حاجة ها

ربنا يوفقك (:
(:

mena يقول...

هههههههه انت حد جميل

اوى واجاباتك كانت بين

اللى وجعت قلبى وبين

اللى ضحكتنى بتوفيق ان شاء الله

وربنا يرزقك راحة البال

richardCatheart يقول...

ههههههههههههههههههههههههههههههههههههههههههههههههههههههههههههههه

مبسوطه جدااااااااااااااااا

لانك اتبسطت من اغلب اسئلتى دا عجبنى اوى لانه معناه انى عارفك كويس جدا وليا الشرف يا صديقى العزيز

المهم ان الاجابات كانت هايله اكتر من ممتاز وخصوصا وصفك لمصر قبل وبعد الثوره

وعموما الاجابات وافيه وكافيه

ربنا يكرمك ويسهلك حالك ويفتحها عليك
يارب وافرح بيك انت تستاهل كل خير

انا مبسوطه بيك اوى يا هيثم
ربنا معاك بالخير

الحــب الجميـــل يقول...

استمتعت جدااااااااااااا بقراية اجاباتك
ما شاء الله عليك يا هيثم
ربنا يسعدك ياااارب
وتقدر تحقق اللى نفسك فيه

وتعمل القناة الفضائيه التاريخيه بس ابقى خدنى معاك مذيعه ههههههههههههه
طبعا اطلع بعد ما القناه تقول ششششششششششششششششششششش
هههههههههههههههههههه

والحمد لله ان سؤالى طلع صعب هههههههههههههههههه

بس اجابات جميله
ربنا يحميك يارب ويحقق كلللللللل اللى بتتمناه

نورت بيتك بيت المدونين

re7ab.sale7 يقول...

هبدأ من الاخر
يوووة مساء الورد الاول
الاقتراح الاخير بتناع التبرد ده اصلا معمول بيه من زماان وانا حضر لقائين
اما بالنسبة لأجاباتك فهي عبقرية
بجد مش هزار والله بتدل علي انك انسان واعي وفاهم ومفكر
مدخلتش مدونتك يمكن غير مرة ولا اتذكر ان كنت علقت او لا
بس دايما بشوف اسمك ف مدونات صديقة
تحياتي وتمنياتي لك بالتفوق دايما والابداع وتحقيق كل امنياتك واحلامك
واحلم يا اخ هيثم الاحلام معليهاش ضرايب

(ست* جنى* الحسن) يقول...

سلامو عليكو
فكرة حلوة اوى المضيفة او بمعنى اصح الفضفضة
فعلا بتقربنا من بعض وبتعرفنا على بعض اكتر

على فكرة كان واضح ان اجاباتك صادقة اوى وانك انسان واضح اوى وده شىء جميل.
لكم تحياتى

ويكا يقول...

فكرت فى كذا تعليق

بس لقيت احسن ةتعليق انا حاسه اوى هو

"ربنا يكرمك يبنى "

ليس فقيرا من يحب يقول...

هههههه يعنى متأكدت ان اكتئابك ده مكنش بسبب اكلان فى القلب مش عارف تهرشه ههههههههههههههههههههههه
هههههههههههههههههههههههههههههه انا قولت اسأل سؤال خفيف كده على الماشى وبقيت المدونين الحلوين قامو بالواجب وعصروك
ربنا يسعد ايامك

مهاترات عاقل يقول...

أكثر من رائع
بالتوفيق ان شاء الله

فاتيما يقول...

انا متفقة مع كل الـعليقات
وخصوصا تعليق ر ر
رامى قال اللى حساه
انتا شخص واضح قوى يا هيثم
وجميل قوى كمان
وطييييييييييييييييييييييب جدا
ربنا يكرمك يا بنى زى ما قال ويكا


بس انا عاوزة اثبت حقى
ف اجابة المكرونة بالبشاميل دى
عشان انا مكشوف عنى الحجاب
وقلبى كان حاسسها
وفندت اسبابى
انك رومانسى وعاتشفى يا بنى
كل برج التور كدا
اومال احنا موكوسين يا بنى من شوية
دى حاجة ف الجينات

:)

ربنا يوفقك
وبدل الملوين يبقى مليار
بس تفتكر اخواتك ف التدوين بقى
وتشغلنا .. واهو نطلع بسبوبة م التدوين اللى مبيأكلش فلوس دا


آه

كلمتين أخيرتين

1)
الف شكر لبيت المدونين الغالى
ع الجهد الواضح

2)
فيه تبرع بالدم ان شاء الله
وتفاصيله عند خيخة
وعندى ف الشريط الجانبى

بس خلاث

Ms Venus يقول...

ربنا يوفقك دايما يا هيثم

شمس النهار يقول...

:))
مش قادر تبقا غير مؤرخ
:))

سؤااااال تاااااااني ليه غايب عن التدوين وماتقلش علشان براقب الاحداث زي ماقلت في الاجابات
لازم تراقب وتكتب محتاجين حد زيك وشاب كمان يرصد ا لاحداث

Haytham Alsayes يقول...

رامي
او
ر ر زى فاتيما ما بتناديك
سلامة قلبك الطيب يارامي
كلنا قلبنا موجوع والله المستعان
راجع ان شاء الله يارامي قريب
طمني عليك دايما

Haytham Alsayes يقول...

منة

شكرا لذوقك
ويارب يسمع منك ربنا ان شاء الله

تحياتي

Haytham Alsayes يقول...

ريتشارد قلب القطة
ازيك يامارو وازاى الحاج بقالي كتير مسألتش علي حد حتي نفسي هههههههههههه
بس عموما راجع تاني وبحاول ارجع اهو
وانا استمتعت بالاسئلة وكنت عارف انك سألتي حاجات كتيييير بس بجد استمتعتزيك وانا بجاوب وبحاول اخرج الشحنة دي

سلميلي علي الحاج ويارب تكونوا بخير دايما

تحياتي

Haytham Alsayes يقول...

الحب الجميل

شكرا بجد انك استمتعتي
والقناة وصاحب القناة تحت امرك هههههههههههههه
بس تتعمل الاول بعد قرنين كدة من الزمان
وسؤالك فعلا صعب واعترف واقر بكدة يمكن من اصعب الاسئلة التي بتتسأل خاصة في الوقت اللي انا فيه دة
بس اوعدك اكتب رومانسي بس بعدين بقي


تحياتي
وشكرا علي دعوتك ليا في المضيفة

Haytham Alsayes يقول...

رحاب صالح

الله يسترك ولا عبقرية ولا حاجة دي اجابات عادى يعني ربنا يكرمك يارب
اما بقي الاحلام بجد جربت احلم ومش بتتحقق مش عارف العيب في ايه بالظبط
بس غالبا فيا انا

علي العموم ربنا يستر

تحياتي

Haytham Alsayes يقول...

ست جني الحسن

شكرا ربنا يكرمك
وفعلا المضيفة واصحاب المدونة والبيت كلهم زى الفل ورائعين يعني

تحياتي

Haytham Alsayes يقول...

ويكا

روح ياشيخ اهو انت اللي ربنا يكرمك
ههههههههه
دعواتك يابشمهندس

Haytham Alsayes يقول...

ليس فقيرا من يحب

هو انتي بقي بتاعة الاكلان في القلب
ههههههههههههههههههههههههههه
ماشي ماشي ولا يهمك كنتي اسألي مانا اتعصرت منكم خلاص

انا اتشرفت والله اني اتسألت منك ومن الناس الحلوة دي

منورة

Haytham Alsayes يقول...

مهاترات عاقل

ربنا يكرمك :)

Haytham Alsayes يقول...

فاتيما

ازيك يا ست الكل
والله يافاتيما انتي اللي طيبة عشان كدة شيفاني طيب ربنا يكرمك بجد ياام قلب طيب
بس انا علي فكرة مش برج الثور انا برج الجوزاء يعني تخافوا مني بقي ههههههههههه
بس مش معني كدة اني مش رومانسي انا رومانسي جدا وهو دة اللي مضيعني غالبا
يالا بقي ربنا يكرمنا جميعا
والبشاميل دة عشقي الاول والاخير لينا عزومة بشاميل بقي لما نشوف بعض في اي لقاء تدويني علي خير
بجد ببقي مبسوط لما تعلقي عندى وكمان لو فاكرة الاحتفال اللي في التعليق عندى بعيد ميلادى اتبسط بيه جدا ربنا يكرمك وان شاء الله هاكتب زى الاول وهبقي متابع للجميع
وبرضه قبل ما انسي مدونتك صباحاتي فعلا مزاااااااااااج ولازم ادخلها واقرأ مقال واحد علي الاقل
ربنا يكرمك يا ام يوسف وتفرحي بيه يارب

تحياتي ياست الكل

Haytham Alsayes يقول...

فينوس

شكرا يافينوس
ربنا يكرمك :)

Haytham Alsayes يقول...

شمس النهار

ازيك يافندم
فعلا مش عارف اخرج من التاريخ عايشه وحاسه ومأثر عليا في حياتي كمان مش عارف دة صح ولا غلط

انا ان شاء الله هارجع بقوة
وفعلا الايام اللي بعد الثورة في حياتي عموما كانت صعبة بسبب موضوع ما وفعلا مع كدة لقيت نفسي انجذبت للاخبار اكتر بس بجد لازم ارجع اكتب تاني
وشكرا ربنا يكرمك دي شهادة منك اني مفيد وغالبا ما استحقهاش بنفس المعني

:)

تحياتي

سكرتيرة جديدة يقول...

اممممممم
انا اول مرة اجى المضيفه

مكان حلو للتجمع والتعارف
هبص بصة كده والف وراجع تانى ان شاء الله

اجاباتك حلوة يا باشا
وبحس دايما العبقريه بتخرج من قلب عاش ومر بتجارب وحس بالالم والفرح والكفاح ووووووووو
ايه الرغي ده
منتظرينك فى الفردوس الضائع
:)

Haytham Alsayes يقول...

سكرتيرة جديدة


الله يخليكي :)
حاضر راجع مرة تانية ان شاء الله